Read Papiamento Génesis 20 Bible Online

Génesis 20 - Papiamento bible

Génesis 20

¹For di e lugá kaminda e tabata biba Abraham a bai e region Neguèb. Ei el a keda biba entre Kadesh i Sur. Despues el a biba komo strañero na Guerar.

²Ei el a laga sa ku su kasá Sara ta su ruman. P'esei Abimelèk, rei di Guerar, a duna òrdu pa buska Sara.

³Pero den anochi Dios a papia ku Abimelèk den un soño: ‘Bo ta bai muri pasobra e muhé akí ku bo a manda buska ta muhé kasá.’

⁴Abimelèk awor no a tene relashon ainda ku e muhé i el a kontestá: ‘Señor, Bo ke mata hende ku no a hasi malu?

⁵Abraham mes no a bisa mi ku e muhé ta su ruman? I e muhé tambe a bisa ku Abraham ta su ruman. Di manera ku mi a aktua inosentemente i sin mal intenshon.’

⁶E ora ei Dios a kontest'é den e soño: ‘Mi tambe sa ku bo a aktua inosentemente. P'esei tambe Mi a sòru pa bo no peka kontra Mi. Mi no a laga bo mishi ku e muhé.

⁷Hib'é bèk serka su kasá. E kasá ta un profeta, i e por resa pa bo keda na bida. Ma si bo no hiba su esposa bèk, sa ku abo i huntu ku bo tur bo hendenan lo muri sigur.’

⁸Su manisé trempan Abimelèk a yama tur su funshonarionan i a konta nan henter e asuntu. Nan a haña mashá miedu.

⁹Despues Abimelèk a yama Abraham i a bis'é: ‘Kiko bo a hasi ku nos? Ki daño mi a hasi bo ku bo a hinka ami i mi pueblo den un piká asina grandi? E kos ku bo a hasi ku nos ei no por!’

¹⁰Tambe Abimelèk a bisa Abraham: ‘Kiko a drenta bo, ku bo a hasi e kos ei?’

¹¹Abraham a kontest'é: ‘Mi a kere ku na e lugá akí no tin rèspèt di Dios i ku lo mata mi pa motibu di mi esposa.

¹²Fuera di esei, e ta mi ruman di bèrdat: e ta yu di mi tata, pero no di mi mama. Asina mi por a kasa kuné.

¹³Ora Dios a laga mi biaha di un lugá pa otro leu for di mi famianan, mi a bisa Sara: “Bo por demostrá kon bon bo ke mi dor di bisa tur kaminda ku nos yega, ku nos ta ruman.” ’

¹⁴E ora ei Abimelèk a regalá Abraham karné, kabritu, baka i katibu. Tambe el a entreg'é su kasá bèk.

¹⁵El a bisa Abraham: ‘Mira, mi pais ta na bo òrdu! Bai biba kaminda bo ke.’

¹⁶Sara el a bisa: ‘Mi ta duna bo ruman mil plaka di plata pa proba bo bon nòmber. Tur hende ku ta huntu ku bo lo sa ku bo no a hasi nada malu.’

¹⁷E ora ei Abraham a resa na Dios i Dios a kura Abimelèk. Dios a kura su kasá i su kriánan tambe di manera ku nan por a haña yu atrobe.

¹⁸Pasobra a kousa di Sara, esposa di Abraham, SEÑOR a pone ku e muhénan den kas di Abimelèk no por a haña yu mas.