Read Pangasinan TAGA GALACIA 3 Bible Online

TAGA GALACIA 3 - Pangasinan bible

TAGA GALACIA 3

¹"Makulang-kulang a taga Galacia! Siopay angekal na kalakal yo? Maliwliwawa la lantid mata yo so impatey nen Jesu-Cristo ed krus!

²"Saya labat so labay kon kabaten ed sikayo: inawat yo kasiy Ispiritu lapud panangonur yod Ganggan, o lapud panagdengel tan pananisia yod Maung a Balita?

³"Agaylay inkakulang-kulang yo! Ginmapo kid Ispiritu; insan natan labay yo la sirin ya isumpal diad panamegley na pakayari yon dili?

⁴"Anggapo tay kabaliksan na saray agawgawad bilay yo? Wala met angangko!

⁵"Diad pangiter na Dios ed sikayo na Ispiritu tan diad panggawa toy milagro diad pegley yo, gawaen to kasi lapud panangonur yod Ganggan, o lapud panagdengel tan pananisia yod Maung a Balita?

⁶"Singa agawad kinen Abraham onung ed walad Masanton Sulat, Anisiad Dios si Abraham, kanyan say Dios inawat to a matonung.

⁷"No ontan sirin, malinew a saray manisiad Dios so peteg iran anak nen Abraham.

⁸"Akaona lan impanengneng na Masanton Sulat a say Dios paandien to so kasalanan da ray Hintil diad panamegley na pananisia. Ontan met, akaona lan imbagay Masanton Sulat ed kinen Abraham so Maung a Balita, Diad panamegley mo, bindisionan na Dios iray amin a katoowan.

⁹"Anisiad Dios si Abraham, kanyan sikatoy abindisionan. Ontan met a nabindisionan ya amin iray manisiad Dios.

¹⁰Amin da ray manmamatalek ed panangonur ed Ganggan, wala rad silong na sakey a samba. Ta ibabagay Masanton Sulat, Nisamba so balang sakey ya ag ononur ed amin a nisulat ed libro na Ganggan!

¹¹No ontan sirin, malinew ya anggapoy toon nipasen a matonung ed arap na Dios diad panamegley na Ganggan; ta ibabaga niy Masanton Sulat, Mambilay diad panamegley na pananisia so toon apirdona ray kasalanan to.

¹²Balet ag onsasaral so Ganggan ed pananisia, ta ibabagay Masanton Sulat, Say toon ononur ed ibabagay Ganggan mambilay ed panamegley to.

¹³Dinondon to itayo nen Cristo manlapud samban iter na Ganggan nen sikatoy adusa a singa sakey ya nisamba para sikatayo; ta ibabagay Masanton Sulat, Nisamba na Dios so siopaman a nibitin ed kiew.

¹⁴Dinondon to itayo pian say bindision ya insipay Dios ed kinen Abraham et nagamuran da ray Hintil diad panamegley nen Cristo Jesus, tan nagamuran tayo diad panamegley na pananisia so Ispiritu ya insipay Dios.

¹⁵Agagi, ikanak so alimbawan kabkabat na karaklan a totoo. No pinirmaan lay sakey a sipanan, anggapo lay makaderal ed satan a sipanan, tan ag met la nayarin aruman so insulat.

¹⁶Natan, wala ray sipay Dios ed kinen Abraham tan say apo to. Ag ibabagay Masanton Sulat, tan saray apo to. A say labay ton ibaga et amayamay, no ag ingen tan say apo to, a say labay ton ibaga et saksakey tan si Cristo ya.

¹⁷Sayay labay kon ibaga: pinaletay Dios so sakey a sipanan tan insipan to a sumpalen. Saman a sipanan et ag nayarin deraley Ganggan a sinmabi kalabas na apat a lasus tan talomplon taon, tan ag to naekalay kakanaan so sipay Dios.

¹⁸No niiter so tawir lapud Ganggan, aliwa sirin a lapud sipan. Balet lapud insipay Dios, inter toy tawir ed kinen Abraham.

¹⁹Akin et niiter so Ganggan sirin? Niarum so Ganggan pian nipanengneng no antoy kabaliksay isumlang ed ganggan, anggad onsabiy angisipanan, a salanti say apo nen Abraham. Niiter yan Ganggan diad panamegley na saray anghil, tan tinulongan iray sakey a manamegley.

²⁰Balet say bukbukor to ag mankaukolay manamegley; et saksakey so Dios.

²¹Labay to yan ibaga kasi a say Ganggan et sumlang ed saray sipay Dios? Andi! Ta no niiter so sakey a ganggan a makapangiter na bilay ed katoowan, say too sirin magmaliw a matonung ed arap na Dios diad panamegley na ganggan.

²²Balet ibabagay Masanton Sulat ya amin a katoowan et aripen iray kasalanan, pian diad ontan diad panamegley na pananisiad Jeesu-Cristo et niiter ed saray mananisia so sipay Dios.

²³Kasakbayay insabi na panaon na pananisia, sikatayoy aripen ni na Ganggan, anggad nipaamta yan pananisia.

²⁴Kanyan say Ganggan so bumabangat tayo ya anggad insabi nen Cristo, tan diad ontan nipasen itayon matonung ed arap na Dios diad panamegley na pananisia.

²⁵Natan ta panaon lay pananisia, anggapo tayo lad panangasikasoy bumabangat.

²⁶Diad panamegley na pananisia yod Cristo Jesus, anak kayon amin na Dios.

²⁷Ta amin yon abinyagan ya akikasakey ed Cristo, pinaloob yod bilay yo si Cristo.

²⁸Anggapo la siriy pandomaan da ray Judio tan saray Hintil, saray aripen tan saray aliwan aripen, saray lalaki tan saray bibii; saksakey kin amin diad pikakasakey yod Cristo Jesus.

²⁹No kayaryan kayo nen Cristo, kabyangan ki sirin na saray apo nen Abraham, tan tumatawir kayoy insipay Dios.