Read Papiamento Génesis 33 Bible Online

Génesis 33 - Papiamento bible

Génesis 33

¹Yakob a mira Esou ta bini djaleu, kompañá pa 400 hòmber, p'esei el a parti e muchanan entre Lea, Raquel i su dos katibunan muhé.

²El a pone e katibunan muhé ku nan yunan para dilanti, nan tras Lea ku su yunan i te patras el a pone Raquel ku Jozef.

³E mes a bai kana te dilanti i promé ku el a yega serka su ruman el a bùig shete bia te na suela.

⁴Pero Esou a kore bin kontr'é, ser'é den su brasa i sunch'e. Di alegria tur dos a yora.

⁵Despues Esou a bira wak e muhénan ku e muchanan, i puntra: ‘Ta ken bo tin serka bo ei?’ ‘Ta e yunan ku Dios, den su bondat, a duna bo sirbidó,’ Yakob a kontestá.

⁶E ora ei e katibunan muhé ku nan yunan a bini dilanti i nan a bùig te na suela,

⁷despues Lea ku su yunan a bini dilanti i nan a bùig meskos. Mas delaster Jozef ku Raquel a bini dilanti i nan tambe a bùig te na suela.

⁸Den esei Esou a puntra: ‘Ki intenshon bo tin ku tur e gruponan di bestia ku mi a topa?’ ‘Gana bo kariño,’ Yakob a kontestá.

⁹‘Nò, ruman, mi tin basta. Keda ku loke ta di bo,’ Esou a bisa.

¹⁰Pero Yakob a insistí: ‘Mi no ke tende e kos ei. Si enberdat mi a gana bo kariño, aseptá e regalo akí. Mira bo en persona ta pa mi, manera para kara kara ku Dios, pasobra bo a risibí mi mashá bon.

¹¹Mi ta roga bo: Aseptá e regalo ku nan a trese pa bo, pasobra Dios tabata bon pa mi; mi no tin falta di nada.’ Yakob a keda insistí asina tantu, te ku Esou a aseptá e regalo.

¹²Esou a proponé: ‘Laga nos sigui; mi ta kompañá bo.’

¹³Yakob a rospondé: ‘Manera bo sa, mucha ta suak i mi tin ku tene kuenta ku e karnénan ku tin lamchi i ku e bakanan ku tin bisé. Si kansa nan di mas, maske ta un dia so, tur e karnénan por muri.

¹⁴Bai dilanti di bo sirbidó numa; ami ta sigui pokopoko, segun e bestianan por i lo mi por tene kuenta ku e muchanan te ora mi topa ku mi shon na Seír.’

¹⁵Esou a bisa: ‘Laga sikiera algun di e hòmbernan ku ta kompañá mi keda serka bo.’ Pero Yakob a kontestá: ‘Ma pakiko! No molestiá no!’

¹⁶E dia ei mes Esou a bai Seír bèk.

¹⁷Yakob, enkambio, a bai Sukot, i einan el a traha un kas p'e mes i a lanta poko ramada pa su bestianan. P'esei e lugá ei yama Sukot.[53]

¹⁸Asin'ei Yakob a yega Kanaan for di Padan-Aram i el a lanta su kampamentu parti ost di e siudat Shikem.

¹⁹E tereno kaminda el a lanta su tènt ta un tereno ku el a kumpra pa shen moneda di plata serka e desendientenan di Hamor, fundadó di Shikem.

²⁰Einan el a traha un altá i a yam'é: Dios ta Dios di Israel.