Read Pangasinan 1 SAMUEL 24 Bible Online

1 SAMUEL 24 - Pangasinan bible

1 SAMUEL 24

¹"Nen amawil si Saul kayari ton nilabanan iray Filisteo, nibagad sikato a walad kalawakan na En-gadi si David.

²"Angalay talon libon sankamaungan a mibakal a lalaki ed Israel tan linma ran mananap ed kinen David tan saray totoo to diad bokig na Saray Bato na Kanding ed Takel.

³"Linmad sakey ya ongib a walad abay na pigaran koral na karniro diad gilig na dalan, tan sinmorub diman ta labay toy nainawaan. Nibana a diad daledalem to man ya ongib akaamut ira di David tan saray totoo to.

⁴"Inkuan ed sikato na saray totoo to, Sikato la yay pankanawnawam! Imbagad sika na KATAWAN ya ipasilong tod pakayarim so kalaban mo tan nayarian mon gawaen ed sikato so antokaman a labay mo. Nankalkalnan kinorung nen David si Saul tan angerger na saloy na kawes nen Saul ya ag to amta.

⁵"Balet kabebekta ag pinareen na konsinsia to,

⁶"tan kuantod saray totoo to, Ag iyabuloy komun na KATAWAN a pasakitan koy pinili ton ari! Ag ko nepeg a pasakitan ta sikatoy ari a pinili na KATAWAN!

⁷"Kanyan tinanggoyur to ray totoo ton ag da dogpaan si Saul. Inmalagey si Saul, pinmaway ed ongib, tan ontataynan la.

⁸"Pinmaway met ed ongib si David, tinombuk to, insan to tinawag, Kagalgalang kon Ari! Linmingaw si Saul et si David dinmakmomo ya anggad dalin a pamagalang to,

⁹"tan kuanto, Akin et dedengelen mo ray totoon mangibabaga a pasakitan ta ka?

¹⁰Nanengneng mon dili a nanagonuyan labat impasilong ka na KATAWAN ed pakayarik. Pigaran totook so angibagad siak a pateyen ta ka, balet et ag ko ya ginawa tan kuankon ag ta ka pasakitan, ta pinili ka na KATAWAN a manari.

¹¹Nengneng mo, ama, nengneng mo yay sankabembenan kon parti na saloy na kawes mo! Apatey ta ka la komun, balet saya labat lay ginerger ko. Diam nanengneng ya anggapoy kanunutan kon onlaban ed sika o pasakitan ka. Aanapen mo ak a pateyen anggaman ya anggapoy ginawak a maoges ed sika.

¹²Sintinsiaan ita komun na KATAWAN, no siopad sikatay manggagaway maoges! Dusaen ka komun na KATAWAN lapud gagawaen mod siak, ta no siak ag ta ka pasakitan.

¹³Onung na inkuay sakey a daan a balikas, Saray maoges a totoo labat so manggaway kaogsan. Kanyan ag ta ka pasakitan.

¹⁴Nengneng mo no siopay labay a pateyen na ariy Israel! Nengneng mo no siopay oosilan to! Sakey ya inatey ya aso, sakey a lies!

¹⁵Say KATAWAN so manintinsia, tan ibaga to no siopad sikatay manggagaway kaogsan. Ag to ya komun paolyan, siak komuy iyalagey to, tan iyagel to ak ed sika.

¹⁶Kayari nen David a nansalita, inkuanen Saul, Sikan talaga anak kon David? Ginapwan toy onakis,

¹⁷insan to inkuan ed kinen David, Maptek ka nen say siak. Maung so ipapatnag mod siak, balet maoges so gagawaen kod sika!

¹⁸Diad sayan agew impatnag mo so ontan lan kamaungan mod siak, ta ag mo ak pinatey, anggaman ya impasilong ak na KATAWAN ed pakayarim.

¹⁹No naerel na sakey a too so kalaban to, ibolus to kasin ag adiwit? Bindisionan ka komuy Dios lapud ginawam ed siak ed sayan agew!

²⁰Amtak la natan ya andi-duaruwan manari kad Israel, tan mansiansiay nanarian diad silong na oley mo.

²¹Isipan mod siak diad ngaray KATAWAN ya ag mo didiwiten iray kabyangay boleg ko, pian say ngaran ko tan say ngaray pamilyak et ag nalingwanan.

²²Insipan ya nen David. Insan la sinmempet si Saul, tan pinmawil ed panaamutan to si David tan saray totoo to.