Read Papiamento Génesis 42 Bible Online

Génesis 42 - Papiamento bible

Génesis 42

¹Ora Yakob a tende ku tabatin trigo na Egipto el a bisa su yunan: ‘Kiko mas boso ta warda!

²M'a tende ku tin trigo na Egipto. Bai kumpra aya ya nos no ta muri di hamber.’

³E ora ei dies ruman di Jozef a bai kumpra trigo na Egipto.

⁴Yakob no a laga Benhamin, ruman di Jozef, bai ku nan, pasobra el a pensa: ‘Kòrda un kos malu pas'é!’

⁵E yunan di Israel a yega Egipto huntu ku otro ku a bai kumpra trigo, pasobra henter Kanaan tabata sufri hamber.

⁶Komo ta Jozef tabata guia Egipto, e mes tabata bende trigo ku e hendenan di tur parti di e pais. Ora e rumannan di Jozef a yega Egipto, nan a bùig te na suela p'e.

⁷Asina Jozef a mira nan el a rekonosé nan, pero el a hasi komo si fuera e tabata un strañero pa nan. Ku stèm serio el a puntra nan: ‘Boso ei, di unda boso ta bini?’ ‘Nos a bini di Kanaan pa nos kumpra kuminda,’ nan a kontestá.

⁸Jozef sí a rekonosé nan, pero nan no a rekonos'é.

⁹E ora ei Jozef a kòrda e bianan ku el a soña ku su rumannan i el a bisa nan: ‘Ta spiòn boso ta! Wak boso a bin wak na unda e pais ta ménos fuerte.’

¹⁰‘Nò, señor!’ nan a kontestá, ‘Ta pa kumpra kuminda bo sirbidónan a bini.

¹¹Nos tur ta yu di e mesun tata i nos ta hende honrado; no ta spiòn nos ta.’

¹²‘No ta bèrdat,’ Jozef a insistí, ‘wak boso a bin wak na unda e pais ta ménos fuerte.’

¹³Pero nan a kontestá: ‘Bo sirbidónan tabata diesdos ruman, tur yu di e mesun tata i nos ta biba na Kanaan. Nos ruman di mas chikitu a keda serka nos tata i e otro ya no ta huntu ku nos mas.’

¹⁴Sinembargo Jozef a bolbe bisa nan: ‘Mi ta keda para ariba ku boso ta spiòn.

¹⁵Boso lo mester proba ku no t'asina. Mi ta hura pa bida di fárao, ku boso no ta bai for di aki sin trese boso ruman di mas chikitu.

¹⁶Laga un di boso bai busk'é. E otronan ta keda prezu, asina nos por kontrolá si boso ta papia bèrdat. Si no t'asina nos tin prueba ku ta spiòn boso ta.’

¹⁷Jozef a laga sera nan tur tres dia.

¹⁸Riba e di tres dia el a bisa nan: ‘Mi ta un hòmber ku tin rèspèt di Dios. Hasi antó loke mi ta bisa si boso ke keda na bida.

¹⁹Si enberdat boso ta hende honrado, un di boso keda den prizòn; e otronan por bai i hiba kuminda pa boso famianan haña kome.

²⁰Pero boso mester trese boso ruman di mas chikitu pa mi, pa proba ku boso a papia bèrdat. Di otro manera boso lo muri.’ Nan a aseptá,

²¹pero nan a bisa otro: ‘Awor nos ta paga pa loke nos a hasi ku nos ruman. Nos no ker a tende ora el a roga nos pa tene kompashon kuné, ounke nos a ripará kon den pèrtá e tabata. P'esei awor ta nos mes ta den pèrtá.’

²²Ruben a kontestá: ‘Mi no a bisa boso pa no hasi e mucha ningun daño? Pero boso no a hasi kaso di mi. Awor nos ta paga pa su morto.’

²³Nan no tabata sa ku Jozef tabata komprondé nan, pasobra ora el a papia ku nan el a hasi uso di un tòlk.

²⁴Jozef a kita un ratu for di nan pa el a yora. Despues el a bolbe serka nan i a sigui papia ku nan. El a yama Simeon serka dje i nan dilanti el a laga mar'é.

²⁵Despues el a ordená pa yena nan sakunan ku trigo, pone e plaka ku kada unu a paga bèk den su saku i duna nan kuminda pa pasa kaminda. Asina a sosodé.

²⁶E rumannan a pone e trigo riba nan buriku i a bai.

²⁷Ora nan a yega e lugá kaminda nan tabata bai pasa nochi, un di nan a habri su saku pa duna su buriku kuminda i el a ripará ku su sèn tabata na boka di e saku.

²⁸El a bisa su rumannan: ‘Mira, nan a duna mi mi sèn bèk. At'é aki den mi saku di trigo!’ Nan a pèrdè kurashi i yen di miedu nan a bisa otro: ‘Ta kiko e kos ku Dios a hasi ku nos awor!’

²⁹Ora nan a yega Kanaan nan a konta Yakob, nan tata, tur loke a pasa nan i a bis'é:

³⁰‘E hòmber ku ta goberná e pais aya a papia serio ku nos i a akusá nos di ta spiòn.

³¹Pero nos a bis'é ku ta hende honrado nos ta, ku nos no ta spiòn.

³²Nos a bis'é tambe, ku nos tabata diesdos ruman, tur yu di e mesun tata, ku ún no ta huntu ku nos mas i ku esun di mas chikitu a keda serka bo na Kanaan.

³³E ora ei el a bisa nos: “Proba awor ku boso ta hende honrado. Un ruman ta keda serka mi i e otronan ta hiba trigo pa boso famianan.

³⁴Trese boso ruman di mas chikitu, e ora ei mi ta sigur ku boso ta hende honrado i ku boso no ta spiòn. E ora ei lo mi laga boso otro ruman sali liber i boso lo por biaha libremente tur kaminda den e pais.” ’

³⁵Ora nan a hasi nan sakunan di trigo bashí, kada unu a haña su sèn bèk. Tantu nan komo nan tata a spanta i

³⁶Yakob a bisa nan: ‘Boso ta kita tur mi yunan for di mi, Jozef ya no ta huntu ku nos mas, Simeon no t'ei, i awor boso ke bai ku Benhamin tambe! Tur sla ta pa mi!’

³⁷E ora ei Ruben a bisa su tata: ‘Mi ta keda responsabel pa Benhamin, lo mi tres'é bèk pa bo. Si mi no tres'é bèk pa bo, mata mi dos yu hòmbernan numa.’

³⁸Pero Yakob a kontestá: ‘Mi yu no ta bai ku boso. Su ruman Jozef a muri i t'e so a keda. Si algu malu pas'é durante e biahe, lo ta boso falta ku e bieu akí ta muri di pena.’