Read Pangasinan RUTH 4 Bible Online

RUTH 4 - Pangasinan bible

RUTH 4

¹"Linmay Booz ed pasen a pandadagupay karaklan diad puirtay siudad, tan inmirung diman. Kabebekta, sinmabi may lakin asalita nen Booz ed kinen Ruth, a sikatoy sankaasinggeran a kanayon nen Elimelec. Tinawag nen Booz, Gala dia, kaaro, ta yorung ka. Dinmago tan inmirung.

²"Insan anawag si Booz na samploran pangulo na baley tan kinerew ton onirung met irad man. Nen akayorung la ra,

³"inkuanen Booz ed kanayon to, Natan ta amawil lay Noemi a nanlapud Moab, labay to lan ilakoy alog a kayaryan nen kanayon ta a si Elimelec,

⁴"et inisip ko a nakaukolan ya ipaamtak ed sika. Natan sirin, no labay mon saliwen, saliw mo diad arap da ra yan totoo ya akayorung dia. Balet no ag mo labay, ibagam, ta say ononan nepeg a manaliw et sika, insan siak. Inkuan na samay laki, Saliwen ko.

⁵"Inkuanen Booz, Natan sirin, no saliwen moy alog nen Noemi, nepeg ya asawaen moy Ruth, say balon Moabita, tan nepeg a walay anak yo, pian say alog et mansiansian kayaryan na pamilya na samay andi lad bilay.

⁶"Inkuanto may laki, No ontan, ag ko nagawaay nepeg kon gawaen, ta ompan nadaisetan so tawiren da ray dilin anak ko. Sika lay manggaway nepeg kon gawaen; nayarian mo lan saliwen so alog.

⁷"Saray Israelita et wala nen saman so ogali ran pangipanengneng ya asumpal lay saliwan odino salatan: say angilako ekalen toy sandalya to, insan to iter ed angaliw. Onya so ogali da ray Israelita diad pangipanengneng dan asumpal lay tongtongan.

⁸"Kanyan kapangibaga to may too ed kinen Booz, Nayarian mo lan saliwen so alog, inekal toy sandalya to, tan inter tod kinen Booz.

⁹"Insan inkuanen Booz ed saramay panguloy baley tan saray arum a totood man, Sikayo ray tasi natan ya asaliw ko lad kinen Noemi iray amin a kayaryan nen Elimelec a tinawir di Kelion tan Mahalon.

¹⁰Sakey ni, magmaliw lan asawak so balo nen Mahalon a si Ruth a Moabita. Lapud saya, mansiansiay alog ed pamilya nen Mahalon, tan mansiansia so ngaray pamilya to ed saray kakanayon to tan diad baley ton nianakan. Sikayo natan iray tasi ed saya.

¹¹Inkuan da ra may pangulo tan saray arum, On, sikami ray tasi. Sayan malangwer a bii ya iyamung mo et gawaen komun na Katawan a singa di Raquel tan Lea, a nananak iray amayamay ed kinen Jacob. Onyaman ka komun ed saray kabyangay boleg nen Efrata, tan magmaliw ka komun a bantug ed Betlehem.

¹²Saray anak ya iter na Katawan diad panamegley na sayan bii et gawaen da komun so pamilyam a singa pamilya nen Fares, say anak di Juda tan si Tamar.

¹³Kanyan inasawa nen Booz si Ruth, insempet to insan to inakdulan. Insan inyabuloy na Katawan a manlokun tan nananak na sakey a laki.

¹⁴Inkuan na saray bibii ed kinen Noemi. Nagalang komun so Katawan! Inyabuloy natan na Katawan a nawalaan kay apo a manasikasod sika. Magmaliw komun a bantug yan ogaw ed Israel!

¹⁵Inaro ka na manugang mo, tan dakel niy ginawa ton maabig para sika nen saray pitoran anak a lalaki. Et natan initdan to kay apo a mangiter ed sikay balon biskeg tan mangasikasod sika diad inkaakolaw mo.

¹⁶Inala nen Noemi may ogaw, inampopo to, tan kinokomisan to.

¹⁷Saray bibiin kakaabay nen Noemi et nginaranan da may ogaw na Obed. Inkuanda, Awalaan natan na apo si Noemi! Si Obed so ama nen Jesse, tan si Jesse so ama nen David.

¹⁸Sikara yay pamilyan manlapud kinen Fares ya anggad kinen David: Fares, Hezron, Ram, Aminadab, Naason, Salmon, Booz, Obed, Jesse, David.