Read Papiamento Génesis 13 Bible Online

Génesis 13 - Papiamento bible

Génesis 13

¹Abram a sali for di Egipto huntu ku su kasá i ku tur su propiedat bai Neguèb. Su subrina Lòt tambe a bai huntu kuné.

²Abram tabata mashá riku; e tabatin oro, plata i hopi bestia.

³For di Neguèb el a biaha di un lugá pa otro te ora el a yega Betel. Na e lugá entre Betel i Ai, kaminda el a yega di lanta su tènt i un altá, el a invoká nòmber di SEÑOR.

⁵Lòt, ku tabata biaha huntu ku Abram, tambe tabatin karné, kabritu, baka i tènt.

⁶Ma nan no por a keda biba huntu pasobra e lugá no tabatin basta kuminda pa tantu bestia asina.

⁷P'esei e wardadónan di bestia di Abram i esunnan di Lòt tabatin pleitu ku otro. Ademas tabata asina ku e kanaanitanan i e perizitanan tabata biba einan.

⁸Un dia Abram a bisa Lòt: ‘Nos ta famia; no ta bon pa tin pleitu entre nos, ni entre bo wardadónan di bestia i esnan di mi.

⁹Ata tur e tera bo dilanti; mihó nos bai for di otro. Si bo bai nort, mi ta bai zùit, si bo bai wèst mi ta bai ost.’

¹⁰Lòt a wak rònt i el a mira kon riku na awa e region banda di riu Yordan tabata. Promé ku SEÑOR a destruí Sódoma i Gomora e region akí, te na Soar, tabata mes bunita ku hòfi di Eden, [16], mes fértil ku e pais Egipto.

¹¹Asina ta ku Lòt a skohe henter e region banda di riu Yordan i el a bai den direkshon ost. Abram i Lòt a kita for di otro.

¹²Abram a keda biba na Kanaan. Lòt a bai biba den e statnan den vaye di Yordan i el a lanta su tèntnan pegá ku Sódoma.

¹³Pero e habitantenan di Sódoma tabata mashá mal hende i nan tabata hasi piká grandi kontra SEÑOR.

¹⁴Despues ku Abram i Lòt a kita for di otro, SEÑOR a bisa Abram: ‘Wak for di kaminda bo ta pará den direkshon nort i zùit, ost i wèst.

¹⁵Tur e tera ku bo ta mira, lo Mi duna abo i bo desendientenan pa semper.

¹⁶Lo Mi hasi bo desendientenan mes tantu ku e stòf ku tin riba mundu. Meskos ku ta imposibel pa konta e stòf ku tin riba mundu, mes imposibel lo ta pa konta bo desendientenan.

¹⁷Lanta ariba i pasa tur kaminda den e pais di ost pa wèst, di nort pa zùit; pasobra lo Mi duna bo henter e pais.’

¹⁸E ora ei Abram a baha su tèntnan i a bai biba pegá ku e stat Hebron, banda di e palunan di ekel di Mamre. Aki el a lanta un altá na honor di SEÑOR.