Read Pangasinan PUYAN 7 Bible Online

PUYAN 7 - Pangasinan bible

PUYAN 7

¹"Kasumpal to ya, anengneng koy apatiran anghil a manalalagey ed saray apatiran sokung na mundo. Babaraen da ray apatiran dagem na mundo, pian ag onsiplug ed tapew na dalin, o diad dayat, o diad anton kiew.

²"Anengneng ko met ya ontatagey a nanlapud bokig so sananey ya anghil a walad sikatoy timbri na mabilay a Dios. Inkelyaw tod saramay apatiran anghil ya initday Dios na pakayarin manderal na dalin tan dayat,

³"Ag yo ni dederaley dalin, o say dayat, o saray kiew, anggad ag ni amarkaay muling da ray aripen na Dios tayo.

⁴"Insan nibagad siak so bilang da ray amarkaan: sanlasus, apataplo tan apat a libo a nanlapud amin a boleg na saray totood Israel.

⁵"Labinduan libo so nanlapud tribu nen Juda; labinduan libo so nanlapud tribu nen Ruben, labinduan libo so nanlapud tribu nen Gad;

⁶"labinduan libo so nanlapud tribu nen Aser; labinduan libo so nanlapud tribu nen Neftali; labinduan libo so nanlapud tribu nen Manases;

⁷"labinduan libo so nanlapud tribu nen Simeon; labinduan libo so nanlapud tribu nen Levi; labinduan libo so nanlapud tribu nen Isacar;

⁸"labinduan libo so nanlapud tribu nen Zabulon; labinduan libo so nanlapud tribu nen Jose; tan labinduan libo so nanlapud tribu nen Benjamin.

⁹"Kasumpal to ya, anengneng koy balbaleg a dagop na katoowan ya anggapoy makabilang lapud karakel da. Nanlapu rad amin a bansa, tribu, totoo, tan salita. Manalalagey irad arap na trono tan samay Kordiro. Akakawes iray ampoti tan sankabembenan da ray palapa na palma.

¹⁰Ineyag day maksil, Say kilalaban manlalapud Dios tayo ya akayorung ed trono, tan say Kordiro!

¹¹Inmalagey ya amin iray anghil a walad kaliber-liber na trono, saramay mamatakken, tan saramay apatiran mabilay a pinalsa. Dinmakmomo rad arap na trono tan angigalang irad Dios.

¹²Inkuanda, Amen! Anggad angga komun a kayaryay Dios tayo so dayew, galang, kakabatan, pisasalamat, tanduro, pakayari, tan biskeg! Amen!

¹³Tinepet ed siak na sakey ed saramay mamatakken, Siopa ra tay totoon akaampoti, tan iner so nanlapwan da?

¹⁴Ag ko amta, ebat ko. Sikayoy makaamta. Inkuantod siak, Sikara yay totoon akaliktar ed baleg a kairapan. Inorasan tan pinapoti ray kawes da ed dala na Kordiro.

¹⁵Sikato yay makasengeg no akin et wala rad arap na trono na Dios tan agew-labin manlilingkur irad sikato diad timplo to. Samay akayorung ed trono so mangasikasod sikara, diad panamegley na kiwawala to.

¹⁶Ag la ran balut naerasan o naapgaan. Ag met la ra napoolay agew o anggan anton ampetang.

¹⁷Ta samay Kordiron walad pegley na trono so mampastol ed sikara. Iwanwan to rad sobusobul na mabilay a danum, tan ponasey Dios iray amin a lua ed mata ra.