Read Pangasinan TAGA GALACIA 5 Bible Online

TAGA GALACIA 5 - Pangasinan bible

TAGA GALACIA 5

¹"Walad sikatayoy kawayangan, ta imbolus itayo nen Cristo! Pansiansia yon malet sirin yan kipapasen yo, tan ag kayo papaaripen lamet.

²"Dengel kayo! Siak, a si Pablo, so mangibabagad sikayo: no tandaan kayoy segat, si Cristo anggapoy kakanaan tod sikayo.

³"Pasakbayan ko lamet so balang sakey a mampasegat a nakaukolan ya onuren toy intiron Ganggan.

⁴"Sikayon mampipilalek a magmaliw a matonung ed arap na Dios diad panamegley na panangonur ed Ganggan et nisian kayod Cristo tan wala kayod paway na baleg a panangaroy Dios.

⁵"Balet maniilalo kamid pananulong na pakayariy Ispiritu na Dios, a sikamiy napatonung ed arap na Dios diad panamegley na pananisia.

⁶"Ta diad saray mikakasakey ed Cristo Jesus, anggapo lay kakanaan na pampasegat o ag pampasegat. Say manona et say pananisian nanengneng a mankikimey lapud aro.

⁷"Maung la man komuy gagawaen yo! Siopay amantondad sikayo ed pangoonur yod katwaan?

⁸"Ag nayarin say Dios ya anawag ed sikayo so amatonda.

⁹"Onung na kuanda, Napaalsa na daiset a libadura so intiron masa.

¹⁰Lapud pikakasakey tid Katawan, maniilalo ak ya ag mangomay kanunotan yo nipaakar ed saya, tan maniilalo ak met a dusaen na Dios so anggan siopa a toon manggugunigon ed sikayo.

¹¹Agagi, no tuan ipupulong ko nin nakaukolay pampasegat, akin et napapasegsegang ak ni? No tua tan, ag la komun katiroran so ipupulong kon nipaakar ed krus nen Cristo.

¹²Ag labat komun pasegat ira tay manggugunigon ed sikayo, no ag ta pakapun la ra laingen.

¹³Agagi, atawag kayon magmaliw a bolus. Balet ag yo ibabaraay inkabolus yo ed pangonur yod saray liket na laman. Mantutulongan kayo ingen lapud aro.

¹⁴Ta natitibokel so amin a Ganggan ed saksakey a ganggan: Arom so kaparam a too a singa panangarom ed sikan dili.

¹⁵Balet no singa kayo ayayep a mankeketketan tan mampapasakitan, manalwar kayo ta ompan naoput kayo.

¹⁶Saya so ibabagak ed sikayo: abuloyan yoy Ispiritu Santo a mangiwanwan na bilay yo, tan ag yo oonuren iray liket na inkatoo.

¹⁷Ta saray liket na inkatoo et sumlang ed linaway Ispiritu Santo tan say linaway Ispiritu Santo et sumlang ed saray liket na inkatoo. Mansusumlangan ira yan dua, kanyan ag yo nagawaan so labay yon gawaen.

¹⁸No iwawanwan kayoy Ispiritu Santo, andi ki lad silong na Ganggan.

¹⁹Malinlinew iray gawa na inkatoo: inmoralidad, marotak a kabibilay, mabambanday a kagagawa;

²⁰panangigalang ed saray talintaoy diriyos, panaganito, pambobosulan, panlalaban, paniimonan, pampepetangay olo, pantatalonaan, pambabalingaan tan pansisiblangay grupo ed sakey a grupo,

²¹panagibeg, panagbuanges, alablabas a panagliket, tan arum ni ran singa saraya. Papasakbayan ta ki lamet a singa samay inmona: saray manggawad saraya, ag da natawir so Panariay Dios.

²²Balet say bungay Ispiritu et aro, liket, deen, anos, panangasi, kaabigan, katooran,

²³oyamo, tan panagadya. Anggapoy onsumlang a ganggan ed saraya.

²⁴Tan saray kayaryan nen Cristo Jesus et impasak da lad krus so inkatoo ra, pati saray maoges a liknaan tan pilalek to.

²⁵Say Ispiritu so angiter ed sikatayoy bilay, kanyan sikatoy nepeg a mangiwanwan ed bilay tayo.

²⁶Ag tayo nepeg so mampasirayew, mankokolkol, odino maniimonan.