Read Pangasinan RUTH 2 Bible Online

RUTH 2 - Pangasinan bible

RUTH 2

¹"Si Noemi walay kanayon tod kinen asawa ton si Elimelec, a say ngaran to et Booz. Sayan too et mayaman tan bibirbiren na karaklan.

²"Aminsan ya agew inkuanen Ruth a Moabita ed kinen Noemi, Abuloyan yo ak pan mantortor ed kaalogan. Angangko walay manaanin mangasid siak ya ontombuk ak ed sikato. Inmebat si Noemi, On, anak ko, laka.

³"Kanyan linmay Ruth ed kaalogan tan nantortor a manomtombuk ed saray manaani. Akakar met ed alog nen Booz a kanayon nen Elimelec.

⁴"Ag abayag sinmabiy Booz a nanlapud Betlehem. Inlugay nen Booz iray manaani, Wala komun ed sikayo so Katawan! Inmebat ira may manaani, Bindisionan ka komun na Katawan!

⁵"Tinepet nen Booz ed manonad saray manaani, Anton pamilya so nanlapwan na satan a malangwer a bii?

⁶"Inmebat may laki, Aliwan taga dia tan a bii. Kaiba nen Noemi a nanlapud Moab.

⁷"Kinerew tod siak a tombuken to ray manaani, ta mantortor. Mantotortor nanlapu lad kabkabwasan ya anggad natan. Mampapainawa labat ya agano ed silong na alolung.

⁸"Insan inkuanen Booz ed kinen Ruth, Dengel moy ibagak ed sika. Ag ka la oonlad arum ya alog; dia labat so pantortoran mo. Miolup ka lan mantortor ed saray bibii dia.

⁹"Imanom no iner so panaanian tan ag kad man onaarawi. Binilin ko la ray totook ya ag da ka sigensigenen. No naapgaan ka, lakan oninom ed saray boyug ya anginan day danum.

¹⁰Dinmakmomon anggad dalin si Ruth. Insan tinepet to, Akin et ontan lay panangasi tan panangimanom ed siak, anta aliwa ak a taga dia?

¹¹Inmebat si Booz, Naamtaan kon amin iray ginagawam para katolangan mo nanlapu lad impatey na asawam. Amtak no panoy impanaynan mod saray atateng mo tan say nianakan mon bansa, tan no panoy impiayam mod saray totoon ag mi ni ra apilimugan nen saman.

¹²Tumangan ka komun na Katawan lapud saray ginagawam. Nawalaan ka komuy nagnap a tumang manlapud Katawan a Dios na Israel a nanmatalkan mon mangyagel ed sika!

¹³Inkuanen Ruth, Agaylay abig na linawam ed siak. Pinabiskeg moy linawak lapud maolimek a panagsalitam ed siak, anggaman ya aliwa ak a singa sakey ed saray aripen mo.

¹⁴Diad oras na panangan, inkuanen Booz ed kinen Ruth, Gala la. Mangala kay tinapay tan idelnet mod sawsawan. Kanyan inmirung si Ruth a kaiba to ray kumikimey. Inderewan nen Booz na insanglil a sibada. Angan si Ruth ya anggad napsel et wala niy kera to.

¹⁵Nen linma lan mantortor si Ruth binilin nen Booz iray kumikimey to. Abuloyan yon mantortor ed anggan abay na saray bontun ya inani, tan ag yo babanoen.

¹⁶Mangala kayo ingen na saray dawa ed saray buntun tan itilak yo a dokdoken to. Ag yo pampapasnukan.

¹⁷Kanyan nantortor si Ruth ed alog ya anggad inselek na agew. Nen kayari ton nipaspas, labin duan kilo so nala to.

¹⁸Inala toy ilik, pinmawil ed baley, insan impanengneng tod kinen katolangan to so atortor to. Inter to met so kera tod impangan to.

¹⁹Tinepet nen Noemi ed sikato, Inter so nantortoran mo natan? Siopay akan-alog ed nankimeyan mo? Bindisionan komun na Dios so toon angasi ed sika! Imbaga sirin nen Ruth ed kinen Noemi a nankimey ed alog na sakey a toon manngaray Booz.

²⁰Inkuanen Noemi ed sikato, Si Booz bindisionan komun na Katawan, say Katawan a manusumpal lawas na saray sipan tod saray mabilay tan saray inatey. Intuloy ton inkuan, Saman a too et kanayon tayo ni. Sikatoy sakey ed saray nepeg a manayakop ed sikata.

²¹Insan inkuanen Ruth, Imbaga to ni ingen ed siak a mantortor ak a kaibak iray kumikimey to, anggad kayariy panagani.

²²Inkuanen Noemi ed kinen Ruth, On anak, maung a mankimey kad alog nen Booz a kaibam iray bibiin kumikimey to. Ta no andi, nayarin nasigensigen ka no onla kad alog na arum a too.

²³Kanyan nankimey a kaiba to ra tan akitortor ya anggad kayariy panaganiy trigo tan sibada. Intuloy toy akiamung ed kinen katolangan to.