Read Pangasinan PUYAN 11 Bible Online

PUYAN 11 - Pangasinan bible

PUYAN 11

¹"Kasumpal to ya, naitdan ak na sakey a panagsukat a singa bastun, tan nibagad siak: Alagey ka, tan sukat moy timplo na Dios tan say altar, tan bilang mo ray mangigagalang diman.

²"Balet ag mo la susukaten so kuarton walad paway na timplo, ta niiter lad saray Hintil, a sikaray manggatin-gatin ed Masanton Siudad ed loob na apataplo tan duay bulan.

³"Ibakik so duaran tasik ya akakawes na sako, tan ipulong dan duay salitay Dios ed loob na sanlibo, duan lasus tan anemaplon agew.

⁴"Sarayan duan tasi et saray duaran kiew ya oliba tan duaran lamparaan a manalalagey ed arap na Katawan na mundo.

⁵"No walay manalin mamasakit ed sikara, ompaway ed sangi ra so apoy a mangoput ed saray kalaban da. Diad onya ompatey so siopaman a manalin mamasakit ed sikara.

⁶"Walad sikaray pakayarin mangikaput na tawen, pian ag onoran legan dan ipupulong so salitay Dios. Wala met so pakayari rad saray danum; nayarian da a pagmaliwen iran dala. Wala met so pakayari ran mangiter ed dalin na antokaman a salot, kapag labay da.

⁷"Kasumpal dan mampulong, ompaway so ayep a walad ag natokur ya abut, tan labanan to ra. Taloen tan pateyen to ra,

⁸"tan naonat-onat iray bangkay da ed dalan na baleg a siudad, a dia nipasak ed krus so Katawan da. Sodoma o Egipto so maispiritun ngaran to yan siudad.

⁹"Diad loob na taloy agew tan kapaldua, saray bangkay da nengnengen na saray totoon manlapud amin a katoowan, tribu, salita tan bansa; tan ag da abuloyan a nipompon ira.

¹⁰Manliket ed satan ya amin iray katoowan ed mundo lapud impatey da ra yan dua. Mansilibra ra tan maniiteran iray rigalo, ta sarayan duan propita et ontan lay kairapan ya inter dad katoowan ed tapew na dalin.

¹¹Kalabas na taloy agew tan kapaldua, say ingas na bilay a nanlapud Dios linmoob ed saray bangkay da, insan ira inmalagey. Agaylay inkataktakot da ray akanengneng ed sikara.

¹²Kasumpal to ya, arengel na saramay duaran propita so maksil a bosis a nanlapud tawen ya inkuanto, Segep kayo dia! Sankanengneng iray kalaban da nen tinmagey irad tawen diad sakey a lorem.

¹³Diad saman a bekta, yinmegyeg na maksil. Aderal so kakaplon parti na siudad, tan piton libon totoo so inaatey lapud samay yegyeg. Tinmakot iray totoon atilak a mabilay, tan inggalang day Dios na tawen.

¹⁴Linmabas lay kumadwan makapataktakot a kairapan, balet nengneng mo! Magano lan onsabiy kumatlon makapataktakot a kairapan.

¹⁵Insan sinibuk na kumapiton anghil so trumpita to, tan walay makmaksil iran bosis ed tawen ya inkuanda, Say panoley ed sankamundoan niiter lad Katawan tayo tan diad Cristo to, tan manarin anggad angga!

¹⁶Insan saramay duamplo tan apat a mamatakken a manyodyorung ed saray trono rad arap na Dios, dinmakmomo ra tan inggalang day Dios,

¹⁷tan inkuanda: Katawan a Dios a Makapanyarinamin, Dios natan tan nen saman! Misasalamat kamid sika ta inkanam so baleg a pakayarim, tan ginapwan mo lay manoley!

¹⁸Akapasnuk iray Hintil, ta sinmabi lay panaon na pasnuk mo, say panintinsiam ed saray inaatey, say pangiter moy tumang ed saray propitan managlingkur mo, saray totoom, tan saray totoon walay panangigalang ed sika, atagey man o abebad kipapasen. Sikato ya met so panaon a paneral mod saray mandederal ed dalin!

¹⁹Alokasan ed tawen so timplo na Dios, tan anengneng ed timplo to so kaban a kawalaay sipanan. Insan kinmirmat, dinmalagorug, kinmarul, yinmegyeg, tan inmoray dakerakel a kristal.