Read Pangasinan RUTH 3 Bible Online

RUTH 3 - Pangasinan bible

RUTH 3

¹"Insan inkuanen Noemi ed kinen Ruth, Nepeg ya iyanapan ta kay mangasawad sika, pian nawalaan kay dilin abung mo.

²"Natan, tandaan mo a si Booz, a kaibam iray bibiin kumikimey to, et kanayon tayo. Dengel ka. Natad sayan labi mampataep na sibada ed panagilikan.

³"Kanyan manames ka, mampabalingit ka, tan isolung moy sankarakepan a kawes mo. Insan lakad panagilikan, balet ag mo ipapalikas a wadman ka anggad ag ni asumpal ya angan tan inminom.

⁴"Imanom no iner so dokulan to. No naogip la, singgeran mo. Ilokas moy oles to, insan dokul kad saliyan to. Ibaga tod satan no antoy nepeg mon gawaen.

⁵"Inmebat si Ruth, Gawaen koy amin ya imbaga yo.

⁶"Linma sirin si Ruth ed panagilikan tan ginawa toy amin ya imbaga nen katolangan to.

⁷"Nen kayari nen Booz ya angan tan inminom, maliket so liknaan to. Linmad abay na nibontun a sibada tan diman la dinmokul a naogip. Nankalkalnad satan si Ruth a sinmingger ed kinen Booz, inlokas toy oles, insan dinmokul ed saliyan to.

⁸"Nen mamepegley labi la, biglan aliing si Booz, pinmigar, tan nikelawan ed impakanengneng tod biin akarokul ed saliyan to.

⁹"Tinepet to, Siopa ka? Inmebat, Siak si Ruth a mugmon aripen mo. Lapud asingger kan kanayon, nepeg moy manayakop ed siak. Kanyan kerewen kon asawaen mo ak.

¹⁰Inkuanen Booz, Bindisionan ka komuy Katawan. Say gagawaen mo natan et lalon mangipapanengneng na baleg ya inkatoor mod pamilya nen say ginagawam para katolangan mo, bangta ag ka angayat na lakin malangwer a mayaman o mairap-bilay a mangasawad sika.

¹¹Ag ka mapaga, Ruth. Gawaen koy amin a kerewen mo, ta kabat na amin ya ombaley a masimpit kan bii.

¹²Tua ya asingger ak a kanayon mo, tan nepeg ya asikasoen ta ka; balet wala niy sakey a lakin lalon asingger a kanayon mo nen say siak.

¹³Dia ka nin anggad kabwasan, tan kaimbuas nengnengen ta no gawaen toy kanepegan ton manayakup ed sikan kanayon to. No gawaen to, maung; balet no andi, isipan kod mabilay a Katawan, a gawaen koy kanepegan. Dokul ka sirin tan dia kan anggad kabwasan.

¹⁴Kanyan dinmokul ed saliyan nen Booz anggad kabwasan. Lapud ag labay nen Booz a walay makaamta a si Ruth et nanlapud man ed panagilikan, pinabangon to la nen ambilonget ni pian anggapoy makabirbir ed sikato.

¹⁵Inkuanen Booz ed sikato, Ekal mo tay kolibemben mo tan ibilkag mo dia. Ginawa nen Ruth so imbaga nen Booz tan angibales si Booz na duamplo tan duan kilon sibada, insan to impasakbat tod kinen Ruth. Kanyan amawil lay Ruth ed baley.

¹⁶Kasabi tod abung tinepet nen katolangan to, Antoy agawa, anak? Imbaga nen Ruth ya amin iray ginawa nen Booz para sikato.

¹⁷Intuloy to nin inkuan, Imbaga tod siak ya ag ak nepeg ya ompawil a kalima-lima, kanyan inter tod siak yan amin a sibada.

¹⁸Inkuanen Noemi ed sikato, Ag ka mapaga, anak ko, anggad pakanengneng moy pansumpalan to ya. Sumpalen a sumpalen nen Booz yan bengatla diad sayan agew.