Read Pangasinan PUYAN 18 Bible Online

PUYAN 18 - Pangasinan bible

PUYAN 18

¹"Kasumpal to ya, anengneng kon onleleksab a nanlapud tawen so sakey ya anghil. Balbaleg so pakayari to tan asindagay intiron mundo lapud liwawa to.

²"Ineyaeyag to, Naplag la! Naplag lay makapanyarin Babilonia! Nagmaliw ya ayaman natan na saray dimonyo, prisowan na saray maoges ya ispiritu, tan obung na amin a klasiy marotak tan makapaingungot a manok.

³"Ta inminom iray amin a katoowan na alak na inmoralidad to. Akikaloguran ed sikato ray arari na dalin, tan minmayaman iray nigosianti lapud ag naperan panagkasalanan to.

⁴"Nadngel kon nanlapud tawen so sakey nin bosis ya inkuanto, Paway kayod sikato, totook, paway kayo! Ag kayo nepeg a mibiang ed saray kasalanan to; ag kayo nepeg a nadusan kaiba to!

⁵"Ta saray kasalanan to totokdulen da lay tawen, tan ag nalingwanay Dios so kaogsan to.

⁶"Gawa yo met ed sikatoy ginawa tod sikayo; bales yo na mamidwad karakel so ginagawa to. Pano yoy kupa to na iinomen a mamidway kinabiskeg to ed samay impainom tod sikayo.

⁷"No kaonungay impanpasirayew tan impakansalanan to na inmoralidad, ontan met so iter yon irap tan ermen ed sikato. Ta naynay ton ibagad sikaton dili: Riyna ak, aliwan balo, a manyod-yorung dia! Ag kon balut nasagmak so ermen!

⁸"Lapud saya, mambabansag ya onsabid sikato iray salot ed loob na sakey agew: sakit, ermen, tan eras. Sikatoy napoolan, ta makapanyari so Katawan a Dios a manintinsiad sikato.

⁹"Samay siudad panermenan tan nangisan na saray ararid tapew na dalin ya akikaloguran tan akiliket ed sikato, leleg dan nenengnengen so asewek na kapopoolan to.

¹⁰Manalagey irad arawi, ta antakot irad paniirap to. Ikuanda, Makapataktakot! Adusa ka, sikan bantug tan makapanyarin siudad na Babilonia ed loob labat na sakey oras!

¹¹Sikatoy panermenan tan nangisan met na saray nigosiantid dalin, ta anggapo lay manaliw na ilalako ra.

¹²Anggapo lay manaliw na saray balituk da, pilak, mabmali ran bato, tan pirlas da; saray abel dan lino, purpura, sida, tan ambalanga; amin a klasiy ambalbalingit a kiew; saray kagawaan a garing, mabmablin kiew, gansa, balatyang, tan marmul;

¹³saray kanila, rikado, insinso, mira, tan pabalingit; saray alak tan larak, arina tan trigo, saray baka tan karniro, kabayo tan karwahi, saray aripen, tan pati say bilay na too.

¹⁴Ikuanda ray nigosiantid sikato, Anggapo la ray maung a bengatlan nampilalekan mo a kayaryanen. Anggapo la ray kayamanan mo tan say gangganam; ag mo la ra napapawil!

¹⁵Ag onasingger iray nigosiantin minmayaman ed saman a siudad, ta antakot irad paniirap to. Manermen tan onangis ira,

¹⁶tan ikuanda: Makapataktakot so agawad sayan makapanyarin siudad! Gendat ya akakawes na lino, abel a purpura tan ambalanga. Gendat met a mangikakanay balituk, mabmabli ran bato, tan pirlas a pampaganggana!

¹⁷Diad loob na sakey oras labat, naandipat ira yan amin a kayamanan! Manalalagey ed arawi iray kapitay barko tan saray pasahiro, saray mariniro tan saray arum a totoon diad dayat so panlalapway pambibilay da,

¹⁸tan ineyag da leleg dan nenengnengen so asewek na kapopoolan to, Anggapo lay arum a miparad sayan makapanyarin siudad!

¹⁹Ininan day dapul so olo ra, mannangnangis tan maerermen ira tan inkuanda, Makapataktakot! Makapasinagem so agawad makapanyarin siudad! Minmayaman ya amin iray walay barko ra, lapud kayamanan to. Balet diad loob na sakey oras, naandipat to yan amin!

²⁰Manliket ka, O tawen, ta aderal la! Manliket kayo, sikayo ran totoon piniliy Dios, sikayo ran apostol, tan sikayo ran propita! Ta sinintinsiaan la na Dios lapud ginagawa tod sikayo!

²¹Insan dinemet na makapanyarin anghil so sakey a baton singa kabaleg na gilingan. Intupak tod dayat, tan inkuanto, Onyay kakasil na kitupak na makapanyarin siudad na Babilonia, tan ag lan balut nanengneng!

²²Ag lan balut narengel ed sika iray togtog na arpa, plauta, tan trumpita! Ag lan balut nanengneng ed sika iray marunong a gumagaway antokaman, tan ag lan balut narengel ed sika ray tanul na gilingan!

²³Ag ka met lan balut naliwawaay anggan anton silewan; ag lan balut narengel ed sika so maliket a bosis da ray mankasal. Ta nagmaliw a makapanyarid mundo iray nigosiantim tan nilokom iray amin a bansa lapud panagsalamangkam!

²⁴Adusay Babilonia, lapud nalmod sikatoy dala na saray propita, saray totooy Dios, tan amin a pinapatey ed tapew na dalin.