Read Pangasinan HUIS 12 Bible Online

HUIS 12 - Pangasinan bible

HUIS 12

¹"Namparaan a mibakal iray totoo nen Efraim; binaliw day Jordan tan linma rad Zafon tan kuandad Jefte, Akin et binaliw moy ketegan diad impibakal mod saray Ammonita ya ag mo kami tinawag ya akilad sika? Poolan miy abung mo legan a wala kad dalem to!

²"Balet inkuanen Jefte ed sikara, Siak tan saray totook et mapalaloy impikolkol mid saray Ammonita. Tinawag ta kayo, balet ag yo ak labay ya iyagel ed sikara.

³"Nen anengneng kon ag yo ak iyagel, impostak so bilay ko tan binaliw koy ketegan a mibakal ed sikara, et impanalo ak na Katawan ed sikara. Akin sirin et onla kayo dia natan a mibakal ed siak?

⁴"Insan impantitipon nen Jefte ya amin iray lalakid Galaad, nilabanan da ray lalaki ed Efraim tan tinalo da ra. (Imbaga na saray lalakid Efraim, Sikayo ran taga Galaad ed Efraim tan Manases, tinaynanan yod Efraim!)

⁵"Pian ag makabatik iray taga Efraim, dinakep na saray taga Galaad iray pasen a babaliwan ed Ilog na Jordan. Siopaman a toon taga Efraim a labay toy ombaliw tan onkerew na abuloy et tepetan na saray Galaad, Taga ka Efraim? No Andi, kuanto,

⁶"paibalikas dad sikatoy Shibolet. Balet say ibalikas to Sibolet, ta tuan ag da nayarian ya ibalikas na duga. Singkaten dad satan tan pateyen dad man ed sakey ed saray babaliwan ed Ilog na Jordan. Diad saman a panaon apataplo tan duan libon taga Efraim so apatey.

⁷"Anem taon ya impangulo nen Jefte so Israel. Insan inatey tan nipompon ed baley ton Galaad.

⁸"Kayari nen Jefte, si Ibzan, a taga Betlehem so sinmalat ya angipangulo ed Israel.

⁹"Talomplon lalaki tan talomplon bibii iray anak to. Impiasawa to ra may anak ton bibii ed saray kabyangan na arum a boleg tan impangasawa to ra may anak ton lalaki ed saray arum a boleg. Pitoy taon ya impangulo nen Ibzan so Israel,

¹⁰insan inatey tan nipompon ed Betlehem.

¹¹Kayari nen Ibzan, si Elon a taga Zabulon so angipangulod Israel a samploy taon.

¹²Insan inatey tan nipompon ed Ayalon a sakop na dalin na Zabulon.

¹³Kayari nen Elon, si Abdon a lakin anak nen Hilel tan taga Piraton so angipangulod Israel.

¹⁴Apataploy anak ton lalaki tan talomploy apo ton lalaki; pitomplon asnoy loganan da. Waloy taon ya impangulo nen Abdon so Israel,

¹⁵insan inatey tan nipompon ed Piraton a sakop na dalin na Efraim diad kapokdulan a bansa da ray Amalecita.