Read Papiamento Génesis 32 Bible Online

Génesis 32 - Papiamento bible

Génesis 32

¹Yakob a sigui su biahe i na kaminda angel di Dios a sali kontr'é.

²Asina Yakob a mira nan el a bisa: ‘Mester ta un ehérsito di Dios.’ P'esei el a yama e lugá ei Mahanaim.[50]

³Despues Yakob a manda algun mensahero Seír, region di Edom, kaminda su ruman Esou tabata biba.

⁴Nan mester a bisa Esou: ‘Bo sirbidó Yakob a manda bisa ku el a biba komo strañero serka Laban tur e tempu.

⁵El a haña baka, buriku, karné, kabritu i katibu. E ta manda e rospondi akí pa bo, su shon; e ta spera di gana bo kariño.’

⁶Ora e mensaheronan a yega bèk serka Yakob, nan a bis'é: ‘Nos a bai serka bo ruman Esou; ya el a sali ku 400 hòmber pa bin topa bo.’

⁷Ora Yakob a tende e notisia akí el a spanta mashá i el a sintié den pèrtá. El a parti e hendenan ku tabata huntu kuné den dos grupo, tambe e karnénan i e kabritunan, e bakanan i e kamelnan.

⁸El a pensa: ‘Si Esou bin ataká e promé grupo, e otro tin chèns di skapa.’

⁹Despues el a kuminsá resa: ‘SEÑOR, Dios di mi tawela Abraham i di mi tata Isak; Bo a manda mi tera di mi famianan bèk i Bo a primintí ku tur kos lo bai mi bon.

¹⁰Mi no ta meresé tur e kariño i fieldat ku Bo a demostrá mi. Mi a krusa riu Yordan ku nada mas ku mi garoti i awor mi tin dos kampamentu.

¹¹Mi ta pidi Bo, salba mi for di man di mi ruman Esou. Mi tin miedu ku e ta bin ataká mi i kaba ku nos tur. Asta ku nos hende muhénan i nos yunan.

¹²Bo mes a primintí ku tur kos lo bai mi bon, ku lo Bo hasi mi desendientenan mes tantu ku e pipitanan di santu kantu di laman, ku no ta di konta.’

¹³Yakob a pasa nochi na e lugá ei i for di loke el a logra haña el a skohe regalo pa su ruman Esou:

¹⁴dosshen kabritu i binti chubatu, dosshen karné i binti chubatu di karné.

¹⁵Trinta kamel ku a kaba di wèrp, ku nan yunan; kuarenta baka i dies toro; binti buriku muhé i dies buriku machu.

¹⁶Despues el a pone kada grupo di bestia bou di kuido di un di su sirbidónan i bisa: ‘Bai dilanti i tene un poko distansia entre kada grupo.’

¹⁷El a ordená e katibu di mas dilanti: ‘Si mi ruman Esou topa bo i e puntra bo: “Ken ta bo doño; unda bo ta bai i di ken e bestianan akí ta?”,

¹⁸bo ta kontest'é: “Di bo sirbidó, di Yakob. Ta un regalo pa bo, mi shon Esou. E mes ta bini djis nos tras.” ’

¹⁹El a duna e di dos i e di tres katibu i tur e katibunan ku tabata hiba e bestianan mesun enkargo: ‘Bisa Esou ora boso top'é:

²⁰“Bo sirbidó Yakob ta bini djis nos tras.” ’ Yakob a pensa: Mi ta purba plakia rabia di mi ruman ku e regalonan ku mi ta manda dilanti. Ya ora nos topa otro personalmente, podisé lo e risibí mi bon.

²¹Asina el a manda e regalonan dilanti i e mes a keda pasa e anochi ei den kampamentu.

²²E mes anochi ei Yakob a lanta i pone su dos kasánan, su dos katibunan muhé i su diesun yunan krusa riu Yabok ku tur loke e tabatin.

²⁴Yakob a keda e so, un hòmber a aserk'é i a lucha kuné te mainta.

²⁵Ora e hòmber a ripará ku e no por a gana Yakob, el a dal Yakob riba su hep te saka e hep for di lugá.

²⁶Despues e hòmber a bis'é: ‘Laga mi bai, ya di dia ta kuminsá habri.’ Yakob a kontest'é: ‘Mi no ta laga bo bai si bo no bendishoná mi.’

²⁷E hòmber a puntr'é: ‘Kon yama bo?’ El a rospondé: ‘Mi yama Yakob.’

²⁸E ora ei e hòmber a bis'é: ‘Lo bo no yama Yakob mas; pero Israel[51] pasobra bo a lucha ku Dios i ku hende i bo a sali ganadó.’

²⁹Yakob a puntr'é: ‘Bisa mi awor kon yama bo!’ Ma e hòmber a kontestá: ‘Pakiko bo ta puntra mi nòmber?’ Despues el a bendishoná Yakob einan mes.

³⁰Yakob a yama e lugá Peniel.[52] E di: ‘Mi a para kara kara ku Dios i tòg mi a keda na bida.’

³¹Solo tabata bria pa Yakob ora el a bai for di Peniel. Pa motibu di e sla na hep e tabata kana kokochá.

³²P'esei te awe desendientenan di Israel no ta kome e múskulo ku tin pegá na un hep, pasobra ta ei Yakob a haña e sla.