Read Pangasinan HUIS 14 Bible Online

HUIS 14 - Pangasinan bible

HUIS 14

¹"Aminsan ya agew linmad Timna si Samson tan akanengneng diman na sakey a biin Filistia.

²"Sinmempet tan inkuantod kinen ama tan ina to, Walay sakey a Filistian bii diad Timna ya akasagyat na imanok. Ala yo pa, ta labay kon asawaen.

³"Balet tinepet ed sikato di ama tan ina to, Akin et kalkalmom a dimay pangalaan moy asawaen mo ed saraman a paganon Filisteo? Ag ka ta makalmoy bii ed boleg tayo, diad saray kadalaan tayo? Balet inkuanen Samson ed kinen ama to, Sikato so labay kon alaen yo a para siak. Sikatoy naibegan ko.

⁴"Ag amta na saramay ateng nen Samson a say Katawan so mangiwawanwan ed sikato ed sayan gagawaen to, ta say Katawan et manaanap na pankanawnawan nalabanan to ray Filisteo. Diad sayan panaon ooleyan na saray Filisteo so Israel.

⁵"Kanyan linmad Timna si Samson, pati si ama tan ina to. Nen ondadalan irad man ed sakey a kaubasan, nadngel nen Samson so mangwam a malangwer a lion.

⁶"Kabebekta pinabiskeg na ispiritu na Katawan si Samson, et diad panamegley na saray lima to biningbingkas to may lion a singa labat nambibingkas na kilaw na kanding. Balet ag to imbagad saramay ateng to so ginawa to.

⁷"Linma ya akitongtong ed samay bii, et agustoan to.

⁸"Kalabas na pigaran agew amawil si Samson, ta asawaen to. Nen walad dalan pinmaliis tan ninengneng to may lion a pinatey to, et nikelawan ta anengneng toy obung na bayaung tan pigaran dilo ed dalem na laman na samay inatey a lion.

⁹"Kinopkop to may dilo tan kinan to legan a manaakar. Insan linmad kindi ama tan ina to tan initdan to ray dilo. Kinan da, balet ag imbaga nen Samson ya inala to may dilo ed laman na inatey a lion.

¹⁰Linmad abung na samay bii si ama to, tan namponsiad man na baleg si Samson. Ogali ya nen saman na saray tobun-balo.

¹¹Nen anengneng na saray Filisteo si Samson, angibaki ra na talomplon tobun-balo ya akiayam ed sikato.

¹²Inkuanen Samson ed sikara, Pabitlaan ta kayo. Mipostaan ak ed sikayo na talomplon pinon linen tan talomplon pampalesan a marakep a kawes. No ag yo nabitla kasakbayan a mansamput so pitoy agew na ponsia, sikayoy mangiter ed siak na talomplon pinon linen tan talomplon pampalesan a marakep a kawes; balet no nabitla yo siak so mangiter ed sikayo. Ibagam itay pabitlam, kuanda. Dengelen mi.

¹⁴Inkuanto, Manlapud manag-akan, pinmaway so bengatlan naakan; Manlapud mabiskeg, pinmaway so bengatlan masamit. Kalabas na taloy agew ag da ni amtay ebat to may pabitla.

¹⁵Diad kumapat ya agew inkuandad samay asawa nen Samson, Palikdom so asawam ya ibaga tod sika so ebat na samay pabitla to. No ag ka, poolan miy abung nen amam legan a wala kad dalem. Sikamiy inimbitaan yon dua, pian natakewan yo kami, anto?

¹⁶Kanyan linmad kinen Samson imay asawa to a manakakis tan kuanto, Ag mo ak inaron tua! Kabosul mo ak! Pinabitlaan mo ray kakaarok, et ag mo ibagad siak so ebat to! Inkuanen Samson, Ag ko anggan imbagad kinen amak tan si inak so ebat. Sika ni ingen so pangibagaan ko?

¹⁷Nanakis imay bii ya anggad kumapiton agew na ponsia. Balet diad kumapiton agew imbaga nen Samson ed kinen asawa to so ebat na samay pabitla, ta sinmawa lad panetepet lan panetepet na asawa to. Insan imbaga na samay asawa to so ebat ed saramay Filisteo.

¹⁸Kanyan diad kumapiton agew kasakbayan ya onloob ed kuarto si Samson, inkuan na saramay lalakin taga siudad, Dinan niy masamit nen say dilo? Dinan niy mabiskeg nen say lion? Inmebat si Samson, No ag yo impambaka so bakak Ag yo naebatay pabitlak.

¹⁹Kabebekta pinabiskeg na ispiritu na Katawan si Samson, et linmad Askelon a dimay amateyan toy talomplon lalaki tan inaala to ray kawes da, insan to ra inter ed saramay akaebat na pabitla to. Kayari to, sinmempet a mapalaloy petang na olo to lapud samay agawa.

²⁰Samay asawa to niiter ed lakin manonan angolup ed sikato nen nankasal.