Read Pangasinan 1 SAMUEL 25 Bible Online

1 SAMUEL 25 - Pangasinan bible

1 SAMUEL 25

¹"Inatey si Samuel, kanyan nantitipon iray amin ya Israelita tan nanermen ira lapud sikato. Insan impompon dad abung to diad Rama. Kayari to ya, tinmaynan si David tan linmad kalawakan na Paran.

²"Walay sakey a lakin kabyangay boleg nen Caleb a manngaray Nabal; taga baley na Maon, balet say kawalaay anapan to diad baley na Carmel. Mayaman a maung yan too: talon libo so karniro to tan sanlibo so kanding to. Say asawa to si Abigail, sakey a maganggana tan maotek a bii; balet si Nabal maonganget tan aliwliway ogali to. Aminsan walad Carmel si Nabal a mangakatliy karniro to.

⁴"Walad kalawakan si David tan nadngelan to yan gagawaen nen Nabal.

⁵"Kanyan angibakid Carmel na samploran balolaki; binilin to ran anapen day Nabal, tan ipasabi ray panangilugay to.

⁶"Binilin to ran ikuan dad kinen Nabal: Ilulugay to ka nen David, pinablin kaaro. Maung komun konoy kipapasen mo, say pamilyam, tan amin a kayaryan mo.

⁷"Nadngelan ton kakatilian mo ray karnirom, tan labay ton ipaamtad sika a kaiba mi ray pumapastol mo et ag mi ra pinasakitan. Anggapoy abalang da legan a wala rad Carmel.

⁸"Tepet mo labat ed sikara et ibaga rad sika. Linma kami dia ed agew na pista; maung komuy pangawat mod sikami. Iter mo pa komun so nayarian mon iter ed sikami ya aripen mo, tan diad kinen David a kaarom.

⁹"Nen sinmabid Carmel ira may totoo nen David, imbaga ra may papaibaga to. Insan ira nanalagar diman,

¹⁰tan inmebat a siansiay Nabal ed sikara, David? Siopa tan a too? Natad sayan panaon, amayamay iray aripen ya ibabatikan da ray amo ra!

¹¹Ag ko iter so tinapay tan danum, tan saray ayayep a pinapatas kon para saray kumakatliy karnirok, ed saray totoon ag ko amta no iner so nanlapwan da!

¹²Amawil ed kinen David ira may totoo to tan imbaga rad sikatoy imbaga nen Nabal.

¹³Ibalkes yo ray ispada yo! ingganggan to, et sikatoy ginawa ran amin. Imbalkes met nen David so ispada to tan pinmikal a kaiba to ray sakey a apat a lasus a lalaki; saray duan lasus atilak iran mambantay ed saray abasto.

¹⁴Say sakey ed saray aripen nen Nabal inkuantod kinen Abigail ya asawa nen Nabal, Ag yo ni nadngelan? Manlapud kalawakan angibakiy David na pigaran totoo tan impaisabi toy panangilugay ed kinen amo mi, balet pinabaingan to ra.

¹⁵Saraman a totoo et maumaung irad sikami; ag da kamin balut sinigensigen, tan legan a kaiba mi rad man ed kaalogan, anggapon balut so abalang mi.

¹⁶Agew-labi da kamin inyagel nen inaasikaso mi ray karniro.

¹⁷Nudnunot mo ya natan sirin no antoy nepeg yon gawaen. Nayarin maoges so nagawad amo mi tan say intiron pamilya to. Maonganget, kanyan anggapoy dengelen to!

¹⁸Nangganat ya angalay Abigail na duan lasus a tinapay; duaran pananginan a katat a napnoy alak, limaran litson a karniro, limaran salup ya insanglil a trigo, sanlasus a monggol na ubas, duan lasus a kanen ya impamagan bungay igos, tan inyan to rad beneg na saray asno.

¹⁹Insan to inkuan ed saray aripen, Onona kayon onla, ta ontombuk ak la. Balet anggapoy imbaga tod kinen asawa to.

²⁰Akakabayod asno si Abigail tan ondadalan ed kakurbad gilig na palandey, insan kabebekta nabet toy David tan saray totoo to.

²¹Nunudnunoten nen David, Akin et binabantayan kod kalawakan so kayaryan na saman a too? Anggapoy kayaryan ton abalang, et natan onyay ibales tod tulong kod sikato!

²²Pateyen ak komun na Dios no kasabiy kabwasan et walay inkerak a mabilay a lakin kaiba to!

²³Nen anengneng nen Abigail si David, inmepas a tampol tan tinmikleb ed dalin,

²⁴diad saliyan nen David, tan kuantod sikato, Ipangasim, dengel mo ak! Siak lay tetel mo ed amin ya agawa.

²⁵Paolyan mo pa la komun iman a Nabal, ta andi-kabaliksan a too! Say inkatoo to et kapara na kabaliksan na ngaran tosakey ya ambagel! Andid man ak, nen linma rad may aripen mo.

²⁶Say KATAWAN so manesebel a sikan dili so ombawi tan mamatey ed saray kalaban mo. Natan sambaan ko diad ngaran na mabilay a KATAWAN a nadusan singa si Nabal iray kalaban mo tan amin da ray malabay a mamasakit ed sika.

²⁷Kanyan awat mo pa yay panangaron awit ko a para sika, tan iter mod saray totoom.

²⁸Pirdona mo ak pa, no wala bilang so maoges a ginawak. Say KATAWAN gawaen to kan ari, tan anggan saray kabyangay boleg mo, ta milalaban kad saray bakal na KATAWAN; ag ka manggaway kaogsan legay pambilay mo.

²⁹No walay ondogpad sika tan labay to kan pateyen, say KATAWAN a Dios iyarawi to kad kaatapan, a singa pambantay na sakey a too ed mablin kayamanan. Ibasileng na KATAWAN iray kalaban mo, a singa pangipalsut na sakey too ed saray bato.

³⁰No sinumpal la na KATAWAN iray maung a bengatlan insipan tod sika, tan ginawa to ka lan ari na Israel,

³¹anggapo lad satan so pagbabawian o panermenan mo, lapud impamatey mon anggapoy makasengeg odino lapud imbawim. No binindisionan ka lay KATAWAN, ag mo ak pa komun lilingwanan.

³²Inkuanen David ed sikato, Nagalang so KATAWAN, say Dios na Israel, ya angibakid sikan mangabet ed siak natan!

³³Salamat ed Dios lapud kamaungay impannonut mo tan lapud impangipaliis mod siak ed pamatey kod kaparak a too tan say impamanom ya ombawi ak a dili.

³⁴Sinambaan ko lad ngaray mabilay a Dios na Israel a pateyen ko ray amin a totoo nen Nabal. No ag ka labat nangganat ya inmabet ed siak, ompatey iran amin komun kasakbayay kabwasan. Say KATAWAN so anebel ed siak ya ag to kayo napasakitan!

³⁵Insan inawat nen David iray awit to tan kuantod sikato, Sempet ka la tan ag ka mapaga. Gawaen koy labay mon nagawa.

³⁶Amawil lay Abigail ed kinen Nabal a diad abung to walay baleg a ponsian manepeg a para ari. Abuek la tan masayaksak so nengneng to, kanyan anggapo lay imbaga nen Abigail ed sikato anggad kabwasan.

³⁷Nen amawmawan lan maung, imbaga nen Abigail ed sikato so amin ya agawa. Naataki tan nagmaliw a paralitiko.

³⁸Kayariy sakey a samploran agew dinusa na KATAWAN si Nabal, et inatey.

³⁹Nen nadngelan nen David ya inatey si Nabal, inkuanto, Nagalang so KATAWAN! Binmawid kinen Nabal lapud impamabaing tod siak. Say KATAWAN so angipaliis ed siak ya aripen to ed panggawak na maoges. Dinusa na KATAWAN si Nabal lapud kaogsan to. Insan angibakiy David na mangibagan labay ton asawaen si Abigail.

⁴⁰Saray aripen to linma rad kinen Abigail diad Carmelo tan inkuan dad sikato, Si David imbaki to kamin mangalad sika ta iyakar mi kad sikaton asawaen to.

⁴¹Dinmakmomoy Abigail ya anggad dalin tan kuanto, Siak so aripen ton sipaparaan a mangoras ed saray sali na saray aripen to.

⁴²Magangganat ya inmalagey tan kinmabayod asno to. Inolup na limaran aripen ton bibii diad impila tod saray aripen nen David, tan nagmaliw ya asawa to.

⁴³Inasawa nen David si Ahinoam a taga Jezreel, tan natan nagmaliw met ya asawa toy Abigail.

⁴⁴Legan to ya impaasawa nen Saul so anak to a si Micol ed kinen Palti ya anak nen Lain a taga baley na Gallim. Si Micol asawa nen David nen saman.