Read Pangasinan HUIS 10 Bible Online

HUIS 10 - Pangasinan bible

HUIS 10

¹"Kayariy impatey nen Abimelec si Tola a lakin anak nen Pua tan apo nen Dodo et sinmalat ya angyagel ed Israel. Sikatoy kabyangan na tribu nen Isacar tan nanayam ed Samir diad kapokdulan na Efraim.

²"Duamplo tan taloy taon a sikatoy pangulo na Israel. Insan inatey tan nipompon ed Samir.

³"Kayari nen Tola sinmalat si Jair a taga Galaad. Impangulo ton duamplo tan duay taon so Israel.

⁴"Walay talomplon lalakin anak to a talomplon asnoy loganan da. Walay talomplon siudad da ed dalin na Galaad, a natatawag ni ra na saray bario nen Jair.

⁵"Inatey si Jair tan nipompon ed Kamon.

⁶"Nankasalanan lamet ed Katawan iray Israelita diad impangigagalang dad saray Baal tan diad saray Astarot, ontan met ed saray diriyos na Siria, Sidon, Moab, tan Filistia. Inkaindan day Katawan tan tinondaan day angigalang ed sikato.

⁷"Kanyan akapasnuk so Katawan ed saray Israelita, tan inabuloyan ton nadakep ira na saray Filisteo tan saray Ammonita.

⁸"Labinwaloy taon a pinapairap tan pinapasegsegang da ray amin ya Israelitan manaayam ed bansa na saray Amorreo diad bokig na Ilog na Jordan diad Galaad.

⁹"Binaliw met na saray Amorreo so Jordan, ta nilabanan da ray tribu di Juda, Benjamin, tan Efraim. Mapalaloy inkairapan na Israel.

¹⁰Insan tinmawag ed Katawan iray Israelita tan inkuanda, Nankasalanan kamid sika, ta inkaindan mi ka, O Dios mi, insan kami angigagalang ed saray Baal.

¹¹Saya so ebat na Katawan ed sikara: Pinapairap kayo nen saman na saray Egipsio, saray Amorreo, saray Ammonita, saray Filisteo,

¹²saray Sidonia, saray Amalecita, tan saray Maonita, insan kayo tinmawag ed siak. Ag ta kayo ta inliktar ed sikara?

¹³Balet inkaindan yo ak nin siansia tan angigagalang kayod saray arum a diriyos, kanyan ag ta kayo la iliktar.

¹⁴Laka yon ontawag ed saray diriyos a pinili yo. Paiyagel kayod sikara no wala kayod gunigon.

¹⁵Balet saray totood Israel kuandad Katawan, Nankasalanan kami. Gawam so labay mon gawaen, balet iliktar mo kami pa natan.

¹⁶Kanyan imbabantak da ray kayaryan dan diriyos na arum a bansa, tan inggalang da lay Katawan; et agunigon so Katawan lapud kakairapan na saray Israelita.

¹⁷Insan namparaan a mibakal iray Ammonita tan nankampo rad Galaad. Nantitipon iray lalaki ed Israel tan nankampo ra ed Mizpa na Galaad.

¹⁸Nantetepetan iray totood man tan saray pangulo na saray tribu na Israel, Siopay mangipangulod sayan pibakal tayod saray Ammonita? Siopamay mangipangulo sikatoy magmaliw a pangulo na amin a totood Galaad.