Read Pangasinan SARAY GAWGAWA 5 Bible Online

SARAY GAWGAWA 5 - Pangasinan bible

SARAY GAWGAWA 5

¹"Wala met iray sanasawa ya angilakoy dalin da. Ananias so ngaray laki tan Safira so ngaray bii.

²"Binawasan nen Ananias so kuartan nanlakoan da, tan amta met ya nen asawa to. Kulang sirin so inter dad saray apostol.

³"Kanyan inkuanen Pedro, Ananias, akin et impaoleyan moy pusom ed Satanas a pantilaen to kad Ispiritu Santo? Akin et binawasan moy kuartan inter mo?

⁴"Kasakbayan mon inlakoy dalin kayaryan mo, anto? Kapangilakom, kayaryan mo met imay kuartan nanlakoan mo, anto? Akin et anunotan mo ni yan ginawa? Aliwan say too so tinilaan mo, no ag say Dios!

⁵"Kadngel nen Ananias ed saya, atumba tan inatey. Sinmabiy baleg a takot ed amin ya akadngel ed saya.

⁶"Inmalagey iray tubon-balo binalkut day bangkay to, insan da impaway ya impompon.

⁷"Kalabas na taloy oras, nitan met lan linmoob imay asawa to, balet ag to amtay agawa.

⁸"Tinepet nen Pedro ed sikato, Ibagam pad siak, saya labat so nanlakoan yoy dalin? On, ebat to, saya labat.

⁹"Inkuanen Pedro, Akin et nankasakeyan yon sanasawa a suboken so Ispiritu na Katawan? Saray babalolaki ya angipompon ed asawam wadtan la rad puirta. Onsoblay ka met ya awiten dan ipaway!

¹⁰Kabebekta, atumba tan inatey ed saliyan nen Pedro si Safira. Linmoob ira may babalolaki tan anengneng dan inatey, kanyan inalsa ran impaway so bangkay to, insan da impompon ed abay na asawa to.

¹¹Ataktakot a maung so intiron iglisia tan amin ya akabalitad saya.

¹²Amayamay a milagro tan pakelaw so ginagawa da ray apostol, tan naimatunan ira ya na totoo. Nantitipon ed Portiko nen Solomon iray amin a mananisia.

¹³Anggapo ed saray aliwan mananisia so makakpel a miolup ed sikara, anggaman ya agaylay panangidayew na totoo ed saray mananisia.

¹⁴Balet dinmakel lan dinmakel iray bibii tan lalakin mananisia ed Katawan.

¹⁵Lapud gagawaen da ray apostol, saray totoo impaparokul dad saray dalagan tan ikamen iray mansasakit tan inyaakar da rad daladalan, pian saray arum ed sikara et naaninoan labat nen Pedro no onlabas.

¹⁶Sinmabiy dakerakel a totoon nanlalapud kaliber-liber iran baley na Jerusalem a sankaawit da ray mansasakit tan saray inaaponay dimonyo; tan inmaabig iran amin.

¹⁷Say Pangulon Pari tan saray kakaiba to a kabyangan iray Saduseo agaylay pangimon dad saray apostol, kanyan nantotongtong ira no antoy gawaen da.

¹⁸Inerel da ray apostol tan impriso da ra.

¹⁹Balet diad saman a labi, inlokas na sakey ya anghil so puirtay prisowan, pinapaway to ra may apostol tan inkuanto,

²⁰Laka yod Timplo tan ipulong yod may nipaakar ed sayan balon panagbilay.

²¹Tinmoluk ira may apostol kanyan diad kabkabwasan, linmoob irad Timplo tan ginapoan day nambangat. Samay Pangulon Pari tan saramay kakaiba to tinawag da ray mamatakken a Judio, ta manmiting so intiron Sanidrin. Insan da impatawag ya onarap ed sikara ira may apostol.

²²Balet nen sinmabid prisowan iray guardia, anggapo la ra may apostol. Kanyan pinmawil irad Sanidrin tan inkuanda,

²³Nen sinmabi kamid prisowan, asabian min akakaput tan wadman iray guardian akaalagey ed arap na puirta. Balet nen nilokasan mi, anggapoy wadman!

²⁴Mankelaw iray manonan papari tan say kapitan da ray guardia ed Timplo nen nadngel da ya, ta ag da amtay agawad saramay apostol.

²⁵Balet nitan lay sakey a laki ya inkuanto, Saramay impriso yo et wadman ira natan ed Timplo a mambabangat!

²⁶Linmad Timplo may kapitan a kaiba to ray sondalo to, tan inawit da ra may apostol. Balet andi-pasootan so impangawit da, ta antakot ira ompan tupaken iray totoo.

²⁷Pinaloob da ra may apostol tan inyarap da rad Sanidrin, tan tinepetan iray Pangulon Pari.

²⁸Inkuanto, Mapeget mi kayon ingganggan ya ag kayo la mambabangat ed ngaran na sayan too, balet nengneng yoy ginawa yo! Inkayat yod intiron Jerusalem so bangat yo, tan ipapakasalanan yod sikami so impatey to.

²⁹Inmebat si Pedro tan saray arum ya apostol, Nepeg min onurey Dios, aliwan saray totoo.

³⁰Say Dios da ray lalaki tayo so amaolid bilay ed kinen Jesus, kayari yon pinatey diad impangipasak yod sikato ed krus.

³¹Intanduroy Dios ed nikawanan to tan ginawa ton Pangulo tan Manangilaban a mangiter ed saray totood Israel na pankanawnawa ran mampatauli tan mangibeneg ed saray kasalanan da, pian napirdona ra.

³²Natasian mi ra yan agawgawasikami tan say Ispiritu Santo ya inter na Dios ed saray mangonur ed sikato.

³³Nen nadngel ya na saray kabyangay Sanidrin, agaylay pasnuk da, kanyan ninunot dan pateyen ira may apostol.

³⁴Balet inmalagey so sakey ed sikara, sakey a Pariseon manngaray Gamaliel, maistroy Ganggan tan gagalangen na totoo. Ingganggan ton papawayen a magano ray apostol,

³⁵insan inkuanto, Kaparak iran Israelita, nunot yon maung so ngalngali yo lan gawaen ed saraman a totoo

³⁶Ag ni abayag so inletaw nen Teudas, ya angibagbagan sikato et sakey a matalonan too. Sinisia tan tinombuk na apat a lasua a lalaki. Balet nen apatey, abuybuyak ira may totoo to tan naandi met lay olupan da.

³⁷Kasumpal to, linmetaw met si Judas a taga Galilea, nen panaoy panagpalista. Amayamay met iray naayat ton totoo. Balet nen pinatey day Judas, abuybuyak met lamlamang ya amin iray totoo to.

³⁸Kanyan kuankod sikayon ag yo diriwiten ira yan totoo. Paolyan yo ra labat, ta no sayan bangat tan kimey da et nanlapud too, naandi met lamlamang.

³⁹Balet no nanlapud Dios, ag yo ra natalo. Ompan ompaway ni ingen a say Dios so lalabanan yo! Tinombuk na Sanidrin yan simbawa nen Gamaliel.

⁴⁰Pinaloob da ra may apostol, impapasiplatan da ra, ingganggan dad sikaran ag la ra mampulong ed ngaran nen Jesus, insan da la ra imbolus.

⁴¹Maliket iray apostol a tinmaynan ed arap na Sanidrin, lapud impasey Dios a manepeg iran manirap na kababaingan lapud ngaran nen Jesus.

⁴²Inagew-agew, diad Timplo tan diad saray kaabungan, intuloy day nambabangat tan nampupulong na nipaakar ed kinen Jesus, say Cristo.