Read Papantla Totonac Apocalipsis 7 Bible Online

Apocalipsis 7 - Papantla Totonac bible

Apocalipsis 7

¹La̱ quili̱ma̱lacahua̱niko̱lh hua̱k la̱ta tú cácxilhli a̱stá̱n cacxilhpá cha̱tati ángeles stucaj ixtaya̱na cha̱tunu la̱ta nac ixli̱tanke̱ta̱ti ca̱quilhtamacú xlacata natalacati̱ta̱yá u̱n. Ixli̱puntzú acs tatu̱tako̱lh y ni̱ní itsnoknán u̱n nac ca̱tiyatni y na̱ chuná nac pupunú, ni̱ para akatum quihui ixtatzahuají.

²Na̱ cacxilhpá a̱cha̱tum ángel minchá pakán ní lacapulha̱chá chichiní ixchipati̱lhá ixsello xastacnán Dios. Jaé ángel con hua̱k ixli̱pixtlihueke ca̱ma̱ktási̱lh amá cha̱ta̱ti ángeles ni̱ma ixtamaklhti̱naní̱t li̱ma̱paksí̱n xlacata tlan natalactlahuakó la̱ta tú huí nac ca̱tiyatni y na̱ chuná nac pupunú,

³y chuné ca̱huánilh: ―Cakalhí̱tit puntzú, ni̱ naj tú caca̱tlahuanítit tú huí nac ca̱tiyatni y nac pupunú, y ni̱ para ca̱quihui̱tni porque ni̱ naj ca̱lhca̱nicani̱t nac ixmu̱ncán hua̱k tí tamacama̱xqui̱ni̱t ixlatamatcán Dios.

⁴Ixli̱puntzú ccátzilh niculá cha̱li̱t sellar ca̱tlahuaca acxni cha̱tum quihuánilh la̱ cha̱li̱t ixtahuani̱t hua̱k xlacán: aktum ciento a̱ti̱puxumata̱ti mi̱lh la̱ta ixli̱ti̱lanca pu̱latama̱n xalac Israel; y chuné ca̱pu̱tlakaca:

⁵Akcu̱tuy mi̱lh ixli̱talakapasni Judá,akcu̱tuy mi̱lh ixli̱talakapasni Rubén,akcu̱tuy mi̱lh ixli̱talakapasni Gad,

⁶akcu̱tuy mi̱lh ixli̱talakapasni Aser,akcu̱tuy mi̱lh ixli̱talakapasni Neftalí,akcu̱tuy mi̱lh ixli̱talakapasni Manasés,

⁷akcu̱tuy mi̱lh ixli̱talakapasni Simeón,akcu̱tuy mi̱lh ixli̱talakapasni Leví,akcu̱tuy mi̱lh ixli̱talakapasni Isacar,

⁸akcu̱tuy mi̱lh ixli̱talakapasni Zabulón,akcu̱tuy mi̱lh ixli̱talakapasni José,akcu̱tuy mi̱lh ixli̱talakapasni Benjamín. Li̱po̱ktum cristianos tí talhaka̱ni̱t lakstarankán lháka̱t

⁹La̱ ckaxmatko̱lh la̱ cha̱li̱t sellar ixca̱tlahuacani̱t cacxilhpá aktum li̱po̱ktum cristianos snu̱n lhu̱hua ixuani̱t que hasta ni̱ lá tí hua̱k catica̱pu̱tlakako̱lh la̱ta ixli̱lhu̱huacán, ti̱pa̱lhu̱hua ixtalacahua̱ncán ixtakalhí y ti̱pa̱katzi ixtachihui̱ncán, catu̱ya̱huá ixlatama̱tcán y xala cani̱ya̱huá pu̱latama̱n. Na̱ hua̱k ixtalhaka̱ni̱t puro lakstarankán lháka̱t y cha̱tunu ixtachipani̱t ixpakán tzú̱csuat, y aná stucaj ixtaya̱na ixlacatín amá tí ixcurucsui nac lanca ma̱paksi̱na pu̱táhui̱lh y na̱ chuná cxlacatí̱n amá tí li̱tanú la̱ borrego.

¹⁰Y acxtum ixli̱pixtlihuekecán ixtatlí y chuné ixtahuán:Capa̱xcatcatzi̱níu Quinti̱cucán Dios ni̱ma huí nac lanca ma̱paksi̱na pu̱táhui̱lhporque xlá quinca̱lakalhamán y quinca̱lakma̱xtún,y na̱ chuná amá tí li̱tánu̱lh la̱ tantum borrego porque xokó̱nalh quilacatacán.

¹¹Entonces hua̱k ángeles ni̱ma ixtastiliko̱ni̱t amá pu̱ma̱paksí̱n y na̱ chuná amá lakko̱lún y amá cha̱ta̱ti la̱ quitzistancaní̱n, acxtum tatatzokóstalh y tataquilhpu̱tako̱lh ixlacatí̱n amá lanca ma̱paksi̱na pu̱táhui̱lh y tzúculh talakachixcuhuí Quinticucán Dios,

¹²y chuné ixtahuán:Huatiyá huix tí mini̱niyá̱n siempre nakalhi̱ya hua̱k li̱ma̱paksín, hua̱k li̱tlihueke, hua̱k li̱skalala, y hua̱k li̱pá̱huat;y huatiyá huix quiDioscán tí camá̱n lakachixcuhui̱yá̱u, pa̱xcatcatzi̱niyá̱u, y ca̱cni̱yá̱u mintalakalhamá̱n cani̱cxnihuá quilhtamacú. Chuná calalh, amén.

¹³Acxni cha̱tum amá lakko̱lún quintalacatzuhuí̱nilh y quinkalhasquínilh: ―¿Catzi̱ya huix ticu namá tí talhaka̱ni̱t puro lakstarankán lháka̱t, y nicu tamini̱tanchá?

¹⁴―Tó, ni̱ ccatzí tí namá, huata huix catzi̱ya ―ckalhtí̱nalh aquít. Y xlá quihuánilh: ―Huá jaé tí tata̱lako̱ni̱t lanca ixtalakaputza̱tcán caj xlacata ixtali̱pa̱huán amá tí li̱tánu̱lh la̱ borrego y xokó̱nalh ixlacatacán y xlá ixkalhni ca̱li̱cheke̱ni̱t y ca̱li̱ma̱snapapi̱ni̱t ixlhaka̱tcán.

¹⁵Huá xlacata xlacán chí taya̱na ixlacatí̱n amá lanca ma̱paksi̱na pu̱táhui̱lh ní huí Dios, pues ca̱tzi̱sní la̱ ca̱cuhui̱ní talakachixcuhui̱ma̱na y tamacuanima̱na amá tí curucs huí nac ixpu̱ma̱paksí̱n y xlá ca̱li̱maktakalha hua̱k ixtalakalhamá̱n

¹⁶xlacata ya̱cxni nataliakxtakajnán tatzíncsnit, ni̱ porque takálhtit, yaj porque chichiní nacama̱chichiní ixmacnicán.

¹⁷Porque acxni xlacán natakalhtí amá tí li̱tanú la̱ borrego ixlacatí̱n Dios naca̱maktakalha la̱ xalakskatá̱n ixborregos, y naca̱lí̱n ca̱ma̱kotí ní huí aktum taxtunú ni̱ma ni̱cxni nali̱takalhtipará. Y Quinticucán Dios cha̱tunu naca̱xiqui̱ní nac ixlakastapucán hua̱k ixlakaxtajatcán.