Read Pangasinan 1 SAMUEL 18 Bible Online

1 SAMUEL 18 - Pangasinan bible

1 SAMUEL 18

¹"Asumpal a nantongtong si Saul tan si David, kayari to ya, si Jonatan a lakin anak nen Saul et naayat a maung ed kinen David tan inaro ton singa panangaro tod sikaton dili.

²"Nanlapud saman ya agew si Saul inala toy David tan ag to la pinasempet.

³"Si Jonatan akisipanan a mikaaron anggad angga ed kinen David, ta inaro to a singa panangaro tod sikaton dili.

⁴"Inekal toy kawes ya akasolung ed laman to tan inter tod kinen David; inter to met so kawes ton para bakal a pati say ispada, pana, tan say balkes to.

⁵"Si David analo ed amin a bakal ya angibakian nen Saul ed sikato, kanyan ginawa nen Saul a sakey ya opisyal na saray sondalo to. Akapaliket ya ed saray totoo nen Saul tan saray opisyal to.

⁶"Nen ompawil si David, kayari ton pinatey si Goliat, tan onsesempet met la ray sondalo, inmabet ed kinen Saul iray bibiin nanlapud amin a baley na Israel. Nankakanta ray maliket a kansion, nansasayaw ira, tan nantotogtog iray tamborin tan saltirio.

⁷"Diad panliliket da, anganta ray bibii. Si Saul amatey na nilibo, balet si David amatey na asamplon libo.

⁸"Ag ya labay nen Saul, tan pinmetang so olo to. Inkuanto, Ibabaga ran asamplon liboy pinatey nen David, balet nilibo labat ed siak. Anggapo lay nagawan onsoblay no ag say panari to!

⁹"Nanlapud saman ya agew, angimon ed kinen David.

¹⁰Diad ontombuk ya agew linmoob ed kinen Saul so maoges ya ispiritu a nanlapud Dios, kanyan manitaw a singa ambagel ed abung to. Manotogtog si David, na arpa, a singa gagawaen ton inagew-agew, tan sankabembenan nen Saul so pika.

¹¹Ipanek kod padir, kuanen Saul ed sikaton dili, tan pinika ton amidwa; balet alikiran iran dua nen David.

¹²Antakot si Saul ed kinen David, ta walad kinen David so Katawan a tinmaynan lad kinen Saul.

¹³Kanyan pinaarawi nen Saul si David tan ginawa ton pangulo na saray sanlibon sondalo. Diad bakal, sikatoy dilin angiwawanwan ed saray totoo to,

¹⁴tan maaligwas ed amin a ginawa to, ta walad sikato so Katawan.

¹⁵Naimano nen Saul so ontan lan iyaaligwas nen David tan lalon tinmakot ed sikato.

¹⁶Balet si David inaroy amin a totoo ed Israel tan Juda, ta maaligwas a pangulo.

¹⁷Insan inkuanen Saul ed kinen David, Niay Merab, say anak kon sakapangulowanan a bii. Iter kod sikan asawaen mo, dapot no masebeg tan matoor kan sondalo a manlingkur ed siak, tan milaban kad saray bakal na Katawan. (Ginawa ya nen Saul, ta abaloan ton diad onya napatey na saray Filisteo si David, et aliwa lan sikaton dili so mamatey.)

¹⁸Inmebat si David, Siopa ak, tan siopa ray pamilyak, et magmaliw ak a manugang na ari?

¹⁹Balet nen sinmabiy agew a niiter lan asawa nen David si Merab, si Adriel a taga Mehola so angikasal.

²⁰Balet si Micol ya anak nen Saul inmibeg ed kinen David, tan akaliket si Saul nen akabatan to.

²¹Inkuantod sikaton dili, Iter kon asawaen nen David si Micol; agamilen kon mangalut ed sikato, pian napatey na saray Filisteo.

²²Ingganggan to ray opisyal a mitongtong irad kinen David no anggapoy arum a makadngel tan ibaga rad sikato, Makaliliket so ari ed sika tan labay ka na amin ya opisyal to; kanyan maung no asawaen mo la natan so anak ton marikit.

²³Kanyan imbaga da ya ed kinen David, tan inmebat, Baleg a kagalangan so magmaliw a manugang na ari, baleg a tuloy ed sakey a mairap-bilay tan abebad kipapasen a singa siak.

²⁴Saray opisyal imbaga rad kinen Saul so ebat nen David,

²⁵et si Saul ingganggan to ran mangibaga ed kinen David: Say labay labat na ari ya ibayar mod sikato pian naasawam so marikit to et say baog na ngoroy kayaryan na sanlasus ya inatey a lalakin Filisteo, pian makabawid saray kalaban to. (Onyay inisip nen Saul a pagawa; pian napatey na saray Filisteo si David.)

²⁶Imbaga na saray opisyal ed kinen David so papaibaga nen Saul, tan maliket si David ed pagmaliw ton manugang na ari. Kasakbayay agew na kasal,

²⁷si David tan saray totoo to linma ran amatey na duan lasus a Filisteo. Inawit toy baog na kayaryan na balang sakey tan imbilang tod ari, pian magmaliw a manugang to. Kanyan apasootan si Saul ya impaasawa tod kinen David si anak ton Micol.

²⁸Abirbir lan sigput nen Saul a say Katawan et walad kinen David; abirbir to met ya inaro nen anak ton Micol.

²⁹Kanyan lalon tinmakot ed kinen David tan kinabosul to legan ton nambilay.

³⁰Kapag onsabin mibakal iray Filisteo, maaligwas nin mibakal si David nen saray arum ya opisyal nen Saul. Lapud saya, lalon binmantug si David.