Read Pangasinan 1 SAMUEL 19 Bible Online

1 SAMUEL 19 - Pangasinan bible

1 SAMUEL 19

¹"Imbaga nen Saul ed kinen anak ton Jonatan tan saray amin ya opisyal to a getma ton pateyen si David. Balet inararo nen Jonatan si David,

²"kanyan inkuantod sikato, Labay kan pateyen nen amak. Manalwar ka nabwas na kabwasan; lakad maamut a pasen tan diman ka.

³"Onla ak tan abayan koy amak diad alog a panamutan mo tan salitaen koy nipaakar ed sika. No walay nakabatan ko ibagak ed sika.

⁴"Indayew nen Jonatan si David ed kinen Saul, tan kuanto, Ag kayo komun manggagaway maoges ed kinen aripen yon David. Anggapoy kaogsan a ginawa tod sikayo; amin ingen a ginawa to et pankaabigan yo.

⁵"Imposta toy bilay to nen pinatey toy Goliat, et baleg so pananalon inter na Katawan ed Israel. Nanliket kayo nen anengneng yo yan pananalo. Akin, sirin, et labay yoy manggaway kaogsan ed toon anggapoy kasalanan diad pamatey yod kinen David ya anggapon balut so makasengeg?

⁶"Dinengel nen Saul si Jonatan tan sinambaan tod ngaran na Katawan ya ag to la pateyen si David.

⁷"Kanyan tinawag nen Jonatan si David tan imbaga toy amin a nantongtongan da; insan to inyakar ed kinen Saul, et nanlingkur si David ed ari a singa ginawa to nen saman.

⁸"Tinmerak lamet so bakal sumpad saray Filisteo. Dinogpaan ira nen David; amayamay iray apatey a Filisteo, kanyan kibatiktik iray arum.

⁹"Aminsan linmoob kinen Saul so maoges ya ispiritu. Manyodyorung ed loob na abung tan sankabembenan toy pika. Wadman met si David a manotogtog na arpa.

¹⁰Si Saul pinika ton ipanek ed padir si David, balet akalikir si David, kanyan nipanek ed dingding imay pika. Batik si David tan tinmaynan.

¹¹Diad saman a labi angibakiy Saul na pigaran totoo a mambantay na abung nen David tan mamatey ed sikato diad kaimbuas. Pinasakbayan nen Micol si David, No ag ka ombatik ed sayan labi, ompatey ka nabwas.

¹²Pinalasur to sirin ed bintana, insan batik, tan tinmaynan si David.

¹³Inala nen Micol so talintaoy dios a para abung, imparokul tod katri, inyan tod olowan to so danganan a bagoy karniro, tan sinakbungan toy abel.

¹⁴Nen alaen na saray totoo nen Saul si David, imbaga nen Micol ed sikara a mansasakit.

¹⁵Balet pinapawil ira nen Saul ta nengnengen dan dili si David. Inkuantod sikara, Alsa yod katri to, awit yo dia, ta pateyen ko.

¹⁶Linmoob ira tan arumog dad katri so talintaoy dios a para abung, tan say danganan a bagoy karniro ed olowan to.

¹⁷Tinepet nen Saul ed kinen Micol, Akin et pinalikdo mo ak diad impamabatik mod kalaban ko? Inmebat si Micol, Imbaga tod siak a pateyen to ak no ag ko tulongan ya ombatik.

¹⁸Batik si David tan linmad kinen Samuel diad Rama tan imbaga toy amin a ginagawa nen Saul ed sikato. Insan linma ra nen Samuel ed Nayot tan nanayam irad man.

¹⁹Nadngelan nen Saul a walad Nayot si David, diad Rama,

²⁰kanyan angibakiy pigaran lalaki a mangalad sikato. Anengneng na sarayan imbaki so grupo na saray propita a mansasayaw-sayaw tan maneeyag-eyag; si Samuel so pangulo ra. Linmoob ed sikaray ispiritu na Dios, tan ginapwan da met so mansayaw-sayaw tan maneyag-eyag.

²¹Nen nadngelan ya nen Saul angibaki na pigaran lalaki, balet ginapwan da met so mansayaw-sayaw tan maneyag-eyag. Pinitlo toy angibaki, tan namparay agawa.

²²Insan sikaton diliy linma ed Rama. Nen akasabid samay baleg a bobun ed Secu, tinepet to no iner so kawalaan nen Samuel tan si David, et nibagad sikato a wala rad Nayot, diad Rama.

²³Nen oonlad man, linmoob met ed sikato so ispiritu na Katawan, insan nansasayaw-sayaw tan naneeyag-eyag ya anggad impakasabi tod Nayot.

²⁴Inekal toy kawes to tan nansasayaw-sayaw tan naneeyageyag ed arap nen Samuel, tan labus-lakseb a nandokul a sanagew tan sanlabi. (Sikato yay inggapo na balikas, Nagmaliw ta met lan sakey a propita si Saul?)