Read Pangasinan 1 SAMUEL 21 Bible Online

1 SAMUEL 21 - Pangasinan bible

1 SAMUEL 21

¹"Linmay David ed kinen pari Ahimelec diad Nob. Manggiwgiw si Ahimelec a pinmaway a mangabet ed sikato tan tinepet to, Akin et bukbukor moy linma dia?

²"Wadya ak, ta ingganggan ak na ari, ebat nen David. Binilin to ak ya ag ko ibagay angibakian tod siak a gawaen ko. Imbagak ed saray totook a mambabana kamid sakey a pasen.

³"Antoy walad tan a nakan? Itdan mo ak na limaran tinapay o antokaman a wala.

⁴"Inkuan na pari, Anggapoy tinapay ko, no ag say masanton tinapay labat; nayarian mon alaen no saray totoom et ag ira akiakdul ed bii nen imbeneg iran agew.

⁵"Talagan andi, ebat nen David. Ag papaolyan na saray totook a malinis ira onung ed ganggan, anggan ordinario so pegdat mi; insan la natan, ta nidomay pegdat mi!

⁶"Kanyan inter na pari ed kinen David so masanton tinapay, ta say wala labat et saray tinapay ya insaklang ed Dios a sikaray inekal lad masanton lamisaan tan sinalatan lay kapanggawan tinapay. (

⁷"Say pangulo da ray pastol nen Saul, a si Doeg a taga Edom, et nibanan wadman ed saman ya agew, ta mangigalang ed Katawan.)

⁸"Inkuanen David ed kinen Ahimelec, Walay pika o ispadan niiter mod siak? Magangganat ak lapud ganggan na ari, kanyan anggapo lay oras kon angalay ispadak odino arum ya armas.

⁹"Inmebat si Ahimelec, Walad siak so ispada nen Goliat a Filisteo a pinatey mod Patar na Ela; wadmad beneg na ipod, abalkut ed abel. No labay mo, alamsikato labat so armas a wadya. Anggapo lay arum a miparad satan, inkuanen David. Iter mod siak!

¹⁰Kanyan tinmaynan si David, imbatikan toy Saul, tan linmad kinen Ari Akis na Gat.

¹¹Inkuan na saray opisyal na ari ed kinen Akis, Aliwa tan sikato ya may David, say ari na bansa to? Sikato ya may lakin totokuyen na saray bibii ed kakantaen da legan dan mansasayaw, Si Saul amatey na nilibo, balet si David amatey na asamplon libo.

¹²Atenyeg so liknaan nen David lapud sarayan salita, tan tinmakot a maung ed kinen Ari Akis.

¹³Kanyan no walad arap da, omanen toy kagagawa to, tan no pokpokan da manamambagelan; mansulsulat ed saray puirta na siudad tan palpaolyan ton onagos ed balbas to so ilol to.

¹⁴Kanyan inkuanen Akis ed saray opisyal to, Nengneng yo tan a too! Ambagel! Akin et inawit yo ni dia?

¹⁵Amayamay la diay ambagel. Akin et angawit ki ni diay manggaway inaambangel diad loob na dilin abung ko?