Read Papantla Totonac 1 Corintios 4 Bible Online

1 Corintios 4 - Papantla Totonac bible

1 Corintios 4

¹Aquit cca̱huaniyá̱n caquila̱li̱kalhí̱u la̱ ixcha̱lhca̱tnaní̱n Cristo tí ca̱li̱ma̱paksi̱cani̱t natama̱sí la̱ta tú tze̱k laclhca̱ni̱t Dios quilacatacán.

²Y ¿niculá ixlí̱lat cha̱tum tasa̱cua? Pues tamaclacasquiní nama̱kantaxtí tú li̱ma̱paksi̱ni̱t ixpatrón.

³Y aquit, ¿chá tla̱n tasa̱cua? ¡Ni̱ xtacatzí! Pero ni̱ quincuenta tú lacpuhuaná̱tit huixín o tú quintali̱ya̱huá xa̱makapitzi cristianos xala ca̱quilhtamacú; ni̱ para aquit ccatzí para tla̱n o ni̱ tla̱n tasa̱cua aquit.

⁴Y ma̱squi ni̱ ctlahuani̱t tú nacli̱ma̱xanán ixlacatí̱n Dios ni̱ lá cuan ni̱ ckalhí tala̱kalhí̱n, porque huata Quimpu̱chinacán Cristo xli̱ca̱na catzí para cli̱n o ni̱ cli̱n tala̱kalhí̱n.

⁵Huá cca̱li̱huaniyá̱n, ni̱tí cali̱chihui̱nántit huixín ticu tla̱n o ticu ni̱ tla̱n tasa̱cua. Cakalhí̱tit hasta acxni namín Quimpu̱chinacán pues xlá ama ma̱xtú ca̱lakuá̱n la̱ta tú tze̱k taqui̱ni̱t ca̱paklhtu̱tá. Aná ama tasí para xli̱ca̱na scujli o ni̱ scujli amá cristiano tí Dios má̱xqui̱lh ixtascújut; y Dios ama ma̱xquí cha̱tunu ixtaxoko̱ncán la̱ ca̱mini̱ní. Ixapóstol Cristo tata̱lá tú ni̱ tla̱n ca̱lakchá̱n

⁶Li̱ta̱camán, aquit y Apolos cli̱tanu̱yá̱u ejemplos xlacata nama̱kachakxi̱yá̱tit tú cli̱chihui̱nama. Ni̱ calacputzátit tlahuayá̱tit tú ni̱ li̱ma̱paksi̱nani̱t Dios; jaé huamputún ni̱ calacsáctit cha̱tum tí ma̱s lakalhamaná̱tit y xa̱cha̱tum nalakmakaná̱tit.

⁷Porque ¿nicu li̱catzi̱yá̱tit xlacata cha̱tum apóstol ma̱s tla̱n que xa̱makapitzi? ¿A poco yaj aksaná̱tit Dios ca̱ma̱lakacha̱nini̱tán lhu̱hua ixcha̱lhca̱tnaní̱n xlacata naca̱makapa̱xahuayá̱n? Entonces, ¿hua̱nchi lactlancaná̱tit la̱mpara mi̱cstucán taka̱sni̱tántit mintapa̱xahua̱ncán ni̱ma̱ kalhi̱yá̱tit?

⁸Huixín cristianos xalac Corinto li̱tanu̱yá̱tit lakskalala tí hua̱k takalhí y yaj maclacasquiná̱tit quintachihui̱ncán, li̱tanu̱yá̱tit reyes tí ni̱tú tamakatzanká y aquín la̱ ni̱tú quila̱cxilá̱u; pues ojalá ixma̱paksi̱nantittá la̱ reyes xlacata na̱ ixquila̱ma̱xquí̱u, aquín tí cca̱ma̱lacatzuqui̱ni̱tán nali̱pa̱huaná̱tit Jesús ca̱na actzú pu̱táhui̱lh nac mimpu̱ma̱paksi̱ncán.

⁹Pues aquín tí cma̱kahuani̱yá̱u ixtachihuí̱n Cristo, Dios la̱mpara quinca̱li̱makxtakni̱tán hasta ixpakstá̱n. Cli̱tanu̱yá̱u la̱ tachi̱ní̱n ni̱ma̱ ama̱ca ca̱makni̱cán, y ni̱ caj maktum quinca̱li̱lakasta̱nancaná̱n ca̱quilhtamacú la̱ ángeles y la̱ cristianos.

¹⁰Aquín la̱mpara quinca̱li̱ma̱nu̱caná̱n laktakalhí̱n porque aquín ni̱ cli̱ma̱xananá̱u cma̱kantaxti̱yá̱u la̱ta tú quinca̱li̱ma̱paksi̱yá̱n Cristo, y huixín li̱tanu̱yá̱tit lakskalalán porque huata tlahuayá̱tit tú ca̱mini̱niyá̱n xlacata ni̱ naca̱si̱tzi̱nicaná̱tit. Huixín puhuaná̱tit aquín ni̱tú cli̱macuaná̱u, y li̱tanu̱yá̱tit lactali̱pa̱u; y hasta puhuaná̱tit ma̱s ca̱li̱pa̱huancaná̱tit porque aquín cani̱huá quinca̱lakmakancaná̱n.

¹¹Tla̱n lactlancaná̱tit para lacasquiná̱tit, porque xli̱ca̱na aquín cakxtakajnani̱táu, cquilhtzincsni̱táu, ckalhtini̱táu y catunu ni̱ para quilhaka̱tcán ckalhi̱ni̱táu, y todavía cristianos quinca̱kkaximi̱yá̱n, ni̱ ckalhi̱yá̱u quinchiccán,

¹²y cli̱scujá̱u quimacancán xlacata nacua̱yaná̱u, lhu̱hua cristianos quinca̱li̱kalhkama̱naná̱n y aquín hua̱k cpa̱ti̱yá̱u;

¹³quinca̱liakskahuinancaná̱n y aquín la̱tiyá ca̱li̱tlá̱n cca̱ma̱kalhchihui̱ni̱yá̱u cristianos. Hasta chí aquín cmini̱táu li̱tamakxtaká̱u ixli̱lacaxacacán lactali̱pa̱u cristianos o la̱ ixpalhmacán ni̱ma̱ tla̱n tamakán o talacta̱yamí. Pablo li̱tanú ixpuxcucán tí tali̱pa̱huán Jesús

¹⁴Aquit ni̱ cca̱huanimá̱n la̱ cscujni̱táu xlacata nacca̱ma̱ma̱xani̱yá̱n la̱ lactlancaná̱tit. Tó. Aquit cca̱lakalhamaná̱n la̱ quincamán y clacasquín cama̱kachakxí̱tit tancs talacapa̱stacni.

¹⁵Porque ma̱squi ixtámilh cha̱cá̱u mi̱lh ma̱kalhtahuake̱naní̱n tí ixca̱li̱ta̱chihui̱nán Cristo, huixín huata kalhi̱yá̱tit cha̱tum mimpuxcucán tí ca̱ma̱lacatzuquí̱n nali̱pa̱huaná̱tit Cristo y namá mimpuxcucán aquit; pues aquit cca̱li̱ta̱chihui̱nán ixtalakalhamá̱n la̱ tla̱n ca̱lakma̱xtuyá̱n Cristo;

¹⁶y clacasquín camakslihuekétit quilatáma̱t.

¹⁷Aquit cama ma̱lakachá nac mimpu̱latama̱ncán cha̱tum tí cma̱lacatzuqui̱ni̱t nali̱pa̱huán Cristo y cli̱ma̱nú la̱ quinkahuasa tí snu̱n clakalhamán huanicán Timoteo. Xlá ama ca̱ma̱lacapa̱stacayá̱n la̱ quili̱latama̱tcán aquín tí li̱pa̱huaná̱u Cristo, y tú cca̱ma̱si̱ní cristianos tí cca̱ma̱kalhchihui̱ní.

¹⁸Aquit ccatzí makapitzi huixín puhuaná̱tit ni̱cxni cama ca̱lakana̱chá̱n porque cca̱jicuaniyá̱n o caj cca̱quilhpuhuaniyá̱n.

¹⁹Pero para Dios lacasquín sok cama ca̱lakana̱chá̱n; y entonces cama ca̱cxila namá tí talactlancán para xli̱ca̱na tatlahuá tú tatzaksá tama̱sí o chu̱ta talactlancán tachihui̱nán.

²⁰Porque tí li̱pa̱huán Dios ni̱ huata chihui̱nán, sino que ma̱kantaxtí tú li̱chihui̱nán.

²¹Chí calacpuhuántit, ¿lacasquiná̱tit cacca̱lakanchá̱n xlacata nacca̱kahuaniyá̱n, o lacasquiná̱tit nacca̱lakana̱chá̱n ca̱li̱tlá̱n y cca̱pa̱xqui̱yá̱n la̱ quincamán?