Read Pangasinan RUTH 1 Bible Online

RUTH 1 - Pangasinan bible

RUTH 1

¹"Nen saman a panaon, nen say huis so manooley ed Israel, dinmalan so eras ed intiron bansa. Kanyan walay sakey a lakin taga Betlehem, a sakop na Juda a linman akiayam ed bansa na Moab. Kaiba toy asawa to tan saray duaran anak ton lalaki.

²"Elimelec so ngaran na sayan laki, Noemi so asawa to, tan Mahalon tan Kelion iray anak to. Kabyangan ira na boleg nen Efrata.

³"Inatey si Elimelec legan dan manaayam ed Moab. Atilak sirin si Noemi tan saramay duaran anak to.

⁴"Angasawa ra yan duan anak to na bibiin Moabita: Orpa so ngaran na sakey, tan Ruth so sakey. Kalabas na sakey a samploy taon ed panaayam dad Moab, inatey ira di

⁵"Mahalon tan Kelion. Bukbukor la sirin nen Noemi, ta anggapo la ra may duaran anak ton lalaki tan say asawa to.

⁶"Ag abayag, nadngelan nen Noemi a binindisionan na Katawan iray totoo ton Israelita, ta initdan to ray amayamay a napambilay. Kanyan namparaan a taynan toy Moab, a kaiba to ray manugang to.

⁷"Nanoolup ira sirin ya onla ed Juda, balet nen wala rad dalan

⁸"inkuanen Noemi ed sikara, Pawil ki la, tan miamung ki lad kainaan yo. Maung komuy ipanengneng na Katawan ed sikayo a singa kamaungan ya impanengneng yod siak tan saramay inaatey.

⁹"Iyabuloy komun na Katawan a naasawa ki ni tan nawalaan kayoy abung. Kanyan inanguban ira nen Noemi tan nampatanir ed sikara. Balet inyakiakis da

¹⁰tan kuandad sikato, Andi! Mila kamid sikayo ya onlad saray kakanayon yo.

¹¹Balet inkuanen Noemi, Nakaukolan ya ompawil ki la, anak ko. Akin et labay yoy milad siak? Makapananak ak ta niy lalakin mangasawad sikayo?

¹²Sempet ki la; akolakolaw ak lan miasawa lamet. Anggaman bilang isisipen ko a wala niy ilalok, tan miasawa ak ed sayan labi tan makaanak ak na lalaki,

¹³alagaren yo ni ra kasin ombaleg a mangasawad sikayo? Manebel ya kasi ed piasawa yod arum? Anak ko, ag ya nayarin balut. Impolisay ak na Katawan, kanyan eermenan ta kayon tuloy.

¹⁴Inyakiakis da lamet. Inanguban nen Orpa si katolangan to, insan la amawil ed baley to, balet ag onalis si Ruth.

¹⁵Kanyan inkuanen Noemi ed sikato: Ruth, amawil lay irat mo ed saray kakanayon to tan diad dios to. Mila ka lad sikato.

¹⁶Inmebat si Ruth, Ag yo komun ipapasoot a taynan ta kayo! Iyabuloy yon mila ak ed sikayo. No iner so laen yo, dimay laen ko; no iner so panayaman yo, dimay panayaman ko. Saray kakanayon yo magmaliw a kakanayon ko, tan say Dios yo magmaliw a Dios ko.

¹⁷No iner so pateyan yo, dimay pateyan ko tan dimay pangipomponan ed siak. Dusaen ak a maung komun na Katawan no abuloyan kon pansiyanen itayoy arum a bengatla likud ed patey!

¹⁸Nen anengneng nen Noemi a milan milay Ruth ed sikato, ag la inmesel.

¹⁹Intuloy dan dua sirin so panaakar da ya anggad insabi rad Betlehem. Kasabi rad man, nikelawan ya amin iray ombaley, tan inkuan na saray bibii, Si Noemi!

²⁰Inmebat si Noemi, Ag yo ak tatawagen na Noemi. Tawag yo ak la na Mara, ta say Makapanyarin-amin a Dios et makapasinagem a bilay so inter tod siak.

²¹Nen tinmaynan ak dia dakel so kayamanan ko, balet say Katawan a pinapawil to ak ya anggapon balut so awit ko. Akin et tawagen yo ak ni na Noemi, anta say Makapanyarin-amin a Katawan et dinusa to ak tan initdan to ak na kairapan?

²²Onya sirin so impawil nen Noemi a nanlapud Moab a kaiba toy manugang ton si Ruth a Moabita. Sinmabi rad Betlehem nen kagapoy panagani na sibada.