Read Pangasinan 1 SAMUEL 3 Bible Online

1 SAMUEL 3 - Pangasinan bible

1 SAMUEL 3

¹"Diad saraman ya agew nen si ogaw a Samuel et manlilingkur ed Katawan diad silong na panangiwanwan nen Eli, mataltalag a narengel so bosis na Katawan, tan pigpigaray nagagawan payawar to.

²"Aminsan a labi si Eli a ngalngali la bulag et naogip ed dilin kuarto to.

³"Naogip met si Samuel ed dalem na Timplo na Katawan, diad kawalaay Kaban na Sipanan na Dios. Kasakbayan na palbangon, legan a mandarlang niy lamparaan,

⁴"si Samuel tinawag na Katawan, Samuel, Samuel! Inmebat, Wadya ak!

⁵"insan binmatik ed kinen Eli tan kuanto, Wadya ak, ta tinawag yo ak. Balet inmebat si Eli, Ag ta ka tinawag; pawil kad dokulan mo. Kanyan amawil si Samuel ed dokulan to.

⁶"Tinmawag lamet so Katawan, Samuel! Ag to amta a say Katawan so ontatawag, ta ag ni akisalita so Katawan ed sikato nen saman. Kanyan binmangon, linmad kinen Eli tan kuanto, Wadya ak, ta tinawag yo ak. Balet inmebat si Eli, Anak ko, ag ta ka tinawag. Pawil kad dokulan mo.

⁸"Pitlon tinawag na Katawan si Samuel; binmangon, linmad kinen Eli tan kuanto, Wadya ak, ta tinawag yo ak. Insan atalusan la nen Eli a say Katawan so manatawag ed ogaw,

⁹"kanyan inkuantod sikato, Pawil kad dokulan mo, tan no tawagen to ka lamet kuanmo, Mansalita ka, Katawan; onderengel so aripen mo! Kanyan amawil si Samuel ed dokulan to.

¹⁰Sinmabi so Katawan tan nanalagey diman, tan tinawag to a singa impanawag to nen inmona, Samuel! Samuel! Inmebat si Samuel, Mansalita ka; onderengel so aripen mo.

¹¹Inkuam na Katawan ed sikato, Onsabiy agew a walay gawaen kod saray totood Israel, et siopamay makadngel na nipaakar ed saya ombegas so bago tod takot to.

¹²Diad satan ya agew gawaen ko, manlapud gapo ya anggad samput, iray amin ya imbagak sumpad pamilya nen Eli.

¹³Imbagak lad sikato a dusaen kon andi-anggaan so pamilya to, lapud saray lalakin anak to et nansalita ray maoges sumpad siak. Kabat nen Eli so panggagawa rad saya, balet ag to ra pinatonda.

¹⁴Kanyan sinambaan kod pamilya nen Eli ya anggapoy bagat o saklang a makaekal ed dusa na sayan kaogsan a ginawa na pamilya nen Eli.

¹⁵Nandokul ni ya anggad kabwasan si Samuel; insan binmangon tan nilukasan to ray puirta na abung na Katawan. Antakot ton ibaga ed kinen Eli so nipaakar ed payawar.

¹⁶Tinawag nen Eli, Samuel, anak ko! Inmebat si Samuel, Wadya ak.

¹⁷Antoy imbagay Katawan ed sika? tepet nen Eli. Ag mo komun iyaamut ed siak. Ambelat so panusay Dios ed sika no ag mo ibagad siak iray amin ya imbaga to.

¹⁸Kanyan imbaga nen Samuel iray amin a bengatla; anggapoy inyamut to. Inkuanen Eli, Sikato so Katawan; gawaen toy antokaman ya isisipen ton maabig.

¹⁹Legan ya ombabaleg si Samuel, walad sikatoy Katawan tan pinapatua to ray amin ya imbabaga nen Samuel.

²⁰Kanyan amta na amin a totood Israel, manlapud baley na Dan ya anggad baley na Beer-seba, a tuan propita na Katawan si Samuel.

²¹Intuloy na Katawan ya ipaamta so sikaton dili ed Silo, a dimay pinayawaran tan akisalitaan tod kinen Samuel. Tan no mansalitay Samuel ondengel ya amin iray Israelita.