Read Pangasinan SARAY GAWGAWA 9 Bible Online

SARAY GAWGAWA 9 - Pangasinan bible

SARAY GAWGAWA 9

¹"Si Saulo, balet, itutuloy toy getma ton manaktakot tan mamatey ed saray disipulo na Katawan. Linmad Pangulon Pari,

²"tan kinmerew na saray sulat a para saray sinagogad Damasco, pian no makalmod man na saray mananombuk ed Dalan et naerel to rabibii man o lalakitan niakar to rad Jerusalem.

³"Linma lan mamaarap ed Damasco si Saulo. Nen asingger lad siudad, biglan walay silew a nanlapud tawen tan kinmidyam ed kaliber-liber to.

⁴"Apaktak tan nipasobsob ed dalin, insan nadngel toy bosis a nankuan ed sikato, Saulo, Saulo, akin et papairapen mo ak?

⁵"Siopa ka, Katawan? tepet to. Inmebat imay bosis, Siak si Jesus a papairapen mo.

⁶"Alagey ka tan loob kad siudad, ta diman nibagay nepeg mon gawaen.

⁷"Tinmonda ray kakaiba nen Saulo tan ag ira akaskasel. Nadngel da met imay bosis, balet anggapoy toon anengneng da.

⁸"Inmalagey si Saulo. Nen inmorikat to ray mata to ag makanengneng, kanyan intabin da ya anggad Damasco.

⁹"Taloy agew ya ag makanengneng tan leleg na sarayan agew, ag angan odino inminom.

¹⁰Diad Damasco, walay sakey a disipulon manngaray Ananias. Pinmayawar ed sikatoy Katawan tan inkuanto, Ananias! Wadya ak, Katawan, ebat to.

¹¹Intuloy na Katawan ya inkuan, Lakad kinen Judas a say abung to et walad kalyin tatawagey Maptek, tan tepet mo so sakey a lakin taga Tarso a manngaray Saulo. Mampipikasi ed sayan oras.

¹²Diad sakey a payawar, anengneng to kan linmoob ed kawalaan to, tan intapew mo ray limam ed sikato pian makanengneng lamet.

¹³Inmebat si Ananias, Katawan, amayamay lay akadngelan ko na nipaakar ed sayan too. Agaylay oges konoy ginawa tod saray totoom ed Jerusalem.

¹⁴Walay awit ton pakayarin nanlapud saray manonan papari, tan linma diad Damasco a mangerel ed amin ya ontatawag ed ngaran mo.

¹⁵Balet inkuan na Katawan ed sikato, Laka la, ta sikatoy pinilik a manlingkur ed siak. Sikatoy mangipaamtay ngaran ko ed saray Hintil, saray arari, tan saray totood Israel.

¹⁶Ipanengneng kod sikatoy amin a nepeg ton nasagmak a kairapan lapud siak.

¹⁷Linma sirin si Ananias, linmoob ed abung, tan intapew to ray lima tod kinen Saulo. Agin Saulo, inkuanto, imbaki ak dia na Katawan, say dilin Jesus a nampanengneng ed sikad dalan nen oonla ka dia. Imbaki to ak dia, pian makanengneng ka lamet tan napano kay Ispiritu Santo.

¹⁸Kabebekta walay apagpag a singa ra siksik a nanlapud saray mata to, tan akanengneng lamet. Inmalagey tan nampabinyag.

¹⁹Kasumpal ton angan, pinmawil so gendat a biskeg to. Pigay agew ya akilkilay Saulo ed saray disipulo dimad Damasco.

²⁰Linmoob ed saray sinagoga tan nampupulong a tampol na nipaakar ed kinen Jesus. Sikatoy Anak na Dios, inkuanto.

²¹Mankelaw ya amin iray akarengel ed sikato tan inkuanda, Aliwa tan sikato ya may mamapairap dimad Jerusalem ed saray ontatawag ed sayan ngaran? Ag ta linma dian mangerel ed sikara, insan to ra iyakar ed saray manonan papari?

²²Balet lalon magmamaliw a makapanyari so pampupulong nen Saulo. Diad abig na panamaneknek to a si Jesus et sikatoy Cristo, ag makaebat iray Judion manaayam ed Damasco.

²³Kalabas na amayamay ya agew, nampapaknaan na saray Judio a pateyen day Saulo,

²⁴balet akabatan to man a getma ra. Labi-agew dan binantayan so puirtay siudad, pian napatey da.

²⁵Balet aminsan a labi, saray disipulo to inlogan dad sakey a tiklis si Saulo, insan diad sakey a bongaw inleksab dad biek na padir.

²⁶Linmad Jerusalem si Saulo. Labay toy miolup ed saray disipulod man, balet ag da panisiaan a sakey lan disipulo, tan antakot ira inged sikato.

²⁷Kanyan inibaan nen Bernabe ya inyakar ed saray apostol. Insalaysay tod sikara so impakanengneng nen Saulo ed Katawan tan say impitongtong na Katawan ed sikato nen walad dalan. Insalaysay to met so sebeg nen Saulo a nampupulong ed Damasco diad ngaran nen Jesus.

²⁸Nagmaliw sirin a kaibiba ray Saulo ed Jerusalem, tan agaylay sebeg ton nampupulong diad ngaray Katawan.

²⁹Akitongtong met ed saray Judion mansasalitay Grigo tan akisangsangan ed sikara, balet labay dan pateyen.

³⁰Nen naamtaan ya na saray agagi, inyakar dad Cesarea, insan da pinapawil ed Tarso.

³¹Kanyan awalaay kareenan so iglisia ed intiron Judea, Galilea tan Samaria; binmiskeg tan binmaleg lapud tulong na Ispiritu Santo, tan nambilay a sigagalang ed Katawan.

³²Linmay Pedro ed nandoroman pasen. Aminsan, linman binmisitad saray totooy Dios a walad Lida.

³³Akarumog dimay sakey a lakin paralitiko ya ag la ombabangon a waloy taon. Eneas so ngaran to.

³⁴Eneas, inkuanen Pedro, paabigen ka nen Jesu-Cristo. Bangon ka tan sinup moy dokulan mo. Binmangon a tampol si Eneas.

³⁵Anengneng na amin a manaayam ed Lida tan Saron si Eneas kanyan anisia rad Katawan.

³⁶Diad Jope wala met so sakey a biin mananisia a manngaray Tabita. (Diad salitay Grigo say ngaran to Dorcas, ya sakey ya ulsa so labay ton ibaga.) Anggapo lay arum a gagawaen to no ag say panggawa toy kamaungan tan panulong tod saray mairap-bilay.

³⁷Diad saraman ya agew nansakit tan inatey. Kasumpal dan nilinisay bangkay to, inyan dad kuarto ed tagey.

³⁸Asingger so Jope ed Lida, kanyan nen nadngelan na saray disipulod Jope a walad Lida si Pedro, angibaki ray duaran totoo tan papaibaga ra, Mila ka karin tampol ed sikami.

³⁹Akilan tuay Pedro ed sikara. Kasabi to, inyakar dad samay kuarto ed tagey. Saray balon bibiin mannangnangis, minokut day Pedro, tan impapanengneng dad sikato ray kolibemben tan, kawekawes a ginagawa nen Dorcas nen mabilay ni.

⁴⁰Pinapaway nen Pedro ran amin, insan nantalimukor a nampikasi. Inarap to may bangkay, insan inkuanto, Tabita, bangon ka! Minmorikat, et nen anengneng toy Pedro, inmirung.

⁴¹Binembenan nen Pedro ray lima to tan inibaan ton inmalagey. Tinawag to natan ira may mananisia tan saray bibiin balo, tan inyarap tod sikaray Dorcas a mabilay la.

⁴²Kinmayat yan agawa ed intiron Jope, kanyan amayamay so anisiad Katawan.

⁴³Nambayag dimay Pedro ed Jope, tan akipundod kinen Simon a managkurti na katat.