Read Pangasinan 1 SAMUEL 14 Bible Online

1 SAMUEL 14 - Pangasinan bible

1 SAMUEL 14

¹"Aminsan ya agew inkuanen Jonatan ed balolakin umaawit na armas to, Talad kampo da ray Filisteo. Balet ag ya imbaga nen Jonatan ed kinen ama ton Saul,

²"a say kampo to et walad silong na kiew a granada diad Migron ya ag arawid Gabaa; wala ray kaiba ton sakey ya anem a lasus a lalaki.

³"(Say parin akasolung na ipod et si Ahias, say lakin anak na agi nen Icabod a si Ahitob, a lakin anak nen Finees tan apo nen Eli a pari na Katawan diad Silo.) Anggapoy makaamta a tinmaynan si Jonatan.

⁴"Diad Dalan na Micmas a nepeg a baliwen nen Jonatan diad iyakar tod kampo da ray Filisteo, walay duaran ankakabaleg tan nanotuk-otuk a bato ed balang dapag: Boses so tawag ed sakey, Sene so sakey.

⁵"Say sakey walad baybay na dalan tan akaarap ed Micmas; say sakey walad abalaten tan akaarap ed Geba.

⁶"Inkuanen Jonatan ed samay balolaki, Onla tad kampo da ray paganon Filisteo. Tulongan ita angangko na Katawan; no tulongan to ta, anggapoy antokaman a makasbel ed sikato diad pangiter tod sikatay pananalo, anggaman a dagdaiset ita.

⁷"Inmebat imay balolaki, Kaiba mo ak ed antokaman a labay mon gawaen.

⁸"Sigi, sirin, kuanen Jonatan. Ombeltang ta tan mampanengneng tad saray Filisteo.

⁹"No ibaga rad sikatan alagaren ta ran ondagod sikata, ag ta onalis ed kawalaan ta.

¹⁰No ibaga ran dagoen ta ra, laen ta ra, ta sikatoy pakapatnagan ya inter na Katawan ed sikata so pananalo ed saray Filisteo.

¹¹Nampanengneng ira sirin ed saray Filisteo, et saray Filisteo kuanda, Nengneng yo! Ompapaway iray pigaran Hebreo ed saray abut a nanaamutan da!

¹²Insan da ra tinawag di Jonatan tan samay balolaki, Gali dia! Walay ibaga mid sikayo! Inkuanen Jonatan ed samay balolaki, Tombuk mo ak. Say Katawan initdan toy Israel na pananalo ed sikara.

¹³Kinmalab si Jonatan diad impaway tod samay dalan, ya inkana to ray lima tan say pueg to. Tinmombuk ed sikato may balolaki. Dinogpaan nen Jonatan iray Filisteo et aleslespak ira, tan samay balolaki pinapatey to ra.

¹⁴Diad saman a laban, sakey a duamplon lalaki so pinapatey di Jonatan tan samay balolaki diad pasen a sakey a kapalduay iktario so kabaleg to.

¹⁵Manggiwgiw ed takot iray amin a Filisteon walad samay pasen; saray sondalon walad kampo tan saray walad lawak na bakalan et manggiwgiw irad takot; yenmegyeg, tan walay baleg ya aligewgewan.

¹⁶Saray bantay a totoo nen Saul a wala rad Gabaa, a sakop na dalin nen Benjamin, anengneng da ray Filisteon kibatiktik ed anggan iner.

¹⁷Kanyan inkuanen Saul ed saray totoo to, Bilang yo ray sondalo, ta nengneng yo no siopay anggapo. Nen abilang da la ra, arumog dan anggapo ra di Jonatan tan samay balolakin umaawit na armas to.

¹⁸Awit yo dia may ipod kuanen Saul ed kinen Ahias a pari. (Diad saman ya agew sankaawit nen Ahias ed onaan da ray Israelita.)

¹⁹Legan a mitotongtong si Saul ed samay pari, lalon onloloor so gewgew ed kampo da ray Filisteo, kanyan inkuanen Saul ed samay pari, Anggapo lay panaon na pangipanon ed Katawan!

²⁰Insan si Saul tan saray totoo to linma ran mibakal ed saray Filisteo a lapud aligewgewan et manlalaban iran dili.

²¹Saray Hebreo, ya akigampi ed saray Filisteo tan akila la rad sikara ed kampo, binmiek irad dapag di Saul tan Jonatan.

²²Saray arum ya Israelita a manaamut irad kapokdulan na Efraim et nadngelan dan kibatiktik iray Filisteo, kanyan angiba ran mibakal.

²³Nilabanan da ray Filisteo ya anggad labas na Bet-aven. Diad saman ya agew inyagel na Katawan so Israel.

²⁴Diad saman ya agew makapkapoy ed eras iray Israelita, ta walay ganggan nen Saul ed sikara. Sinambaan tod sikara, Nisamba so toon mangan ed sayan agew, kasakbayan a makabawi ak ed saray kalaban ko. Kanyan anggapoy angan ya anggan sakey ed sanagew.

²⁵Linma ran amin ed takel, tan amayamay so dilod man.

²⁶Napnoy dilo so takel, balet anggapoy angan ta antakot irad samay samba nen Saul.

²⁷Balet ag nadngel nen Jonatan so impantaktakot nen ama to diad panamegley na sakey a samba; kanyan indelnet tod kawalaay dilo so bislak a sankaawit to, tan angan na dilo. Binmiskeg a tampol.

²⁸Balet inkuan na sakey ed sikato, Makapkapoy itayon amin ed eras, balet pinatakot itayo nen amam tan kuanto, Nisamba so toon mangan ed sayan agew.

²⁹Inmebat si Jonatan, Makapasinagem so ginawa nen amak ed saray totoo! Nengneng moy inbiskeg ko lapud impangan koy dilo!

³⁰Lalon maung komun ed sayan no saray totoo tayo et kinan day asamsam dan kakanen nen tinalo da ray kalaban. Lalon dakerakel ni komuy apatey da a Filisteo!

³¹Diad saman ya agew tinalo na saray Israelita iray Filisteo, a nilalabanan da manlapud Micmas ya anggad Ahilon. Diad sayan bekta makapkapoy lad eras iray Israelita,

³²kanyan nanlulumbaan irad saray asamsam dad saray kalaban da, inaala da ray karniro, saray baka, tan saray kilaw, pinapatas da ran tampol diman, tan kinakakan da ran walay dala.

³³Nibagad kinen Saul, Nengneng mo, mankakasalanan ed Katawan iray totoo diad papangan day karnin walay dala. Traidor kayo! eyag nen Saul. Mangitolin kayo diad abay ko na baleg a bato.

³⁴Insan ingganggan to, Laka kayod saray totoo tan ibaga yod sikaran amin ya awiten da dia ray baka tan saray karniro ra. Patasen tan kanen da ra dia, pian ag ira mangay karnin walay dala et ag ira mankasalanan ed Katawan. Kanyan diad saman lamlamang a labi, inyaakar da ray baka ra tan pinapatas da rad man.

³⁵Nanggaway Saul na altar ed Katawan; sayan altar so ononan ginawa to.

³⁶Inkuanen Saul ed saray totoo to, Leksaban tin dogpaan iray Filisteo no labi. Pairapen ti ra ya anggad palbangon, insan pateyen ti ran amin. Gawam so antokaman ya isisipen mon maabig, ebat da. Balet inkuanto may pari, Ipanon ti nid Dios.

³⁷Kanyan tinepet nen Saul ed Dios, Dogpaan ko ra kasiy Filisteo? Panaloen mo kami kasi ed sikara? Balet ag inmebat so Dios ed saman ya agew.

³⁸Kanyan inkuanen Saul ed saray pangulo da ray totoo, Gali dia ta nengnengen tayo no anton kasalanan so agawad sayan agew.

³⁹Isipan kod mabilay a Katawan, say manangilaban na Israel, a pateyen so nankasalanan, anggan si Jonatan ya anak ko. Balet anggapoy imbaga na siopaman.

⁴⁰Inkuanen Saul ed sikara, Alagey kayon amin ed satan a dapag, tan sikami nen Jonatan manalagey ed sayan dapag. Gawan so antokaman ya isisipen mon maabig, ebat da.

⁴¹Inkuanen Saul, Katawan a Dios na Israel, akin et ag mo ak inebatan ed sayan agew? Ebatan mo ak pa diad panamegley na sarayan bato. No say nankasalanan et si Jonatan o siak, ebat kad panamegley na Urim; balet no saray totoom ya Israel, ebat kad panamegley na Tummim. Onung ed ebat si Jonatan tan si Saul iray atoro, tan saray totoo et anggapoy kasalanan da.

⁴²Insan inkuanen Saul, Gawa yo natay pampapalaranan pian natoro no siopad sikamin dua nen Jonatan so nankasalanan. Et si Jonatan so atoro.

⁴³Insan tinepet nen Saul ed kinen Jonatan, Antoy ginawam? Inmebat si Jonatan, Angan ak na daiset a dilo ed ngoro na bislak a sankabembenan ko. Nia akakaparaanan ak ya ompatey.

⁴⁴Inmebat si Saul ed sikato, Pateyen ak komun na Dios no ag ta ka papatey!

⁴⁵Balet inkuan na saray totoo ed kinen Saul, Pateyen kasi si Jonatan ya angipanguloy impanalo na Israel? Andi! Isipan mid mabilay a Katawan ya ag naandi so anggan saksakey a buek nen Jonatan. Tinulongan na Dios ed ginawa tod sayan agew. Kanyan saray totoo impaliis day Jonatan ed ipapatey.

⁴⁶Kayari to ya tinondaan nen Saul ya inosilan iray Filisteo, tan amawil la rad dilin dalin da.

⁴⁷Nen ari lad Israel si Saul, nilabanan to ray kalaban tod inerman a pasen: saray totood Moab, Ammon, tan Edom, saray ararid Zoba, tan saray Filisteo. Analo ed inerman ya akibakalan to.

⁴⁸Matalonggaring so impibakal to, tan tinalo to ray anggan saray Amalecita. Inyagel toy Israel ed amin da ray dinmodogpa.

⁴⁹Saray anak nen Saul et di Jonatan, Isui, tan Melkisua. Say pangulowan ya anak ton bii et si Merab, tan say yogtan et si Micol.

⁵⁰Say asawa to et si Ahinoam, say anak nen Ahimaaz; say pangulo da ray sondalo to et si kapinsan ton Abner, say lakin anak nen pangamaen to a si Ner.

⁵¹Si Cis ya ama nen Saul tan si Ner ya ama nen Abner et anak ira nen Abiel.

⁵²Legan a nambilay si Saul pinasiay impibakal tod saray Filisteo. Kanyan kapag makanengneng na lakin mabiskeg tan masebeg, pagmaliwen ton kabyangan na saray sondalo to.