Read Pangasinan SARAY GAWGAWA 8 Bible Online

SARAY GAWGAWA 8 - Pangasinan bible

SARAY GAWGAWA 8

¹"Inabubonan nen Saulo so impamatey dad kinen Esteban. Diad saman ya agew, ginmapoy impamairap dan maung ed iglisiad Jerusalem. Amin a mananisia, likud ed saray apostol, nikaykayat irad saray luyag na Judea tan Samaria.

²"Wala ray pigaran totoon matoor ya angipompon ed bangkay nen Esteban, tan ontan lay impannangis da.

³"Si Saulo, balet, ginawa toy anggaay nayaryan to a maneral ed iglisia. Linmoloob ed kaabungan tan ingagayugoy to ray mananisia, bii o laki man, tan impripriso to ra.

⁴"Saramay nikaykayat a mananisia impupulong day salita ed inerman a nila ra.

⁵"Linmay Felipe ed siudad na Samaria tan impupulong tod may Cristo.

⁶"Nen abalitaan na totoo tan naimatunan da ray ginagawa ton milagro, dinengel dan maung so ibabaga to.

⁷"Ta amayamay iray maoges ya ispiritun pinmapaway ed saray inaaponan dan totoo, tan naniingal iran pinmapaway. Amayamay met iray inmaabig a lopuy tan piley.

⁸"Kanyan awalaay baleg a liket imam a siudad.

⁹"Walay toon manngaray Simon, ya apakelaw to lan abayag iray Samaritano diad panagsalamangka to. Imbagbaga ton sikato et makapanyari,

¹⁰tan panisiaan na amin a klasiy too, manlapud saray sankaabebaan ya anggad saray sankatageyan so kipapasen da. Inkuanda, Sayan laki so tatawagen a Baleg a Pakayari, say dilin pakayari na Dios.

¹¹Abayag lan panaon ya apakelaw to ra diad panagsalamangka to, kanyan agaylay panderengel dad sikato.

¹²Balet nen impupulong nen Felipe so Maung a Balitan nipaakar ed Panariay Dios tan say ngaran nen Jesu-Cristo, anisia ra tan nampapabinyag ira, bii man o laki.

¹³Anisia met a pati si Simon tan kasumpal ton nampabinyag, akilkila ed kinen Felipe. Mankelaw nen naimatunan to ray pakelaw tan milagron nagagawa.

¹⁴Nen saray apostol a walad Jerusalem et nadngelan da ya inawat na saray taga Samaria so salitay Dios, imbaki rad man si Pedro tan si Juan.

¹⁵Kasabi ra, impikasi da ray mananisia pian naawat day Ispiritu Santo,

¹⁶ta ag ni linmeksab ed anggan sakey ed sikara. Abinyagan ira labat ed ngaran nen Jesus a Katawan.

¹⁷Intatapew di Pedro tan Juan iray lima ra ed sikara, tan inaawat na sarayan totoo so Ispiritu Santo.

¹⁸Anengneng nen Simon a saray angitatapewan da ray apostol na lima ra et naawat day Ispiritu, kanyan iitdan to ray kuarta di Pedro tan Juan,

¹⁹tan inkuanto, Iter yo pa met ed siak yan pakayari, pian siopamay pangitapewan ko ray limak et makaawat na Ispiritu Santo.

²⁰Balet inmebat si Pedro, Naderal ka komun tan say kuartam, ta abaloan mon nasaliw na kuarta so panangaroy Dios!

²¹Anggapoy betang odino kanepegan mod sayan kimey, ta marotak ed arap na Dios so pusom.

²²Magbabawi ka sirin tan ibeneg mo yan maoges a pilalek mo, tan mampikasi kad Katawan a pirdonaen to ka.

²³Ta nanenengneng kon agaylay pakakaibeg mo, tan aripen kay kasalanan.

²⁴Inkuanen Simon ed kindi Pedro tan Juan, Ipikasi yo ak pa sirin ed Katawan, pian anggapod saray imbaga yo so nagawad siak.

²⁵Kasumpal di Pedro tan Juan a nantatasi tan nampupulong na salitay Katawan ed siudad na Samaria, pinmawil irad Jerusalem. Diad dalan, intuloy dan impupulong ed amayamay a bario na Samaria so Maung a Balita.

²⁶Ingganggan na sakey ya anghil na Katawan ed kinen Felipe, Mamparaan ka ya onla ed abalaten, diad dalan a manlapud Jerusalem a mamaarap ed Gaza. (Ag la ya natan nikakana a dalan.)

²⁷Linma sirin ed saman a dalan si Felipe. Wala met so sakey ya yunuko a taga Sudan ya ondaralan diman. Sikatoy opisyal a managasikasod amin a kayamanan na Riyna na Sudan. Linmad Jerusalem ya angigalang ed Dios,

²⁸tan ompapawil lad sayan bekta. Manloglogan ed karwahi to, tan babasaen toy libro nen propita Isaias.

²⁹Laka, ta abet mo man a karwahi, inkuan na Ispiritu Santo ed kinen Felipe.

³⁰Binmatik si Felipe, et nen naamparan to la, arengel ton babasaen na samay akalogan so libro nen propita Isaias. Tinepet to, Natatalusan mo tay babasaen mo?

³¹Inmebat imay yunuko, Panoy pakatalus ko no anggapoy mangipatalus ed siak? Inimbitaan ton onlogan si Felipe. Linmogan si Felipe tan inmirung ed abay to.

³²Sayan parti na Masanton Sulat so babasaen to: Sikatoy singa karniron iyaakar ed panagpateyan; singa kordiron anggapoy esel ton kakatliay bago; ag ton balut nambalikas na anggan sakey a salita.

³³Nilemlemew da tan ag da initday katonungan. Anggapoy makapangibaga na nipaakar ed saray kabyangay boleg to, ta inerep day bilay tod sayan mundo.

³⁴Ibagam pad siak, tepet to may yunuko, nipaakar ed siopa so labay ya ibaga na propita? Nipaakar ed sikaton dili o nipaakar ed sananey a too?

³⁵Ginapuan nen Felipe so nansalita; manlapud sayan partiy Masanton Sulat, impaliwawa toy Maung a Balitan nipaakar ed kinen Jesus.

³⁶Diad pambabatik da, asabi ray pasen a kawalaay danum. Nengneng mo, walay danum! inkuanto may yunuko. Anto niy makasbel ed pampabinyag ko?

³⁸Pinatonda to may yunuko so karwahi. Linma ran duad danum, tan bininyagan nen Felipe.

³⁹Kasakbit da, imbatik na Ispirituy Katawan si Felipe. Ag la anengneng na samay yunuko, tan maliket a linma la.

⁴⁰Si Felipe, balet, naimano ton wala lad Azoto. Manlapud man impupulong toy Maung a Balita ed amin a baley a dinadalan to, anggad sinmabi ed Cesarea.