Read Papiamento Génesis 17 Bible Online

Génesis 17 - Papiamento bible

Génesis 17

¹Tempu Abram tabatin 99 aña, SEÑOR a aparesé n'e i a bis'é: ‘Ami ta Dios Todopoderoso; sòru pa semper bo obedesé Mi i biba un bida perfekto den mi bista.

²Lo Mi sera un aliansa ku bo: lo Mi sòru pa bo desendientenan bira numeroso.’

³E ora ei Abram a bùig te na suela. Dios a sigui bis'é:

⁴‘Esaki ta e aliansa ku Mi ta sera ku bo: lo bo ta tata di hopi nashon,

⁵i lo bo no yama Abram mas. For di awor bo nòmber lo ta Abraham,[18] pasobra Mi ta hasi bo tata di hopi nashon.

⁶Lo Mi sòru pa bo haña hopi desendiente; for di bo lo nase nashonnan i asta lo tin rei den bo desendientenan.

⁷Esaki ta e aliansa ku pa semper Mi ta sera ku bo i ku tur bo desendientenan benidero. Lo Mi ta bo Dios i Dios di bo desendientenan.

⁸Lo Mi duna abo i bo desendientenan henter e pais Kanaan, kaminda bo ta biba komo strañero awor akí. Lo e ta boso propiedat pa semper; i Ami lo ta boso Dios.’

⁹Ademas Dios a bisa Abraham: ‘I loke ta abo, atené bo na mi aliansa; abo i tur bo desendientenan den generashonnan benidero.

¹⁰Esaki ta mi aliansa ku boso i boso desendientenan: tur boso hende hòmbernan mester risibí sirkunsishon.

¹¹Boso mester laga kòrta e kueru na parti dilanti di boso órgano seksual komo señal di e aliansa entre Ami ku boso.

¹²Di awe en adilanti tur boso yu hòmbernan mester risibí sirkunsishon riba e di ocho dia di nan nasementu. Esei ta konta tambe pa tur esnan ku no ta bo desendiente, pero sí a nase den bo kas òf bo a kumpra serka strañero.

¹³Sin eksepshon nan tur mester risibí sirkunsishon. Asina mi aliansa lo keda marká den boso kueru komo un aliansa eterno.

¹⁴Pero tur hòmber ku nenga di hasié mester keda eliminá for di su pueblo pasobra el a kibra mi aliansa.’

¹⁵Dios a sigui bisa Abraham: ‘Bo esposa lo no yama Sarai mas, ma Sara.[19]

¹⁶Lo Mi bendishon'é i pa medio di dje lo Mi duna bo un yu hòmber; sí, lo Mi bendishon'é i lo e bira mama di hopi nashon. Asta lo tin rei den su desendientenan.’

¹⁷E ora ei Abraham a bùig te na suela. El a hari i pensa: ‘Un hòmber di shen aña por bira tata ainda? Sara lo por haña yu ku nobenta aña?’

¹⁸El a bisa Dios: ‘No ta mihó Bo duna Ismael e bendishon akí?’

¹⁹Pero Dios a kontest'é: ‘Nò! Bo kasá Sara lo duna bo un yu i lo bo yam'é Isak.[20] Ta kuné lo Mi sera mi aliansa komo un aliansa eterno ku lo konta pa su desendientenan tambe.

²⁰Pa loke ta trata Ismael, Mi a skucha bo i lo Mi bendishon'é. Lo e tin hopi yu i hopi desendiente. Lo e ta tata di diesdos rei i su desendientenan lo forma un nashon grandi.

²¹Pero mi aliansa lo Mi sera ku bo yu Isak, e yu ku Sara lo haña otro aña den e mesun tempu akí.’

²²Ora Dios a kaba di papia ku Abraham, El a bai lag'é.

²³E dia ei mes Abraham a hasi sirkunsishon ku su yu Ismael, ku tur e hòmbernan ku a nase den su kas i ku esnan ku el a kumpra. El a hasi manera Dios a orden'é.

²⁴Abraham tabatin nobentinuebe aña i su yu Ismael diestres, dia nan a risibí sirkunsishon.

²⁶Abraham i su yu Ismael a risibí sirkunsishon riba e mesun dia,

²⁷huntu ku tur e hòmbernan ku tabata pertenesé na su kas, sea ku nan a nase na su kas òf ku el a kumpra nan.