Read Pangasinan HUIS 8 Bible Online

HUIS 8 - Pangasinan bible

HUIS 8

¹"Insan inkuan na saray lalakid Efraim ed kinen Gedeon, Akin et ag mo kami tinawag nen linma kayon akibakal ed saray Madianita? Akin et onyay impangipasen mod sikami? Ampetang so olo ran nanriklamo lapud saya.

²"Balet inkuantod sikara, Say agawaan ko et ag nayarin ipara ed ginawa yo. Say anggan melag ya agawaan yo, sikayon lalaki ed Efraim, et maung ni nen say agawaan na amin a kabyangan na boleg ko.

³"Inyabuloy na Dios a lapud pakayari to, apatey yoy duaran pangulo na Madianita a di Oreb tan Zeeb. Antoy agawaan ko a nayarin ipara ed saman? Nen imbaga to ya, kinmepa so pasnuk da.

⁴"Diad sayan oras abaliw la nen Gedeon tan saramay talon lasus a totoo to so Ilog na Jordan. Makapkapoy la ra, balet oosilan da ni ray kalaban da.

⁵"Kasabi rad Sukot, inkuantod saray totood baley, Itdan yo pay tinapay ira yay totook. Makapkapoy la ra, et oosilan ko ra di Zeba tan Zalmuna ya arari na saray Madianita.

⁶"Balet inkuan na saray pangulo da ray taga Sukot, Akin et itdan mi na nakan iray sondalom? Adakep yo la sirin ira di Zeba tan Zalmuna?

⁷"Inkuanen Gedeon, Sigi sirin! No impadakep lad siak na Katawan ira di Zeba tan Zalmuna, bakbaken ta kayo na masabit a tanaman ed kalawakan.

⁸"Tinmuloy ed Penuel si Gedeon tan akikerew met diman na tinapay ed saray totoo, balet say ebat ed sikara na saray totood man et singa samay ebat na saray totood Sukot.

⁹"Kanyan inkuantod sikara, Ompawil ak a maung so kasumpalan ko; igebak ed satan yan tori!

¹⁰Di Zeba tan Zalmuna tan saray sondalo ra et wala rad Carkor. Diad amin da ray sondalo na saray tribu ed kalawakan, sakey a labinliman libo labat so akeraan; sanlasus tan duamplon libo lay apatey.

¹¹Linmay Gedeon ed dalan a walad samput na kalawakan, diad bokig na Noba tan Jogbea, insan biniglaan ton dinogpaan ira may kalaban da.

¹²Batik ira may duaran arari da ray Madianita, balet inosilan ira nen Gedeon tan adakep to ra; lapud saya agewgew ya amin iray sondalo ra.

¹³Nen ompapawil lan akibakal si Gedeon tan ondadalan ed Dalan na Heres,

¹⁴akadakep na sakey a lakin tobun-balo a taga Sukot tan tinepetan to. Insulat na samay tobun-balo iray kangaranan da ray pitomplo tan piton lalakin manona ed Sukot.

¹⁵Insan linmay Gedeon ed saray lalaki ed Sukot tan kuanto, Nanunotan yo ni may ag yo impanulong ed siak? Imbaga yo ya ag yo naitdan na nakan iray makapkapoy lan sondalok lapud ag ko ni ra adakep di Zeba tan Zalmuna. Et natan, nia la ra!

¹⁶Insan angala na saray masabit a tanaman ed kalawakan tan inkana to ra ed impanusa tod saray pangulo na Sukot.

¹⁷Inggeba to met so tori ed Penuel tan pinapatey to ray lalaki ed saman a siudad.

¹⁸Insan tinepet nen Gedeon ed kindi Zeba tan Zalmuna, Kawalaan da ra may lalakin pinatey yod Tabor? Inmebat ira, Kaparparam irabalang sakey ed sikara et singa ra anak na ari.

¹⁹Inkuanen Gedeon, Agagik ira man, anak ira na dilin inak. Sambaan ko a no ag yo ra komun pinatey, ag ta kayo met pateyen natan.

²⁰Insan inkuantod kinen Joter a sankapangulowanan ya anak ton laki, Patey mo ra! Balet ag binagut na samay ogaw so ispada to. Antakot to ran pateyen, ta ogaw ni.

²¹Insan inkuan di Zeba tan Zalmuna ed kinen Gedeon, Sigi, sika lan dili so mamatey ed sikami. Say tuan laki labat so nepeg a mamatey ed kapara ton lalaki. Kanyan pinatey to ra nen Gedeon, insan to inala ray arkos a palagaygay na beklew da ray kamilyo ra.

²²Kayari to ya, inkuan na saray Israelita ed kinen Gedeon, Sika la so manoley ed sikamisika, insan kayarim onsalat iray kabyangay pamilyam. Inliktar mo kamid saray Madianita.

²³Inmebat si Gedeon, Aliwan siak odino say anak kon laki so manoley ed sikayo. Say Katawan so manoley ed sikayo.

²⁴Balet intuloy ton inkuan, Wala pay kerewen kon sakey a bengatla ed sikayo. Amin yo, iter yod siak iray ikaw ya inaala yo. (Singa saray arum a totood kalawakan, akaikaw na balituk iray Madianita.)

²⁵Inmebat iray totoo, Maliket kamin mangiter ed sika. Angibilkag ira na abel, tan inyan na balang sakey ya Israelita ed samay abel iray ikaw a nala to.

²⁶Sakey a duamplon kilon balituk so nala nen Gedeon, andi bali ni ray dikorasion, saray kolintas, saray ambalangan kawes ya isosolung na saray ararid Madian, tan saray abel ya akabaliber ed beklew na saray kamilyo ra.

²⁷Ginawa nen Gedeon a talintao imay balituk, insan to inyan ed baley ton Ofra. Imbeneg na amin da ray Israelita so Dios tan linma rad man ya angigalang ed samay talintao. Sakey iman a patit ed kinen Gedeon tan say pamilya to.

²⁸Atalo sirin na saray Israelita so Madian tan ag la ra linmaban. Apataploy taon a nanari ed dalin so kareenan ya anggad impatey nen Gedeon.

²⁹Sinmempet si Gedeon ed abung to tan nanayam diman.

³⁰Pitomplon lalaki iray anak to, lapud amayamay so asawa to.

³¹Wala met so sakey ya inamung ton bii ed Sikem; nanananak ed sikato na sakey a laki tan inngaran to na Abimelec.

³²Masikesiken lay Gedeon a lakin anak nen Joas nen inatey tan nipompon ed lobuk nen ama to a Joas, diad Ofra a baley na boleg nen Abiezer.

³³Kayariy impatey nen Gedeon nagmaliw ya aliwan matoor lamet ed Dios iray Israelita tan angigagalang irad saray Baal. Impagmaliw dan dios da so Baal-na-Sipanan.

³⁴Ag da la nilingkuran so Katawan a Dios ya angyagel ed sikara ed saray amin a kalaban dad kaliber-liber da.

³⁵Ag da amtay ombales na maung a linawa ed pamilya nen Gedeon, lapud saray amin a kaabigan a ginagawa to ed Israel.