Read Pangasinan PUYAN 19 Bible Online

PUYAN 19 - Pangasinan bible

PUYAN 19

¹"Kasumpal to ya, nadngel koy singa maksil a bosis na amayamay a totoo ed tawen ya inkuanda, Igalang yoy Dios! Say kilalaban, kagalangan, tan pakayari kayaryan ira na Dios tayo!

²"Matonung tan tua ray sintinsia to! Dinusa toy makapanyarin marotak a biin mangikakayat na kaogsan ed dalin, lapud pankakasalanan toy inmoralidad. Say Dios dinusa to, lapud impamatey tod saray aripen na Katawan.

³"Inkuanda, Igalang yoy Dios! Mantagey lan mantagey ya anggad angga so asewek na napopoolan a makapanyarin siudad!

⁴"Saramay duamplo tan apat a mamatakken tan saramay apatiran pinalsa a mabilay et dinmakmomo ra tan angigalang irad Dios ya akayorung ed trono, tan inkuanda, Amen! Igalang yoy Dios!

⁵"Insan walay nansalitan nanlapud trono ya inkuanto, Idayew yoy Dios tayo, sikayon amin ya aripen to, sikayon amin a mangigagalang ed sikato, matalonggaring man o andi!

⁶"Kasumpal to ya, nadngel koy singa bosis na amayamay a totoo, a singa ungol na mabiskeg ya onaagos a danum tan dalagorug na karul. Inkuanda, Idayew yoy Dios! Ta Ari so Katawan, say Makapanyarin-amin a Dios tayo!

⁷"Nepeg tayoy manliket atan manggayaga; iter tayoy galang ed sikato! Ta asingger lan mankasal so Kordiro. Say nobia imparaan to lay sikaton dili;

⁸"akakawes lay malinis tan masilesileng a lino. (Say lino sikatoy maung iran gawgawa na totooy Dios.)

⁹"Insan inkuanto may anghil ed siak; Isulat mo: Maliket iray inimbitaan ed ponsiay bansal na Kordiro. Inkuanto ni, Sikara yay tuan salitay Dios.

¹⁰Dinmakmomo ak ed saliyan to a mangigalang ed sikato, balet inkuanto, Aleg! Sakey ak met ya aripen a singa sika tan saray agagim ya amaneknek na katwaan ya impaamta nen Jesus. Say Dios so igalang mo! Ta say katwaan ya impaamta nen Jesus sikatoy ispiritu na propisiya.

¹¹Anengneng kod satay tawen ya alokasan, tan walay kabayon ampoti. Say akakabayo tatawagey Matoor tan Tua; matonung so panintinsia tan pibabakal to.

¹²Singa manliub ya apoy iray mata to, tan amayamay iray koronad olo to. Akasulat ed laman to so ngaran to, balet sikato labat so makaamta na kabaliksan to.

¹³Nitaksaw ed dala so kawes to. Say Salitay Dios so tawag ed sikato.

¹⁴Ontotombuk ed sikato ray dakerakel a sondalo na tawen ya akakawes iray malinis ya ampotin lino, tan akakabayo rad saray ampotin kabayo.

¹⁵Pinmaway so sakey a matdem ya ispada ed sangi to; sayan ispada so panalo tod saray bansa. Oleyan to ra yan bansa diad panamegley na balatyang a bastun, tan manlapud panagpespesay ubas, paagosen toy alak na baleg a pasnuk na Dios a Makapanyarin-amin.

¹⁶Akasulat ed kawes tan ulpo to so ngaran ya, Ari da ray arari, tan Katawan da ray kakatawan.

¹⁷Insan anengneng ko met so anghil ya akaalagey ed agew. Iningal toy makmaksil ed saray manok ya ontitikyab ed liwang: Gali dia, mantitipon kayo para baleg a ponsiay Dios!

¹⁸Gali dia, tan akan yo ray laman da ray arari, saray hiniral, tan saray sondalo, saray laman da ray kabayo tan saray akakabayo, saray laman na amin a katoowanaripen man o andi, abeba man o atagey ed kipapasen!

¹⁹Insan anengneng kon nantitipon imay ayep, saray ararid dalin, tan saray dakerakel a sondalo ra, ta labanan da imay akakabayo tan saray sondalo to.

²⁰Narel imay ayep, pati samay tila-tilan propita a nanggagaway milagro ed arap to imay ayep. (Sarayan milagro so impamalikdo tod saray walay marka na ayep, tan saray angigagalang ed talintaoy ayep.) Samay ayep tan samay tila-tilan propita nibantak iran mabilay ed dayat a manliub ya asupri.

²¹Saray dakerakel a sondalo ra pinatey met na samay ispada a pinmaway ed sangi to may akakabayo; tan nansawa ray manok ya angan ed bangkay da.