Read Pangasinan SARAY GAWGAWA 6 Bible Online

SARAY GAWGAWA 6 - Pangasinan bible

SARAY GAWGAWA 6

¹"Ag abayag, nen ondarakel la ray mananisia, saray Judio a Grigo so salita ra et nanriklamo ra sumpad saray Judion nianak lad man. Napapaolyanan ira konoy bibiin balo ed sikara diad inagew-agew a panagbunog na pambilay.

²"Kanyan tinawag na labinduan apostol iray amin a mananisia tan inkuanda, Ag manepeg a paolyanan miy pampulong na salitay Dios, lapud pangaasikaso mid pambunog na pambilay.

³"Kanyan, agagi, mamili kayoy pitoran lalakid saray kakaiba. Pili yo ray bibirbiren a maung a totoo, makabat tan napnoy Ispiritu Santo, ta ipalima lad sikara yan kimey.

⁴"Sikami, balet, ikana mi lay amin ya oras mi ed pampulong tan pampikasi.

⁵"Makaliliket iran amin ed sayan kanunotan da ray apostol, kanyan pinili ray Esteban, sakey a lakin mabiskeg so pananisia to tan napnoy Ispiritu Santo, tan di Felipe, Procoro, Nicanor, Timon, Parmenas, tan Nicolas a taga Antioquia, sakey a Hintil a naayat ed Judaismo.

⁶"Inyarap da rad saray apostol; insan impikasi ra na saray apostol, tan intatapew da ray lima ra ed sikara.

⁷"Kinmayat lan kinmayat so salitay Dios, tan diad Jerusalem dinmakel lan dinmakel iray mananisia. Amayamay iray pati paparin anisia.

⁸"Napnoy bindision na Dios tan pakayari si Esteban, tan amayamay iray ginagawa ton milagro tan pakelaw, tan niamatunan ira ya na totoo.

⁹"Balet, sinumlang na pigaran kabyangay sinagoga a tatawagen iray Nablus a Totoo. Wala ray Judio ed sikara a taga Cirene tan Alejandria. Saraya tan saray arum a Judio a taga Cilicia tan Asia et akisangsangan irad kinen Esteban.

¹⁰Balet ag da nadaeg so kakabatan ya inter na Ispiritu ed kinen Esteban.

¹¹Kanyan sinogsogan da ray pigaran totoo a mangikuan, Nadngel mi yan too a mansasalitay maoges sumpad kinen Moises tan say Dios!

¹²Lapud saya, atanggoyur a nampasnuk ed kinen Esteban iray totoo, saray mamatakken na baley, tan saray iskriba. Nila ray Esteban, inerel da, insan da inyarap ed Sanidrin.

¹³Imparontal day pigaran tasi a mantilan nipaakar ed sikato. Sayan too, inkuanda, et ag ontotondan mansalitay maoges sumpad masanton Timplo tayo tan say Ganggan nen Moises.

¹⁴Ta nadngel min imbagbaga to a sayan Jesus a taga Nazaret et deralen to yan Timplo, tan salatan ton amin iray kaogaliyan ya impatawir nen Moises ed sikatayo.

¹⁵Amin ya akayorung ed Sanidrin ninengneng dan maung si Esteban, et anengneng dan singa lupay anghil so lupa to.