Read Pangasinan HUIS 20 Bible Online

HUIS 20 - Pangasinan bible

HUIS 20

¹"Amin da ray totood Israel, manlapud Dan diad baybay ya anggad Beer-seba diad abalaten tan manlapud Galaad diad bokig, et inmebat irad tawag a mibakal ira. Nantitipon iran singa saksakey iran laman diad arap na Katawan diad Mizpa.

²"Saray pangulo na amin a tribu na Israel ed wadya ra ed sayan impantitipon na saray totoo na Dios, a say bilang da et asabi toy apat a lasus libon sondalo ya akaispada.

³"Nadngelan na saray totood Benjamin so sayan impantitipon ed Mizpa na amin da ray arum ya Israelita. Tinepet na saray Israelita, Ibagam ed sikami no panoy inkagawa na saman a kaogsan?

⁴"Inmebat imay Levita a pinatey so biin kaamung to, Linma ak ya amalabas na labi ed Gabaa a sakop na dalin na Benjamin; kaibak imay kaamung kon bii.

⁵"Dinmagon mangalad siak iray lalakin tagad man ed Gabaa, kanyan niliktub dad saman a labi so abung a nampunduan mi. Ginetma da ak a pateyen, balet saman lay asawak so pinasoot tan nanliketan da.

⁶"Inalak so bangkay to, tinetegteg ko, insan ko impaiyakar so sakey a tegteg ed balang tribu na Israel. Nanggawa ra man a totoo na maoges tan mabanday a bengatla sumpad sikatayo.

⁷"Israelita tayo dian amin. Antoy nepeg tayon gawaen natan nipaakar ed saya?

⁸"Nambabansag ya inmalagey ira may totoo tan kuanda, Anggapod sikatayoy onsempet, tulda odino abung so panaayaman to.

⁹"Onyay nepeg tayon gawaen: mampapalaran itayo, ta mamili tayo na lalaki ya ondogpad Gabaa.

¹⁰Say kakaplod saray lalakid Israel et sikaray makaoley a maniter na abasto da ray sondalo; saray arum onla ran manusa ed Gabaa lapud sayan mabanday a ginawa ra sumpad Israel.

¹¹Kanyan amin da ray lalaki ed Israel et nantitipon a saksakey so getma rasay idogpa rad baley na Gabaa.

¹²Saray tribu na Israel et angibaki ra na saray totoo ed intiron dalin na tribu na Benjamin a mangikuan, Makapasinagem yan kaogsan a ginawa yo.

¹³Ipalima yod sikami ra man a totoon andi-kakanaan a taga Gabaa, ta pateyen mi ra pian naekal yan kaogsan ed Israel. Balet ag dinengel na saray totood Benjamin ira may arum ya Israelita.

¹⁴Nantitipon ed Gabaa iray totood amin a siudad na Benjamin, ta bakalen da ray arum a totood Israel.

¹⁵Diad saman ya agew duamplo tan anem a libon sondalo a nanlapud saray siudad da so atawag da. Likud ed saraya, anipon iray totood Gabaa na piton lasus a lalakin nidoma-doman pinili; kawigi ra yan sondalo. Nayarian na siopaman ed sikara a bansotan so sakey a buek et nakena ton nakena.

¹⁶

¹⁷Apat a lasus libon impasal a sondalo na Israel so atipon, likud ed saray kabyangay tribu nen Benjamin.

¹⁸Linmad pasen a panangigalangan diad Betel iray Israelita, tan tinepet dad man ed Dios, Dinan a tribu so ononan ondogpad saray Benjaminita? Say Katawan inmebat, Say tribu nen Juda.

¹⁹Kanyan diad ontombuk a kabwasan ginapwan na saray Israelita so nankampo ed pasen ya asingger ed Gabaa.

²⁰Linma ran ondogpad saray sondalo nen Benjamin, kanyan inlira da rad pasen ya akaarap ed siudad iray sondalo.

²¹Pinmaway ed siudad iray sondalo nen Benjamin, et diad saman ya agew akapatey ira na duamplo tan duan libon sondalon Israelita.

²²Insan linmad pasen a panangigalangan iray Israelita tan nanermen irad arap na Katawan ya anggad labi. Tinepet dad sikato, Onla kami lamet a mibakal ed saray agagi min Benjaminita? Inmebat so Katawan, On. Lapud sayan ebat binmiskeg so linawa da ra may Israelita, kanyan inlira ra lamet ed pasen ya angiliraan day sikaran dili nen imbeneg ya agew.

²³

²⁴Pidwa lan onsulong a mibakal iray Israelita sumpad saray Benjaminita.

²⁵Pinmaway ed Gabaa lamet iray Benjaminita, et natan akapatey ira na labinwalon libon sondalon Israelita ya impasal.

²⁶Insan amin da ray Israelita linma rad Betel tan nanermen ira. Nanirung irad man ed arap na Katawan tan ag iran balut angan anggad labi. Angisaklang ira na saray bagat a popoolan tan saray bagat a para kareenaninsaklang da ra yan amin ed arap na Katawan.

²⁷Diad saraman ya agew wadman ed Betel imay Kaban na Sipanan na Dios, tan si Finees a lakin anak nen Eleazar tan apo nen Aaron so makaoley ed samay Kaban. Tinepet na saray totoo ed Katawan, Onla kami lamet a mibakal ed saray agagi min Benjaminita, odino ontonda kami la? Inmebat so Katawan, Mibakal kayo, et nabwas panaloen ta kayod sikara.

²⁸

²⁹Kanyan saray Israelita amaamut irad kaliber-liber na Gabaa na saray pigaran sondalo.

³⁰Diad kumatlo na nantotombukan ya agew sinmulong a mibakal ed saray sondalo na Benjaminita tan inlira da ray sondalo ra ed pasen a sankaarap day Gabaa a singa samay ginagawa da la.

³¹Pinmaway a mibakal ira may Benjaminita, kanyan apaarawi rad siudad. Onung na singa samay ginagawa da la nen inmona, ginapwan dan pinapatey iray Israelita ed maawang ya alog, diad dalan a mamaarap ed Betel tan diad dalan a mamaarap ed Gabaa. Akapatey la ra na sakey a talomplon Israelita.

³²Inkuan na saray Benjaminita, Tinalo ti la ra a singa samay impanalo tayod saray inmonan bakal. Balet implano na saray Israelita ya onsener ira, pian napaarawi da rad siudad tan makakar irad saray dalan.

³³Kanyan nen sinmener so manonan olup na saray sondalon Israelita tan nantitipon irad Baaltamar, biglan pinmaway ed panaamutan dan mabaton-dampay diad kaliber-liber na siudad ira may akapaliber ed Gabaa.

³⁴Samplon libon apili-pilin sondalo na Israel iray dinmogpad Gabaa, et pinasiay agawan bakal. Ag alikas na saray Benjaminita a ngalngali la ra natalo.

³⁵Impanalo na Katawan iray Israelita ed saray sondalo na Benjamin. Diad saman ya agew akapatey iray Israelita na duamplo tan liman libo tan sanlasus a kalaban,

³⁶insan abirbir na saray Benjaminita ya atalo ra. Say manonan olup na saray sondalon Israelita et sinmener irad saray Benjaminita, lapud nanmatalek irad saray lalakin akaamut ed kaliber-liber na Gabaa.

³⁷Masiglat a batik ed Gabaa ira yan lalaki; pinanatan da may siudad tan pinatey day balang tood man.

³⁸Say manonan olup na saray sondalon Israelita tan saramay inmamut et walay nampaknaan dan sakey a tanda. No nanengneng na saray walad bakalan ya Israelita so sakey a makapal ya asewek a manlapud baley,

³⁹ompoliktar ira. Diad sayan bekta akapatey la ra may Benjaminita na talomplon Israelita. Inkuandad sikaran dili, On, tinalo ti la ra a singa samay impanalo tayod saramay inmonan bakal.

⁴⁰Insan pinmaway imay tanda; say makapal ya asewek et ginmapon inmatagey a nanlapud baley. Nikelawan iray Israelita ed anengneng dan kapopoolan na intiron siudad.

⁴¹Insan pinmoliktar ira may Israelita, et atalagnaw ira may Benjaminita lapud abirbir dan ngalngali la ra naoput.

⁴²Sinmener ira tan batik irad maawang a kaalogan, balet ag ira makabatik. Aseldet irad pegley na samay manonan olup na saray sondalon Israelita tan saramay ompapaway lan manlapud siudad, kanyan apatey ira.

⁴³Apatitan na saramay Israelita ira may kalaban da; ag da ra tinondaan ya inosilan ya anggad sakey a pasen ed bokig na Gabaa. Pinapatey da ra legan da ran inosilan.

⁴⁴Labinwalon libon sankaabigan a Benjaminitan sondalo so apatey.

⁴⁵Amoliktar iray arum ed sikara tan batik iran amaarap ed kaalogan ya anggad Baton-dampay na Rimmon. Liman libo ed sikara so apatey ed saray dalan. Intuloy na saray Israelita ya inosilan ya anggad Gidom iray nakdaan. Akapatey ni ra na duan libo.

⁴⁶Diad saman ya agew duamplo tan liman libon Benjaminitan iray apateymasebeg iran amin a sondalo.

⁴⁷Balet anem a lasus a lalaki so akabatik ya anggad maawang ya alog tan akakar ira ed baleg a Baton-dampay na Rimmon. Nanayam irad man ya apat bulan.

⁴⁸Pinawil na saramay Israelita iray akeraan a Benjaminita tan pinapatey da ran aminlalaki, bibii, ogogaw, tan pati saray ayayep. Pinoolan day amin a baley ed saman a dalin.