Read Pangasinan 1 SAMUEL 9 Bible Online

1 SAMUEL 9 - Pangasinan bible

1 SAMUEL 9

¹"Walay sakey a mayaman a lakin kabyangay tribu nen Benjamin a say ngaran to et Cis. Si Cis et anak nen Abiel tan apo nen Zeror tan kabyangay pamilya nen Becorat a kabyangay boleg nen Afia.

²"Walay anak ton laki a manngaray Saul; malangwer ni, atagey ni na sankarangan nen amin da ray totood Israel, tan sankaguapuan ed sikara.

³"Aminsan ya agew, abalang iray pigaran asno nen Cis. Kanyan inkuantod anak ton Saul, Mangitagar kay sakey ed saray aripen tan laka yon mananap ed saray asno.

⁴"Linma rad kapokdulan a dalin na Efraim tan diad dalin na Salisa, balet ag da ra naalmo; kanyan linma rad dalin na Saalim, balet andid man ira may asno. Linma ra sirin ya anggad pasen a sakop nen Benjamin, balet siansian ag da ni ra naalmo.

⁵"Nen akakar irad dalin na Zaf, inkuanen Saul ed aripen a kaiba to, Onsempet ta la, ta ompan tondaan la nen amak a nunoten iray asno tan sikata lay pampagaan to.

⁶"Inmebat imay aripen, Alagar ka! Walay sakey a toon masanto ed sayan baley. Bibirbiren da yan too, ta ontutua ray amin ya ibabaga to. Laen ta, ta ag la pigan nibaga to no iner so pakalmoan tad saramay asno.

⁷"Tinepet nen Saul, No onla tad sikato, antoy niiter tad sikato? Anggapo lay atilak a nakan ed pananginan ta, tan anggapoy antokaman a nayarin iter ta. Akin wala?

⁸"Inmebat imay aripen, Walay awit ko dian sakey a melag a pilak. Nayarian kon iter, et ibaga to no iner so pakalmoan tad saray asno.

⁹"Inmebat si Saul, Maung itan! Tala. Kanyan linma rad baley a panaayaman to may masanton too. Nen ontatatdang iran onlad baley, nabet da ray pigaran bibii ya onlan onasul. Tinepet dad saramay bibii, Wadya may managparles? (Diad saman a panaon, managparles so tawag dad sakey a propita, kanyan no walay malabay ya ontepet ed Dios, ikuanto, Onla tayod managparles.)

¹⁰On, wadya, ebat da ra may bibii. Ganatan yo, pian naabot yo ni, ta akaonay daiset nen say sikayo. Kasabi yod baley, narumog yod man. Sinmabi natan ed baley, ta saray totoo et onla ran mangibagat ed altar a walad toktok na pokdul. Ag ni mangan iray totoon naimbitaan ya anggad isabi to, ta nepeg to nin bindisionan iray bagat. Laki la natan, et narumog yon tampol, kasakbayan ya onlan mangan ed pokdul.

¹⁴Kanyan tinmuloy irad baley, et nen onloloob ira anengneng day Samuel a mamapaarap ed sikara ta onlad pasen a panangigalangan.

¹⁵Diad agew kasakbayan na insabi nen Saul, say Katawan inkuantod kinen Samuel,

¹⁶Nabwas, sakey ya onyan oras, ibakik ed sikay sakey a lakin kabyangay tribu nen Benjamin; lanaan mo ta sikatoy manoley ed saray totook ya Israelita, tan iyagel to rad saray Filisteo. Anengneng koy kairapan da ray totook, tan nadngel koy ikekerew dad siak na tulong.

¹⁷Nen anengneng nen Samuel si Saul, say Katawan inkuantod sikato, Sikato ya may lakin imbagak ed siak. Sikatoy manoley ed saray totook.

¹⁸Insan sinmingger si Saul ed kinen Samuel, diad abay na puirta, tan tinepet to, Ibagam pad siak, iner so panaayaman to may managparles?

¹⁹Inmebat si Samuel, Siak so managparles. Onona ka lan onlad pasen a panangigalangan. Mirongo kayon mangan ed siak diad sayan agew. Nabwas na kabwasan ebatan koy amin a tepet mo tan ibaki ta ka la.

²⁰No nipaakar ed saray asno a taloy agew la ran abalang, ag yo la ra pampapagaan; nalmo la ra. Balet siopay pampilpilalekan na saray totood Israel? Sikasika tan say pamilya na amam.

²¹Inmebat si Saul, Kabyangan ak na tribu nen Benjamin, say sankamelagan a tribu ed Israel, tan say pamilyak et sankamugmoan ed tribu. Akin, sirin, et onyay ibabagam ed siak?

²²Intagar nen Samuel si Saul tan saray aripen ed baleg a kuarto tan pinayorung to rad kabisira diad lamisaan a kawalaan na saray bisita, a sakey a talomplo ran amin.

²³Inkuanen Samuel ed lumuluto, Awit mo dia may karnin inter kod sikan ibiig mo.

²⁴Kanyan inala na samay lumuluto so pinilin karni a parti na ulpo tan inyan tod arap nen Saul. Inkuanen Samuel ed kinen Saul, Niay karnin nisinup para sika. Akan mo. Impaibiig kon para sika a kanen mod sayan bekta a kaibam iray inimbitaan ko. Kanyan si Saul karungo ton angan si Samuel ed saman ya agew.

²⁵Nen linmeksab iran onlad baley manlapud samay pasen a panangigalangan imbilkagan dad toktok na abung si Saul,

²⁶tan diman inmogip. Diad palbangon, tinawag nen Samuel si Saul a walad toktok na abung. Bangon ka la, ta papawilen ta ka la. Binmangon si Saul, tan linma ran dua nen Samuel ed dalan.

²⁷Kasabi rad ketegan na baley, inkuanen Samuel ed kinen Saul, Ibagam ed satay aripen ya onona la. Inmona la sirin imay aripen, tan intuloy nen Samuel so nansalita, Tilak ka ni dian magano, ta ipaamtak ed sikay imbaga na Dios.