Read Papiamento Génesis 12 Bible Online

Génesis 12 - Papiamento bible

Génesis 12

¹Un dia SEÑOR a bisa Abram: ‘Bandoná bo tera, bo famia i bo hendenan i bai e tera ku Mi lo mustra bo.

²Bo desendientenan lo bira un nashon grandi; lo Mi bendishoná bo i hasi bo famoso i lo bo ta un bendishon pa otronan.

³Lo Mi bendishoná esnan ku bendishoná bo i maldishoná esnan ku maldishoná bo. Huntu ku bo lo Mi bendishoná tur generashon na mundu.’

⁴Abram a bai for di Haran manera SEÑOR a mand'é. E tabatin 75 aña dia el a sali pa bai e pais Kanaan. Su kasá Sarai i su subrina Lòt a bai huntu kuné. Nan a bai ku tur loke nan tabatin. Tambe nan a bai ku e katibunan ku nan a tuma na Haran. Ora nan a yega Kanaan,

⁶Abram a krusa henter e region te ora el a yega e lugá santu serka di Shikem kaminda tabatin e palu grandi di ekel di Morè. Den e tempu ei e kanaanitanan tabata biba einan.

⁷Einan SEÑOR a aparesé na Abram i a bis'é: ‘E tera akí lo Mi duna bo desendientenan.’ I Abram a traha un altá einan na honor di SEÑOR ku a aparesé n'e.

⁸Despues el a bai den serunan na parti ost di e stat Betel. Einan el a lanta su tènt, ku na wèst e stat Betel i na ost e stat Ai. Einan tambe el a traha un altá i a invoká nòmber di SEÑOR.

⁹Despues Abram a sigui biaha di un lugá pa otro den direkshon zùit bai desierto di Neguèb.

¹⁰Ora hamber a kuminsá reina den e region ei, Abram a bai Egipto pa keda poko tempu aya, pasobra kaminda e tabata biba tabatin skarsedat grandi di kuminda.

¹¹Ora e tabata serka di yega Egipto, Abram a bisa su kasá Sarai: ‘Tende, mi sa ku bo ta un bunita muhé.

¹²Ora e egipsionan mira bo nan lo bisa: “E señora akí ta kasá di e hòmber ei.” Nan lo mata mi i laga abo na bida.

¹³Bisa nan ku ta mi ruman muhé bo ta, ya pa bo via nan lo laga mi na bida i lo bai mi bon.’

¹⁴Ora Abram a yega Egipto, e egipsionan a mira kon bunita Sarai tabata.

¹⁵E funshonarionan di fárao, rei di Egipto, tambe a mir'é i nan a bai gaba fárao kon bunita Sarai tabata. P'esei fárao a duna òrdu pa trese Sarai na su palasio.

¹⁶Pa Sarai su via, fárao a trata Abram mashá bon. El a regal'é karné, baka, katibu, buriku i kamel.

¹⁷Pero pa motibu di e mesun Sarai ei, esposa di Abraham, SEÑOR a kastigá fárao i su famia ku plaga pisá.

¹⁸E ora ei fárao a manda yama Abram i bis'é: ‘Kiko bo a hasi ku mi? Pakiko bo no a bisa mi ku ta bo kasá e ta?

¹⁹Pakiko bo a bisa mi ku ta bo ruman e ta i bo a laga mi tum'é komo mi kasá? Wèl, ata bo kasá aki, tum'é pa bo i laga kai.’

²⁰I fárao a duna òrdu pa saka Abram, su kasá i tur loke e tabatin for di Egipto.