Read Pangasinan TAGA-EFESO 4 Bible Online

TAGA-EFESO 4 - Pangasinan bible

TAGA-EFESO 4

¹"Kanyan siak, sakey a priso lapud panlilingkur kod Katawan, kekerewen kod sikayo a mambilay kayo onung ed manepeg ya anawagay Dios ed sikayo.

²"Lawas maoyamo, mapaabeba, tan maanos kayo komun. Ipanengneng yoy panangaro yo diad pantetepelan yo.

³"Gawa yoy anggaay nayarian yo a pansiansiaey pankakasakey a manlalapud Ispiritu, diad panamegley na kareenan a mamapasakey ed sikayo.

⁴"Walay saksakey a laman tan saksakey ya Ispiritu; ontan met a walay saksakey ya ilalon anawagay Dios ed sikayo.

⁵"Walay saksakey a Katawan, saksakey a pananisia, tan saksakey a binyag;

⁶"walay saksakey a Dios tan Ama na amin a katoowan. Sikatoy Katawan na amin, mankikimey ed amin, tan walad amin.

⁷"Balang sakey ed sikatayo naitday nidoma-doman langkap, onung ed sukat na panangaron inter nen Cristo.

⁸"Onung na ibabagay Masanton Sulat, Nen inmatagey ed katagtageyan angawit na saray priso; tan angiter na langkap ed katoowan.

⁹"Antoy labay ya ibagay inmatagey? Say labay ton ibaga, inmabeban inmona ya anggad dalem na dalin.

¹⁰Kanyan samay inmabeba et sikato lamlamang imay inmatagey ed labas na katawenan, pian napanayaman toy amiamin a bengatla.

¹¹Sikatoy angiter na langkap ed saray totoo; wala ray tinoro ton magmaliw ya apostol, saray arum propita, saray arum ibanghilista, saray arum pastor tan bumabangat.

¹²Ginawa to ya a pangiparaan tod amin a totooy Dios ed panlingkur da, pian ombolaslas so iglisia, say laman nen Cristo.

¹³Diad ontan, makapankakasakey itayon amin ed pananisia tan pakapikabat ed Anak na Dios, tan ontakken itiayo ya anggad pakapipara tid inkayadyari nen Cristo.

¹⁴Aliwa itayo lad satan a singa saray ogogaw a mainomay a natanggoyur na anggan anton bangata singa paraw ya iyaanur na daluyon tan ipapalig na dagem. Ag itayo la napalikdo na saray totoon masilib a mamalikdo tan mangibalang.

¹⁵Ingen, diad panamegley na pansalita tiy katwaan diad ngaray aro, magmaliw itayon nagnap ed Cristo a sikatoy pangulo.

¹⁶Lapud panangitonton to, maokoksuy ya amin iray kabyangay laman, tan say intiron laman et impampepeketan na saray langolangowan. No balang kabyangay laman et mankikimey onung ed kanepegan ton gawaen, ombaleg tan ombiskeg so intiron laman diad panamegley na aro.

¹⁷Diad ngaray Katawan sirin, ibabagak tan ipupurek kod sikayo: ag ki la mambibilay a singa saray Hintil, ya andikakanaay kanunotan da

¹⁸tan ambilonget so pakatalus da. Anggapoy pinanabang dad bilay ya iiter na Dios, lapud anggapoy amta ra tan anawet so puso ra.

¹⁹Anggapo lan balut so kababaingan da, saray bisio so lanang ya aarapen da, tan anggapoy adya ran manggagaway amin a mabanday iran bengatla.

²⁰Aliwan ontan so inaral yod Cristo,

²¹no tuan nadngel yoy nipaakar ed sikato tan inaral yoy katwaan a walad kinen Jesus.

²²Ibeneg yo lay gendat a panagbilay yo. Paolyan yo lay daan ya inkatoo yo a nadedaral lapud saray maoges a pilalek.

²³Nepeg a naoman lay kanunotan tan getma yo.

²⁴Nepeg yon isolung so balon inkatoo, a pinalsan kaparparay Dios, tan nipanengneng diad tuan panagbilay a masanto tan matonung.

²⁵Kanyan ag ki la mantitila, no ag ingen salita yoy katwaan ed agagi yo, ta kabyangan itayon amin na saksakey a laman.

²⁶No mampasnuk kayo, paliisan yoy pakapankasalanan yo, tan ag kayo mamapasnuk a sanagew.

²⁷Ag kayo mangiiter na pankanawnawad kinen Diablo.

²⁸Say toon matakew nakaukolan ya ag la mantakew, no ag ta mankimey la na anggan anton aliwan mabanday a kimey, pian makatulong ed saray mairap-bilay.

²⁹Ag kayo mansasalitay maoges. Nepeg a makatulong so pananalita yo, makapabiskeg, tan makapangiter na nakaukolan, pian napinabangan na saray ondengel.

³⁰Ag yo papaermenen so Ispiritu Santo na Dios, ta sikatoy tanda na pankayaryay Dios ed sikayo; sakey met a kaletan na pakarondon yo no onsabiy niganan Agew.

³¹Ekal yo lad bilay yoy sakit na linawa, alabas a pasnuk tan bosul. Ag ki la maneeyagan, mampapaogesan, o maniirapay linawa.

³²Ingen, mankakasiyan tan manaarowan kayo tan mampipirdonaan kayo, a singa impamirdonay Dios ed sikayo diad panamegley nen Cristo.