Read Pangasinan PUYAN 16 Bible Online

PUYAN 16 - Pangasinan bible

PUYAN 16

¹"Nadngel koy maksil a bosis a nanlapud timplo ya inkuantod saramay pitoran anghil, Laka yo ta ikalbo yo lad mundo ray pitoran yaung a napnoy pasnuk na Dios!

²"Linma la sirin imay onaan ya anghil, tan inkalbo tod mundo so kargay yaung to. Linmesa ray makarimdimla tan ansakisakit a giri ed saray walay marka na samay ayep, tan saray angigalang ed talintao to.

³"Say kumadwan anghil inkalbo tod dayat so kargay yaung to. Nagmaliw so danum a singa dala na inatey a too, tan inaatey ya amin iray pinalsan walad dayat.

⁴"Say kumatlon angil inkalbo tod saray ilog tan sobul so kargay yaung to, et nagmaliw iran dala.

⁵"Nadngel kon inkuay anghil ya inkargadod samay danum, Sikay Masanto, a wala natan tan wala nen saman! Matonung ira yan sintinsiam.

⁶"Pinaagos day dala na saray totooy Dios tan saray propita, kanyan initdan mo ray dala ya inomen da. Kanepegan a nagawad sikara ya!

⁷"Insan nadngel koy bosis a nanlapud altar ya inkuanto, Katawan a Dios a Makapanyarin-amin, talagan matonung tan tua ray sintinsiam!

⁸"Say kumapat ya anghil inkalbo tod agew so kargay yaung to, et naitdan so agew na pakayarin mamool ed saray katoowan diad panamegley na petang to.

⁹"Apoolan iray katoowan, tan inayew day ngaran na Dios a walay pakayari ton mangiter na ontan iran salot. Balet ag ira nampatauli tan ag da inggalang so Dios.

¹⁰Say kumaliman anghil inkalbo tod trono na samay ayep so kargay yaung to. Binmilonget so nanarian to may ayep, tan kineketket na saray totoo so dila ra lapud sakit a liliknaen da.

¹¹Inayew day Dios ed tawen lapud saray sakit tan giri-girin paniirapan da. Anggaman ontan, ag ira nampatauli ed saray maoges a gawgawa ra.

¹²Say kumanem ya anghil inkalbo tod baleg ya Ilog na Eufrates so kargay yaung to. Amagaan imay ilog, pian niparaan so dalanen da ray arin manlapud bokig.

¹³Insan anengneng koy singa ra patang a taloran marorotak ya ispiritu ya ompapaway ed sangi to may dragon, sangi to may ayep, tan sangi na samay tila-tilan propita.

¹⁴Sikara yay ispiritu na dimonyon manggagaway milagro. Lalaen da a tiponen iray arari ed intiron mundo, ta milaban ira no onsabiy baleg ya agew na Dios a Makapanyarin-amin.

¹⁵Dengel kayo! Onsabi ak a singa matakew! Maliket iray abangon tan ag naneekal na kawes da, pian ag ira manakar-akar ya anggapoy akasolung ed laman da, et ag ira nabaingan ed saray totoo!

¹⁶Insan saray ari tinipon ira na saramay ispiritu; diad pasen a tatawagey Armagedon ed salitay Hebreo so impaniponan dad sikara.

¹⁷Samay kumapiton anghil inkalbo tod dagem so kargay yaung to. Walay maksil a bosis a nanlapud trono ed timplo tan inkuanto, Asumpal lan agawa!

¹⁸Kinmirmat, kinmarul, dinmalagorug, tan yinmegyeg na makmaksil. Sikato la yay sankaksilan a yegyeg, nanlapu lad inkapalsay too ed tapew na dalin. Agaylay kasil to!

¹⁹Nankatlon apisag so makapanyarin siudad, tan nagnagba ray amin a siudad ed intiron mundo. Ag akaliktar ed dusay Dios so makapanyarin Babilonia. Anunotan na Dios so Babilonia, tan pinainom to na alak, say alak na ontan lan pasnuk to.

²⁰Naandipat ya amin iray isla tan saray palandey.

²¹Inmoran a nanlapud tawen na ankakabaleg a kristal a mambelat na ngalngalin limamplon kiloy sakey, tan apatpataan iray totoo. Lapud saya, inayew na saray totoo so Dios, ta makapataktakot yan salot!