Read Papiamento Génesis 24 Bible Online

Génesis 24 - Papiamento bible

Génesis 24

¹Abraham tabata hopi bieu kaba i den tur kos SEÑOR a bendishon'é.

²Un dia Abraham a yama e sirbidó di mas bieu den su kas, ku tabata enkargá ku tur loke e tabatin. El a bis'é: ‘Pone bo man na mi bèl di pia.

³Hura na SEÑOR, e Dios di shelu i di tera, ku lo bo no buska un mucha muhé pa mi yu Isak aki na Kanaan, kaminda mi ta biba.

⁴Pero ku lo bo bai e pais kaminda mi tabata biba i ku aya serka mi famianan, lo bo skohe un mucha muhé p'e.’

⁵E sirbidó a kontestá Abraham: ‘Kiko mi mester hasi si e mucha muhé nenga di bini Kanaan ku mi? Mi mester hiba Isak e ora ei e pais ku abo a bandoná?’

⁶Abraham a rospond'é: ‘Nò, di ningun manera bo no mester hib'é aya.

⁷SEÑOR, Dios di shelu, a kita mi for di mi famianan i a saka mi for di e pais kaminda mi a nase. El a papia ku mi i a hura mi ku lo E duna mi desendientenan e pais Kanaan akí. Lo E manda su angel bo dilanti, di manera ku bo por skohe un mucha muhé di aya pa mi yu.

⁸Pero si e mucha muhé nenga di bini ku bo, bo no ta mará mas na e huramentu akí. Ta abo no mester hiba Isak aya.’

⁹E ora ei e sirbidó a pone su man na Abraham su bèl i a hura ku lo e hasi loke su shon Abraham a pidié.

¹⁰Despues el a skohe dies kamel i tur sorto di kos di balor di su shon i a sali pa Mesopotamia, pa bai e stat kaminda Nahor a biba.

¹¹Ora e sirbidó a yega pegá ku e stat el a laga su kamelnan hinka rudia serka di un pos pa nan sosegá. Solo tabata bahando i tabata den e oranan ku e hende muhénan tabata sali for di stat pa bai saka awa na pos.

¹²El a kuminsá resa: ‘SEÑOR, Dios di mi shon Abraham, laga mi logra awe. Demostrá bo bondat na mi shon Abraham.

¹³Mi ta pará awor akí na e pos kaminda e mucha muhénan di stat ta bin saka awa.

¹⁴Lo mi pidi un di nan: “Laga mi bebe poko awa for di bo poron.” Laga pa e mucha muhé, ku Abo a skohe pa bo sirbidó Isak, rospondé: “Bebe numa, lo mi saka awa pa bo kamelnan tambe bebe.” Asina lo mi haña sa sigur ku bo a demostrá Abraham, mi shon, bo bondat.’

¹⁵E no a kaba di hasi su orashon, ku el a mira un mucha muhé ta bini for di stat ku un poron riba su skouder. Tabata Rebeka, yu di Betuel. Betuel tabata yu di Milka ku Abraham su ruman Nahor.

¹⁶Rebeka tabata hóben; e tabata un mucha muhé mashá bunita i niun hòmber no a tene relashon kuné ainda. El a baha bai na e pos, yena su poron ku awa i a subi bini ariba.

¹⁷E sirbidó a kore lihé bai kontr'é i pidié: ‘Laga mi bebe poko awa for di bo poron.’

¹⁸Rebeka a rospondé: ‘Sigur no, shon.’ Mesora el a baha e poron for di su skouder, want'é den su man i a laga e sirbidó bebe.

¹⁹Ora e sirbidó a kaba di bebe Rebeka a bis'é: ‘Lo mi saka awa pa bo kamelnan tambe, ya nan por bebe mes tantu ku nan ke.’

²⁰Lihé el a basha e awa for di su poron den e baki, el a bai e pos bèk i a saka awa pa tur e kamelnan.

²¹E hòmber a para wak sin bisa nada, pasobra e ker a sa sigur ku SEÑOR a lag'é logra su mishon.

²²Ora e kamelnan a kaba di bebe, e hòmber a kohe un renchi di oro, ku tabata pisa sinku gram, i dos armbant di oro, kada un di mas o ménos sinkuenta gram.

²³El a bisa: ‘Yu di ken bo ta? Bisa mi, tin lugá den kas di bo tata ku nos por keda pasa nochi?’

²⁴Rebeka a kontest'é: ‘Mi ta yu di Betuel, e yu hòmber di Milka ku Nahor.

²⁵Serka nos tin sufisiente lugá pa boso pasa nochi. Tambe tin basta yerba seku i kuminda pa e kamelnan.’

²⁶E ora ei e hòmber a bùig te na suela i a adorá SEÑOR.

²⁷El a bisa: ‘Alabá sea SEÑOR. SEÑOR a demostrá mi shon bondat i fieldat i a guia mi, hiba mi derechitu kas di mi shon su famianan.’

²⁸E mucha muhé a kore bai kas di su mama pa konta loke a pas'é.

²⁹Awor Rebeka tabatin un ruman hòmber ku yama Laban. Asina Laban a mira e renchi i e armbantnan na man di su ruman muhé i el a tende e ruman konta loke e hòmber a bisa, el a kore sali bai e pos kaminda ainda e hòmber tabata pará ku su kamelnan.

³⁰

³¹El a bis'é: ‘Ban ku mi, bo tin bendishon di SEÑOR. Di kon bo a keda para akifó? Ya mi a prepará lugá den kas pa bo i tin kaminda di keda pa bo kamelnan!’

³²E ora ei e hòmber a bai kas kuné. A kita sia di e kamelnan i duna nan yerba seku i kuminda. Tambe a trese awa pa e sirbidó i su kompañeronan laba pia.

³³Ora a pone kuminda pa e sirbidó, el a bisa ku e no ta kome promé ku e bisa loke e tin na su kurason. Laban a bis'é: ‘Dal bai.’

³⁴E ora ei el a bisa: ‘Mi ta sirbidó di Abraham.

³⁵SEÑOR a bendishoná mi shon mashá i a hasié riku. El a dun'é karné, kabritu i baka, oro i plata, katibu hòmber i muhé, kamel i buriku.

³⁶Dia Sara, kasá di mi shon, tabata bieu kaba, el a duna mi shon un yu hòmber. Mi shon a duna e yu akí tur su propiedatnan.

³⁷I el a pone mi hura ku lo mi no buska un mucha muhé pa e yu aya na Kanaan, kaminda e ta biba.

³⁸El a manda mi bai serka famia di su tata pa buska un mucha muhé akí pa e yu.

³⁹Mi a bisa mi shon ku podisé e mucha muhé no ke bini ku mi.

⁴⁰Pero el a kontestá: “SEÑOR, e Dios ku semper mi a obedesé, lo laga su angel bai ku bo pa tur kos bai bon di manera ku den mi famianan mes lo bo haña un mucha muhé pa mi yu.

⁴¹Solamente si mi famianan nenga di laga e mucha muhé bai ku bo, lo bo no ta mará mas na loke bo a hura.”

⁴²Ora mi a yega awe na e pos, mi a resa: “SEÑOR, Dios di mi shon Abraham, laga ku mi por logra mi mishon.

⁴³Ata mi pará awor aki na e pos. Ora un mucha muhé pasa pa saka awa, mi ta pidié pa e laga mi bebe poko awa for di su poron.

⁴⁴Si e rospondé: Bebe numa, mi ta bai saka awa pa bo kamelnan tambe bebe, laga ta é SEÑOR a destiná pa e yu di mi shon.”

⁴⁵Apénas mi a kaba di resa den mi mes, ata Rebeka a kana yega ku su poron riba skouder. El a baha bai na e pos i a saka awa. Mi a pidié pa por fabor laga mi bebe poko awa.

⁴⁶Mesora el a baha e poron i a bisa mi: “Bebe numa, mi ta duna bo kamelnan tambe awa.” Asina el a duna ami i e kamelnan.

⁴⁷Despues mi a puntr'é ta yu di ken e ta. El a bisa mi ku e ta yu di Betuel, e yu hòmber di Nahor ku Milka. E ora ei mi a hinka e renchi na su nanishi i a bistié e armbantnan.

⁴⁸Mi a bùig te na suela i alabá SEÑOR, Dios di mi shon Abraham. Pasobra El a hiba mi derechitu serka famia di mi shon pa aya mi skohe un mucha muhé pa e yu di mi shon.

⁴⁹Laga mi sa awor si boso lo trata mi shon bon i si boso lo ta fiel na dje. Si no ta asina, bisa mi ya mi ta bai buska otro kaminda.’

⁵⁰Laban i Betuel a rospondé: ‘SEÑOR a disidí asina i nos no por bai kontra.

⁵¹Ata Rebeka, bai kuné pa e bira kasá di e yu di bo shon, manera SEÑOR a destiná.’

⁵²Ora e sirbidó a tende e palabranan ei, el a bùig te na suela pa SEÑOR.

⁵³Despues el a saka diferente kos di oro i di plata, tambe paña, duna Rebeka. El a duna e ruman hòmber i e mama tambe regalo kostoso.

⁵⁴Despues e i su kompañeronan a kome i bebe i nan a keda drumi einan. Su manisé, ora nan a lanta, e sirbidó a bisa: ‘Laga mi bai kas bèk serka mi shon.’

⁵⁵Pero e ruman hòmber i e mama di Rebeka a bis'é: ‘Laga Rebeka keda maske ta un dies dia mas serka nos, despues e por bai.’

⁵⁶E sirbidó a rospondé: ‘No tene mi mas. SEÑOR a laga tur kos bai mi bon, asina ta laga mi bai bèk serka mi shon.’

⁵⁷Nan a bisa e ora ei: ‘Laga nos yama e mucha muhé i tende for di su mes boka.’

⁵⁸Nan a yama Rebeka i a puntr'é: ‘Bo ke bai ku e hòmber akí?’ Rebeka a rospondé: ‘Sí.’

⁵⁹Asina nan a bin laga Rebeka i su yaya bai ku e sirbidó di Abraham i su kompañeronan.

⁶⁰Nan a bendishoná Rebeka asin'akí: ‘Ai, nos ruman muhé, Dios laga bo bira mama di miónes di desendiente i laga nan konkistá e siudatnan di nan enemigunan!’

⁶¹Ora Rebeka i su kriánan a kaba di drecha, nan a subi e kamelnan i a sigui e sirbidó di Abraham. Asin'ei e sirbidó ku Rebeka a bai.

⁶²Isak tabata biba den region di desierto Neguèb. El a kaba di regresá di e pos Lahai-Roi.

⁶³Den oranan di atardi el a sali keiru den kunuku. Ora el a hisa kara el a mira kamel ta yega serka.

⁶⁴Rebeka a mir'é i mesora el a laga su mes slep baha for di su kamel.

⁶⁵El a puntra e sirbidó: ‘Ken e hòmber ei ku ta kana bin topa nos den kunuku ta?’ E sirbidó a kontest'é: ‘Ta mi shon.’ E ora ei Rebeka a kohe su belo i a tapa su kara.

⁶⁶E sirbidó a konta Isak tur loke el a hasi.

⁶⁷Despues Isak a hiba Rebeka den tènt di su mama Sara i el a tum'é pa su esposa. Isak a bin stima Rebeka i asina el a bin haña konsuelo pa morto di su mama.