Read Papiamento Génesis 8 Bible Online

Génesis 8 - Papiamento bible

Génesis 8

¹Dios no a lubidá riba Noe ku tur e bestianan di kria i bestianan di mondi ku tabata huntu kuné den arka. El a laga bientu supla riba tera di moda ku e awa a kuminsá baha.

²E laman di awa bou di tera a stòp di bini ariba i e damnan den shelu a sera. Awa no a yobe mas i

³pokopoko e awa riba tera a kuminsá kore bai.

⁴Despues di 150 dia awa a baha basta i den e di shete luna riba dia 27 e arka a keda pegá riba un di e serunan di Ararat.

⁵Awa a sigui baha i riba e promé dia di e di dies luna por a mira kabes di e serunan.

⁶Despues di 40 dia Noe a habri e bentana ku el a traha den e arka

⁷i el a laga un raf bula bai. E para a keda bula bai bini warda e awa riba tera seka.

⁸Despues Noe a laga un palomba bula bai pa mira si e awa riba tera a baha kaba.

⁹Pero e palomba no a haña un kaminda pa para sosegá i el a bini bèk, komo ku ainda tur kaminda tabata bou di awa. P'esei Noe a saka su man, kohe e palomba i hink'é den arka.

¹⁰Noe a laga shete dia pasa i el a bolbe laga e palomba bula bai.

¹¹Te kasi anochi e palomba a bini bèk i mira... e tabatin un blachi fresku di palu di oleifi den su pik. Asina Noe a ripará ku e awa riba tera a baha.

¹²El a bolbe laga shete dia pasa i atrobe el a laga e palomba bula bai pero e bia akí sí e palomba no a bini bèk.

¹³Tempu Noe tabatin 601 aña, riba e promé dia di e promé luna e awa a bai kompletamente. Ora Noe a kita un parti di e dak di e arka, el a nota ku tera a bira seku.

¹⁴Riba e di 27 dia dje di dos luna, tera tabata seku seku.

¹⁵E ora ei Dios a bisa Noe:

¹⁶‘Sali for di e arka huntu ku bo kasá, ku bo yunan i nan kasá.

¹⁷Saka tambe afó tur e bestianan ku ta huntu ku bo, e paranan, e bestianan di kria i esnan ku ta lastra abou riba suela, pa nan rende i yena mundu.’

¹⁸E ora ei Noe, su kasá, su yunan i nan kasá a sali.

¹⁹Tambe tur bestia di kria i bestia di mondi, bestia ku ta lastra abou riba suela i esnan ku ta bula. Nan a sali den grupo, segun nan sorto.

²⁰Despues Noe a traha un altá pa SEÑOR; di tur sorto di bestia puru el a skohe un i a ofresé nan komo sakrifisio di kandela.

²¹Ora SEÑOR a sinti e holó dushi, El a pensa den su mes: ‘Nunka mas lo Mi no maldishoná tera pa hende su falta. Pasobra for di chikitu hende ta pensa den maldat so. Lo Mi no bolbe destruí tur bida manera Mi a hasi.

²²Tanten mundu ta eksistí, hende lo sembra i kosechá, lo tin tempu di frialdat i tempu di kalor, tempu di áwaseru i tempu di sekura, dia i anochi.’