Read Papiamento Génesis 4 Bible Online

Génesis 4 - Papiamento bible

Génesis 4

¹Adam a tene relashon ku su kasá Eva. Eva a sali na estado, el a duna lus na un yu hòmber i a bisa: ‘Ku yudansa di SEÑOR mi a haña un yu hòmber.’ P'esei el a yama e yu Kain.[5]

²Despues el a duna lus na un otro yu hòmber, Abel. Abel a bira wardadó di karné i Kain a bira kunukero.

³Despues di tempu Kain a ofresé un sakrifisio for di kosecha di su kunuku na SEÑOR.

⁴Abel tambe a ofresé un sakrifisio. El a duna SEÑOR e mihó parti di e promé lamchinan ku a nase di su karnénan. SEÑOR a pone atenshon na Abel i su sakrifisio,

⁵pero na Kain i su sakrifisio no. Kain a kunsumí, sera kara.

⁶E ora ei SEÑOR a puntra Kain: ‘Pakiko bo ta rabiá? Pakiko bo kara ta será asina? Si bo hasi bon, bo kara por ta kontentu,

⁷pero si bo laga di hasi bon, piká ta lur tras di bo porta, kla pa ataká bo, ma abo mester sa di domin'é.’

⁸Un dia Kain a kombidá su ruman Abel pa nan bai keiru i ora nan tabata den kunuku Kain a ataká su ruman i mat'é.

⁹E ora ei SEÑOR a puntra Kain: ‘Unda bo ruman Abel ta?’ Kain a kontestá: ‘Mi no sa. Ta su wardadó mi ta antó?’

¹⁰SEÑOR a puntr'é: ‘Ta kiko e kos ku bo a hasi ei? Sanger di bo ruman ku a drama riba tera ta sklama na Mi pa hustisia!

¹¹P'esei lo bo ta maldishoná i lo Mi saka bo for di e tera ku a guli sanger di bo ruman. E ruman ku abo a mata.

¹²Maske kon bo traha kunuku, lo e no produsí nada mas. Lo bo dualu riba mundu sin paradero.’

¹³E ora ei Kain a kontestá SEÑOR: ‘E kastigu akí ta muchu pisá, mi no por karg'é.

¹⁴Bo ta kore ku mi for di e tera akí. Lo mi tin ku skonde pa Bo. Lo mi ta un refugiado riba mundu, sin paradero, ken ku topa mi lo por mata mi.’

¹⁵Pero SEÑOR a kontest'é: ‘Al kontrario, ken ku mata bo lo haña kastigu shete bia.’ I SEÑOR a marka Kain, pa evitá ku kualke hende ku top'é por mat'é.

¹⁶Despues Kain a kita for di presensia di SEÑOR i a bai biba na Nod,[6] un region na parti ost di Eden.

¹⁷Kain a tene relashon ku su kasá. E kasá a sali na estado i a duna lus na un yu hòmber. El a yama e yu Henok. Despues Kain a funda un siudat i a yam'é Henok meskos ku e yu.

¹⁸Henok tabata tata di Irad; Irad, tata di Mehuyael; Mehuyael, tata di Metushael; Metushael, tata di Lamèk.

¹⁹Lamèk a tuma dos muhé komo esposa. Un tabata yama Ada i e otro Sila.

²⁰Ada a duna lus na un yu hòmber, Yabal. El a bira tata di tur esnan ku ta biba den tènt i ku tin kria di bestia.

²¹Su ruman hòmber tabata yama Yubal. El a bira tata di tur esnan ku ta toka arpa i flùit.

²²Sila tambe a duna lus na un yu hòmber Tubal-Kain, ku a bira smet i tabata traha tur sorto di kos di bròns i di heru. Tubal-Kain tabatin un ruman muhé ku tabata yama Naama.

²³Un dia Lamèk a bisa su kasánan: ‘Ada i Sila, skucha mi. Esposanan di Lamèk, pone atenshon na mi palabranan. Mi a mata un hòmber pasobra el a heridá mi i un mucha pasobra el a dal mi.

²⁴Pasobra ta venga Kain shete be, mester venga Lamèk setentishete be.’

²⁵Atrobe Adam a tene relashon ku su kasá. E kasá a duna lus na un yu hòmber i a yam'é Sèt[7] pasobra el a bisa: ‘Dios a duna mi un otro yu na lugá di Abel, ku Kain a mata.’

²⁶Sèt tambe tabatin un yu hòmber i el a yam'é Enosh. E tempu ei nan a kuminsá invoká nòmber di SEÑOR.