Read Pangasinan 1 SAMUEL 15 Bible Online

1 SAMUEL 15 - Pangasinan bible

1 SAMUEL 15

¹"Inkuanen Samuel ed kinen Saul, Say Katawan et siak so imbaki to a lanaan ta kan manari ed saray totoo tod Israel. Natan sirin, dengel moy ibaga na Katawan a Makapanyarin-amin.

²"Dusaen to ray totoon Amalecita, ta sinumpa da ray Israelita nen tataynan day dalin na Egipto.

³"Laka, ta dogpaan mo ray Amalecita, tan deral mon sigput so antokaman a walad sikara. Ag kan balut mangikekera; patey mo ray amin a lalaki, bibii, ogogaw, tan amin a kapangyanak; saray baka, karniro, kamilyo, tan saray asno.

⁴"Impantitipon nen Saul iray sondalo to tan ninengneng to rad Telaim: duan lasus libon sondalo so nanlapud Israel tan samplon libo so nanlapud Juda.

⁵"Insan sikato tan saray totoo to linma rad siudad na Amalec, tan nantalaran irad nakatan ya ilog.

⁶"Pinasakbayan da ray Cineo, Taynan kayo pian ag mi kayo napipatey, ta kinasian yo ray Israelita nen ontataynan irad Egipto. Kanyan tinmaynan iray Cineo.

⁷"Tinalo nen Saul ray Amalecita; nilabanan da ra manlapud Havila ya anggad Sur, diad bokig na Egipto;

⁸"dinakep dan mabilay si Agag ya ari da ray Amalecita, balet pinatey dad panamegley na ispada iray amin a totoo.

⁹"Si Saul tan saray totoo to et ag da pinatey si Agag, tan ag da met pinatey iray sankaabigan a karniro, baka, saray kilaw na baka tan kordiro, tan amin a bengatlan walay kana; dineral da balet iray amin ya andi-kana o aliwliwa.

¹⁰Inkuan na Katawan ed kinen Samuel,

¹¹Magbabawi ak a ginawak ya ari si Saul; imbeneg to ak tan ag to inonur iray ganggan ko. Apasnukay Samuel, tan sanlabin akikasi ed Katawan.

¹²Kabkabwasan ed ontombuk ya agew linman anapen toy Saul. Nadngelan ton linmad baley na Carmel si Saul, a dimay nanggawaan toy monuminto to, insan tinmuloy ed Gilgal.

¹³Linmay Samuel ed kinen Saul tan angilugay ed sikato, Bindisionan kay Katawan. Samuel! Inonur koy ganggan to.

¹⁴Tinepet nen Samuel, Akin balet et walay narerengel kon manngakngak iran baka tan mambikbik iran karniro?

¹⁵Inmebat si Saul, Inala ra na saray totook ed saray Amalecita. Ag da pinatey iray sankaabigan a karniro tan saray baka, ta isaklang da ran bagat ed Katawan a Dios mo, balet sigput min pinatey iray arum.

¹⁶Inkuanen Samuel, Tonda ka la, ta ibagak ed sikay imbagay Katawan ed siak kalabyan. Ibagam pa sirin, kuanen Saul.

¹⁷Inmebat si Samuel, Anggaman ya ipapasen moy sikan dili ya abeba, sikay pangulo da ray tribu ed Israel. Say Katawan nilanaan to kan manari ed Israel,

¹⁸tan ingganggan to kan mamatey ed saray Amalecitan maoges a totoo. Imbaga ton labanan yo ra ya anggad napatey yo ran amin.

¹⁹Akin sirin et ag mo inonur? Akin et nanlulumbaan kayod saray asamsam yo, et lapud saya ginawa yoy maoges ed Katawan?

²⁰Inonur koy Katawan, ebat nen Saul. Linma ak ed angibakian to, inalak a mabilay si Ari Agag, tan pinapatey ko ray amin ya Amalecita.

²¹Balet saray totook ag da pinatey iray sankaabigan a karniro tan saray baka ya asamsam da; ingen, inyakar da ra diad Gilgal ya ibagat ed Katawan a Dios mo.

²²Inkuanen Samuel, Antoy lalon labay na Katawan: say pangonur, odino saray saklang tan saray bagat? Maung niy ononur ed sikato nen say mangibagat ed sikato na saray sankaabigan a karniro.

²³Say isumpa ed sikato et singa kinaoges na panangipanon ed saray maoges ya ispiritu tan say panagpaatagey et singa kinaoges na panangigalang ed saray diriyos. Lapud impolisay moy ganggan na Katawan, impolisay to ka met ya ari.

²⁴On, nankasalanan ak, ebat nen Saul, Ag ko inonur so ganggan na Katawan tan saray bilibilin mo. Antakot ak ed saray totook, kanyan ginawak iray labay da.

²⁵Balet natan kerewen kod sika, pirdona mo ak tan mila kad siak ed Gilgal, pian nigalang koy Katawan.

²⁶Ag ak milad sika, ebat nen Samuel. Impolisay moy ganggan na Katawan, kanyan impolisay to ka ya ari na Israel.

²⁷Insan pinmoliktar lan ontaynan si Samuel, balet siningkat nen Saul so kolibemben to, et apilat.

²⁸Inkuanen Samuel ed sikato, Say Katawan inekal to natan ed sika so nanarian na Israel tan inter tod sakey a toon maung nen say sika.

²⁹Say mapagalang a Dios na Israel et ag mantila o mangoman na kanunotan. Aliwan too a mangoman na kanonutan.

³⁰Nankasalanan ak, ebat nen Saul. Balet pagalangan mo ak pa ni labat diad arap da ray pangulo na totook tan amin a totood Israel. Mila kad siak pian nigalang koy Katawan a Dios mo.

³¹Kanyan akilay Samuel ed sikato ed Gilgal, tan inggalang nen Saul so Katawan.

³²Iyakar yo diad siak si Agag ya ari da ray Amalecita, ganggan nen Samuel. Inmasingger ed sikato si Agag, manggiwgiw ed takot, ta inisisip tod sikaton dili, Agaylay irap na ompatey!

³³Inkuanen Samuel, Say ispadam impagmaliw ton anggapoy anak iray amayamay ya ina; ontan met a magmaliw ya anggapoy anak so inam. Insan tinartar toy Agag diad arap na altar ed Gilgal.

³⁴Insan linma lay Samuel ed Rama, tan sinmempet lay Ari Saul ed Gabaa.

³⁵Legan na impambilay ni nen Samuel ag to la anengneng si Saul; balet nanermen lapud kinen Saul. Nagbabawi so Katawan a ginawa ton arid Israel si Saul.