Read Papiamento Génesis 14 Bible Online

Génesis 14 - Papiamento bible

Génesis 14

¹Den e tempu ei Amrafèl, rei di Shinar, Ariok, rei di Elasar, Kedar-Laomèr, rei di Elam, i Tidal, rei di Goim,

²tabata na guera ku sinku rei: Bèra, rei di Sódoma, Birsha, rei di Gomora, Shinab, rei di Adma, Shèmebèr, rei di Seboim, i rei di Bèla, un pueblo tambe konosí komo Soar.

³E sinku reinan akí a bini huntu den e vaye Sidim, kaminda awor akí Laman Morto ta.

⁴Diesdos aña largu Kedar-Laomèr a dominá e sinku reinan i den e di diestres aña e reinan akí a lanta kontra dje.

⁵E aña despues Kedar-Laomèr i e reinan ku tabata na su banda a bai den region di Ashtarot-Karnaim i einan nan a derotá e refaítanan; despues nan a derotá e zuzitanan na Ham i e emitanan na Shawe Kiriataim.

⁶Tambe nan a derotá e horitanan den e serunan di Seír kaminda nan tabata biba i a persiguí nan te El Paran ku ta keda na rant di desierto.

⁷Despues Kedar-Laomèr i su hendenan a regresá En-Mispat, yamá Kadesh tambe. Nan a destruí tur loke nan a topa den e region di e amalekitanan i a hasi meskos den e region Hason-Tamar kaminda e amoritanan tabata biba.

⁸Despues e reinan di Sódoma, Gomora, Adma, Seboim i Bèla a bini huntu den vaye di Sidim,

⁹pa nan sinku bringa kontra Kedar-Laomèr, Tidal, Amrafèl i Ariok, ku ta e reinan di Elam, Goim, Shinar i Elasar.

¹⁰Vaye di Sidim tabata yen yen di pos di breu. Ora e reinan di Sódoma i Gomora tabata hui, nan a kai den e posnan ei. E otro reinan a hui bai den seru.

¹¹E reinan ku a gana e bataya a bai ku tur kuminda i kos di balor ku tabatin na Sódoma i Gomora.

¹²Tambe nan a bai ku Lòt, subrina di Abram, i tur loke e tabatin, komo Lòt tabata biba na Sódoma.

¹³E ora ei un hòmber ku a logra hui a bin konta Abram, e hebreo, loke a sosodé. E tempu ei Abram tabata biba banda di e palunan di ekel ku tabata di e amorita Mamre. Mamre i su rumannan Eshkol i Aner a yega di sera un pakto ku Abram.

¹⁴Ora Abram a tende ku nan a kohe su subrina prezu el a reuní e hòmbernan ku a nase serka dje i ku por a usa arma. Nan tabata 318 na tur. Ku nan el a sali persiguí e reinan te na e siudat Dan.

¹⁵Den anochi Abram i su hendenan a parti den grupo i Abram a derotá e reinan. El a persiguí nan te na Hoba, ku ta keda nort di e stat Damasko.

¹⁶El a bini bèk ku tur e rikesa ku nan a bai kuné. Asina Abram a logra regresá ku su subrina Lòt i rekobrá tur esaki su propiedat tambe. Tambe el a bini bèk ku e muhénan i tur sobrá hende.

¹⁷Ora Abram a bini bèk, despues di su viktoria riba Kedar-Laomèr i e otro reinan, rei di Sódoma a sali pa risibié den vaye di Shawe ku awor yama vaye di rei.

¹⁸Melkisedèk, rei di Shalem, ku tabata saserdote di Dios Altísimo, a trese pan i biña pa Abram.

¹⁹El a bendishoná Abram ku e palabranan: ‘Dios Altísimo, Kreador di shelu i tera, bendishoná bo.

²⁰Alabá sea Dios Altísimo ku a entregá bo enemigunan den bo man.’ Abram a duna Melkisedèk un désimo parti di tur loke el a kita for di e reinan.

²¹Rei di Sódoma a bisa Abram: ‘Duna mi e hendenan i abo keda ku tur kos.’

²²Pero Abram a kontestá: ‘Mi ta hura na SEÑOR, na Dios Altísimo, Kreador di shelu i di tera,

²³ku mi no ta bai ku nada di bo, ni un pida hilu ni un strèp di sandalia, ya bo no por bisa despues ku ta abo a hasi mi riku.

²⁴Mi no ke nada pa mi mes, ku no ta loke mi hendenan a gasta na kuminda. Tambe mi ke pa Aner, Eshkol i Mamre, ku a kompañá mi, haña nan parti di e botin.’