Read Pangasinan 1 SAMUEL 13 Bible Online

1 SAMUEL 13 - Pangasinan bible

1 SAMUEL 13

²"Amili si Saul na talon libon lalakin taga Israel: say duan libo kaiba to ra diad Micmas tan diad nipokdul a dalin na Betel, tan say sanlibo kaiba ra nen Jonatan diad Gabaa, diad dalin a sakop na tribu nen Benjamin. Pinasempet la nen Saul iray arum a lalaki.

³"Pinatey nen Jonatan so pangulo na saray sondalo na Filistia a walad Geba, tan amin da ray Filisteo et nadngelan da yan agawa. Insan angibakiy Saul na saray managtrumpita tan linma ran nampapaknul na trumpita diad intiron bansa. Say kabaliksan to ya say panawag tod saray Hebreo a mibakal.

⁴"Abalitaan na amin ya Israelita a pinatey nen Saul so pangulo na saray sondalo na Filistia tan kabosul iray Filisteo. Kanyan diad impakadngel na saray totoo ed tawag, akitipon irad kinen Saul diad Gilgal.

⁵"Nantitipon iray Filisteo a mibakal ed saray Israelita. Talomplon liboy karwahi ra; anem a liboy sondalon akakabayo, tan singa karakel na buer ed dayat iray arum a sondalo ra. Linma rad Micmas diad bokig na Bet-aven, tan diman ira nankampo.

⁶"Insan pinasia ran dinogpaan iray Israelita, et pangaskasiyay kipapasen na saray Israelita. Inmaamut iray arum ed sikara diad saray ongib tan diad saray abut, diad nanleleetan na saray ankakabaleg a bato, tan diad saray araralem ya abut tan saray bobun;

⁷"binaliw na saray arum so Ilog na Jordan, diad pasen a sakop na Gad tan Galaad. Wala nid Gilgal si Saul, tan manggiwgiw ed takot iray totoon kakaiba to.

⁸"Inalagar toy Samuel a pitoy agew, onung na imbilin nen Samuel ed sikato, balet ag ni sinmabid Gilgal si Samuel. Saray totoo tataynan da lay Saul,

⁹"kanyan inkuantod sikara, Awit yo dia ray bagat a popoolan tan saray bagat a para kareenan. Angisaklang na bagat a popoolan,

¹⁰tan diad pakasusumpal to, sinmabiy Samuel. Pinmaway ya onabet si Saul, tan inggalang to.

¹¹Balet inkuanen Samuel, Antoy ginawam? Inmebat si Saul, Tataynan ak la na saray totoo, ta ag ka sinmabid oras ya imbagam tan, sakey ni, mantitipon ed Micmas iray Filisteo.

¹²Kanyan inisip ko, Dogpaan ak diad Gilgal na saray Filisteo, et ag ko ni inalay maung a linaway Dios. Kanyan apasootan ak a mangibagat.

¹³Kalokowan so ginawam, ebat nen Samuel. Ag mo inonur so inggangan ed sika na Katawan a Dios mo. No inonur mo komun, abuloyan to ka tan saray kabyangay boleg mo a manoley ya anggad angga ed Israel.

¹⁴Balet natan ag la mansiansia so panoley mo. Lapud ag mo inonur so Katawan, mananap la na lakin labay to tan panoleyen tod saray totoo to.

¹⁵Tinmaynan ed Gilgal si Samuel, tan intuloy toy kurang to. Saray atilak a totoo akila rad kinen Saul ya onlan mitipon ed saray sondalo to. Manlapud Gilgal, linma rad Gabaa, a sakop na dalin nen Benjamin. Ninengneng nen Saul iray sondalo to, a sakey anem a lasus ira.

¹⁶Si Saul, si anak ton Jonatan, tan saray totoo to et nanayam irad Geba a sakop na dalin nen Benjamin; walad Micmas balet so kampo na saray Filisteo.

¹⁷Saray sondalo na Filistia tinaynan day kampo ra, ta linma ran ondogpa. Talora ran grupo: say sakey amaarap ed Ofra, diad dalin a sakop na Sual;

¹⁸say kumadwa amaarap ed Bet-horon tan say kumatlo amaarap ed ketegan ya ososdungan toy Patar na Zeboim tan say kalawakan.

¹⁹Anggapod saman so pumapanday ed intiron dalin na Israel, ta ag labay na saray Filisteo a saray Israelita et manggawa ray ispada tan pika. (

²⁰Saray Israelita et nakaukolan ya onla rad Filistia a mampatarem na saray lukoy, buka, wasay, tan saray palot da.

²¹Say bayar dad pampatarem na wasay tan pampaapiger na gayang et sakey a melag a pilak, tan duara ed pampatarem na lukoy odino buka.)

²²Kanyan diad agew na bakal anggapod saray Israelitan sondalo, likud ed kinen Saul tan si anak ton Jonatan, so walay ispada odino pika.

²³Saray Filisteo angibaki ray sakey a grupoy sondalo a mangyagel ed Dalan na Micmas.