Read Pangasinan HUIS 9 Bible Online

HUIS 9 - Pangasinan bible

HUIS 9

¹"Si Abimelec a lakin anak nen Gedeon et linmad baley na Sikem a panaayaman na kakanayon nen ina to. Imbaga tod saray kakanayon to

²"a tepeten dad saray totood Sikem, Antoy labay yo? Say panoley ed sikayo na saray pitomplon lalakin anak nen Gedeon odino say panoley na sakey labat a too? Nepeg yon nunoten a kadalaan yoy Abimelec.

³"Saray kakanayon na ina nen Abimelec et sinalita da ed saray totood Sikem so nipaakar ed samay patetepet nen Abimelec. Pinakna na saray totood Sikem ya ontombuk irad kinen Abimelec, lapud kanayon da.

⁴"Initdan da na pitomplon pilak a kuartan nanlapud timplo nen Baal-na-Sipanan. Impangupa to may kuarta na sakey ya olup na totoon maoges, pian miolup irad sikato.

⁵"Linmad abung nen ama to ed baley na Ofra tan diad tapew na sakey a bato, pinatey to ra may pitomplon agagi ton lalaki ya anak nen Gedeon. Balet akaamut si Jotam a sankayogtanan ya anak nen Gedeon, kanyan ag apatey.

⁶"Insan nagtitipon ya amin iray totood Sikem tan Bet-millo tan linma rad masanton kiew a robli ed Sikem, tan diman da impagmaliw ya ari si Abimelec.

⁷"Nen nadngelan nen Jotam so nipaakar ed saya, linman nanalagey ed toktok na Palandey na Gerizim tan kinulyaotan to ra, Dengel kayod siak, sikayo ran totood Sikem, ta ompan dengelen kayo na Dios!

⁸"Aminsan ya agew, saray kiew linma ran mamili na manarid sikara. Inkuandad kiew ya oliba, Sika la so ari mi.

⁹"Inmebat imay oliba, Pian naoleyan ta kayo, nepeg kon itonda so pangiiter ko na larak ya ikakanan pamagalang ed saray diriyos tan saray totoo.

¹⁰Insan saramay kiew inkuandad sengeg na igos, Gala, ta sika la so ari mi.

¹¹Balet inmebat imay igos, Pian naoleyan ta kayo, nepeg kon itonda so pangiiter ko na saray masasamit a bunga.

¹²Kanyan saramay kiew inkuandad sengeg na ubas, Gala, ta sika la so ari mi.

¹³Balet inmebet imay ubas, Pian naoleyan ta kayo, nepeg kon itonda so pangiiter koy alak a mamapaliket ed saray diriyos tan saray totoo.

¹⁴Kanyan amin da ra may kiew inkuandad masabit ya abeban kiew. Gala, ta sika la so ari mi.

¹⁵Inmebat imay masabit ya abeban kiew, No tuan labay yon pagmaliwen ak ya ari yo, gali dia sirin ta sirum kayod silong ko. No ag kayo, ompugsoy manliub ya apoy a manlapud saray masabit a sangak tan poolan to ray kiew a sidro ed Libano.

¹⁶Natan sirin, kuanen Jotam ya intuloy, malinis kasiy konsinsia yo tan anggapoy duaruwa yo nen impagmaliw yon ari si Abimelec? Pinagalangan yo kasiy pakanudnotan ed amak a Gedeon tan marakep kasiy ginawa yod pamilya ra onung ed kanepegan ya itumang ed saramay ginagawa ra?

¹⁷Nepeg yon nunoten ya akibakal si amak lapud sikayo. Imposta toy bilay to, pian niliktar to kayod saray Madianita.

¹⁸Balet natan aliwa kayon matoor ed pamilya nen amak. Pinatey yod tapew na sakey a bato ira may pitomplon lalaki ya anak to. Et lapud kanayon yo si Abimelec ya ilalak nen amak ed aripen to, impagmaliw yon ari na Sikem.

¹⁹Natan sirin, no say ginawa yo natan ed kindi amak a Gedeon tan say pamilya ra et makatonungan, manliket kayon miolup ed kinen Abimelec tan panliket yo met a miolup ed sikayo.

²⁰Balet no andi, ompugso komun so manliub ya apoy a manlapud kinen Abimelec tan poolan to ray totood Sikem tan Bet-millo. Ompugso met komun so manliub ya apoy a manlapud Sikem tan Bet-millo tan poolan toy Abimelec.

²¹Lapud antakot nen Jotam si agi ton Abimelec, batik tan nanayam ed Beer.

²²Taloy taon ya inoleyan nen Abimelec so Israel.

²³Insan dineral na Dios so maung a panoolup na saray totood Sikem tan si Abimelec, kanyan nilabanan day Abimelec.

²⁴Agawa ya, pian nabayaran day maoges a ginawa nen Abimelec tan saray totood Sikem ya anogsog ed sikato a mamatey ed saray pitomplon lalakin anak nen Gedeon.

²⁵Saray totood Sikem angipasen ira na saray totoo ed saray toktok na palandey, ta sikaray mananeb ed kinen Abimelec, tan sinasamsaman da ray amin a dinmalan diman. Sayan nagagawa et nibaga ed kinen Abimelec.

²⁶Insan si Gaal a lakin anak nen Ebed et linmad Sikem a kaiba to ray agagi ton lalaki, tan nanmatalek ed sikato iray totoo ed Sikem.

²⁷Linma ran amin ed kaubasan da tan namborbor iray bunga, nanggawa ray alak, tan sinilibraan day sakey a pista. Linma rad timplo na dios da a dimay nanaakanan tan naniinoman da tan nanleglemewan dad kinen Abimelec.

²⁸Inkuanen Gaal, Anto itayon klasin totood Sikem? Akin et manlilingkur itayod kinen Abimelec? Siopa ta man a too a? Anak labat nen Gedeon, anto? Onur-onur ed sikato si Zebul, balet akin et manlilingkur itayod sikato? Nepeg a matoor kayod laki yon Hamor a sengeg na boleg yo!

²⁹Ag la siak so pangulo na sarayan totoo! Paandipaten kod satan si Abimelec! Ibagak ed sikato, Parakel mo ray sondalom, insan gala ta mibakal ka!

³⁰Akapasnuk si Zebul a manoley ed siudad nen nadngelan toy imbaga nen Gaal.

³¹Angibakiy Zebul ed kinen Abimelec a walad Aruma a mangikuan, si Gaal a lakin anak nen Ebed tan saray agagi ton lalaki et linma rad Sikem; ag da ka kono palooben ed siudad.

³²Nepeg sirin tan saray totoom so onla ed kaalogan tan amut kayod man natan ed sayan labi.

³³Nabwas na kabkabwasan no ompapaway so agew, biglaan yon dogpaan so siudad. Insan no ompaway si Gaal tan saray totoo a milaban ed sikayo, kabil yo ra na anggaay nayarian yo!

³⁴Kanyan si Abimelec tan amin a totoo to et ginmalaw irad labi tan inmamut iran apatiran grupo ed paway na Sikem.

³⁵Nen anengneng nen Abimelec tan saray totoo to si Gaal a pinmaway tan nanalagey ed puirta na siudad, pinmaway irad panaamutan da.

³⁶Anengneng ira nen Gaal tan kuantod Zebul, Nengneng mo! Wala ray totoon onlalasur a manlalapud saray toktok na palandey! Inkuanen Zebul, Aliwa ra man a totoo. Anino ra labat ed kapalandeyan.

³⁷Inkuanen Gaal lamet, Nengneng mo! Wala ray totoon onlalasur a manlalapud alusadsar na palandey tan say sakey a grupo et onsasabi ran manlalapud kiew a robli na saray managparles!

³⁸Insan inkuanen Zebul ed sikato, Kawalaan to natan imay panagsalitam? Ag mo ta tinepet no akin et manlilingkur itayod sayan too a si Abimelec? Sikara man so totoon nileleglemew mo. Paway ka la, ta labanan mo ra.

³⁹Impangulo nen Gaal a pinmaway iray totood Sikem tan nilabanan day Abimelec.

⁴⁰Inosilan nen Abimelec si Gaal, et batik si Gaal. Amayamay iray asugatan, anggan diad puirta na siudad.

⁴¹Nanayam ed Aruma si Abimelec, tan pinataynan nen Zebul ed Sikem si Gaal tan saramay lalakin agagi to, kanyan ag la rad man akapanayam.

⁴²Diad ontombuk ya agew akabatan nen Abimelec ya iplaplano na saray totood Sikem so ompaway ed kaalogan,

⁴³kanyan tinawag to ray totoo to, impankatlo to ran grupo, inmamut irad kaalogan tan nanalagar ira. Nen anengneng ton ompapaway ed siudad iray totoo, pinmaway si Abimelec ed panaamutan to, ta pateyen to ra.

⁴⁴Nen si Abimelec tan say grupo to et ginanatan day sinmulong a mangguardiad puirta na siudad, dinogpaan na saray duaran grupo iray totoo ed kaalogan tan pinapatey da ran amin.

⁴⁵Sanagew so impanlalaban da. Adakep nen Abimelec so siudad, pinapatey to ray totoo to, inggeba to ray paalagey, tan tinabunan to na asin so dalin.

⁴⁶Nen amin da ray manonan totoo a manaayam ed tori na Sikem et akabatan day agawa, inmamut ira ed tirinsira ed timplo nen Baal-na-Sipanan.

⁴⁷Nibagad kinen Abimelec a nantitipon irad man,

⁴⁸kanyan linmad Palandey na Zalmon a pati saray totoo to. Angalay wasay, nambatang na saray sanga, insan to sinakbat. Imbaga tod saray totoo to a ganatan dan aligen so ginawa to.

⁴⁹Kanyan nambabatang na sangay kiew so balang too, insan tinombuk day Abimelec tan imbunton dad sengeg na tori iray kiew. Pinoolan da may kiew legan a walad dalem ira may totoo, et inatey ya amin iray wadmad torisakey a sanlibo ran amin, lalaki tan bibii.

⁵⁰Insan linmad Tebez si Abimelec, nilakub toy siudad, tan dinakep to.

⁵¹Walad may mabiskeg a tori, et batik diman ya amin iray totood siudad, laki may bii, pati saray pangulo. Sinaraan dad may sikaran dili tan linma rad atep.

⁵²Nen sinmabiy Abimelec a dogpaan to may tori, linma ya anggad puirta, ta poolan to may tori.

⁵³Balet walay sakey a biin angipelag na gilingan ed olo nen Abimelec, et apisit so lapis-lapis na olo to.

⁵⁴Insan to tinawag a tampol so tobun-balon umaawit na saray armas to tan kuantod sikato, Bagut moy ispadam, ta patey mo ak. Ag ko labay a nibagan sakey a bii so amatey ed siak. Kanyan dinoyuk na samay tobun-balo si Abimelec, et inatey.

⁵⁵Nen anengneng na saray Israelita ya inatey si Abimelec, sinmempet la ran amin.

⁵⁶Onya so impaningil na Dios ed kinen Abimelec, lapud kaogsan a ginawa tod si ama to diad impamatey tod saramay pitomplon lalakin agagi to.

⁵⁷Impanirap met na Dios iray totood Sikem lapud kaogsan da, onung na impangisambad sikara nen Jotam a lakin anak nen Gedeon.