Read Papiamento 2 Samuel 5 Bible Online

2 Samuel 5 - Papiamento bible

2 Samuel 5

¹Despues tur e tribunan di Israel a bai Hebron pa papia ku David i bis'é: ‘Mira, nos ta di mes sanger.

²For di tempu Saul tabata nos rei, ya bo tabata esun ku tabata bai guera ku Israel i bini bèk. Ademas SEÑOR a primintí ku t'abo lo ta wardadó i gobernador di su pueblo, Israel.’

³Asina tur e ansianonan di Israel a bai Hebron serka rei David i rei a sera un pakto ku nan, ku SEÑOR komo testigu. E ora ei nan a konsagrá David komo rei di Israel.

⁴David tabatin trinta aña dia el a bira rei; el a goberná kuarenta aña.

⁵For di Hebron el a goberná Huda shete aña i seis luna, i for di Herusalèm el a goberná henter Israel i Huda trintitres aña.

⁶Rei David i su hòmbernan a sali bai Herusalèm pa ataká e yebusitanan, ku tabata biba den e region ei. E yebusitanan, ku a kere ku David lo no a logra drenta e siudat, a bis'é: ‘Bo no ta drenta akinan. Asta hende siegu i koho por kita bo di drenta.’ Ku esei nan ker a bisa: ‘David no ta drenta aki.’

⁷Sinembargo David a kapturá fòrti Sion, ku awendia ta konosí komo Siudat di David.

⁸Na e okashon ei David a bisa: ‘Esun ku ke derotá e yebusitanan, mester buska moda di drenta dor di e tùnel kaminda awa ta pasa pa asina yega serka e koho- i siegunan ku David no ke mira ni pintá.’ P'esei nan sa bisa: ‘Ni siegu ni koho no por drenta Tèmpel.’

⁹Despues David a bai biba den e fòrti i a yam'é: Siudat di David. El a laga traha muraya rònt di dje, kuminsando for di terasa di Milo.

¹⁰David su poder tabata oumentá dia pa dia i SEÑOR, Dios di Universo, tabata kuné.

¹¹Rei Hiram di Tiro a manda embahadornan serka David, ku palu di seder, karpinté i kapdó di piedra. Nan a konstruí un palasio pa David.

¹²E ora ei David a ripará ku SEÑOR a konfirm'é rei di Israel i a duna su reino gran fama pa kara di su pueblo, Israel.

¹³Despues ku David a bini for di Hebron, el a tuma mas konkubina i kasá di Herusalèm i el a haña ainda mas yu hòmber i muhé aserka.

¹⁴Ata nòmber di e yu hòmbernan ku a nase na Herusalèm: Shamúa, Shobab, Natan, Salomon,

¹⁵Yibhar, Elishúa, Nèfèg, Yafia,

¹⁶Elishama, Elyada i Elifelèt.

¹⁷Ora e filisteonan a tende ku nan a konsagrá David komo rei di Israel, nan tur a sali bini ku tur nan trupanan pa kapturá David. Pero David a tende i el a retirá den su spelònk altu den seru.

¹⁸Ora e filisteonan a bini i plama den vaye di Refaim,

¹⁹David a konsultá SEÑOR i puntr'É: ‘Mi por ataká e filisteonan? Bo ta entregá nan den mi man?’ I SEÑOR a kontest'é: ‘Sí, ataká nan, pasobra Mi ta entregá nan sigur den bo man.’

²⁰David a yega Baal-Perasim i derotá e filisteonan. E ora ei el a bisa: ‘SEÑOR a bai mi dilanti i habri paso kontra mi enemigunan manera awa ta habri su kaminda.’ P'esei a yama e lugá ei: Baal-Perasim: SEÑOR ta habri kaminda.

²¹Nan mester a laga asta e imágennan di nan diosnan atras i David i su hòmbernan a bai ku nan.

²²E filisteonan a bolbe bin plama den vaye di Refaim.

²³David a konsultá SEÑOR i SEÑOR a kontest'é: ‘No ataká nan frontal, pero pasa tras di nan i ataká nan den lomba dilanti di e palunan di gòm.

²⁴Asina bo tende zonido di pia den tòp di e palunan di gòm, ataká lihé, pasobra esaki ke men ku Ami, SEÑOR, ta bai bo dilanti pa derotá e ehérsito filisteo.’

²⁵David a hasi loke SEÑOR a orden'é; henter kaminda for di Gueba te banda di Guèzèr el a derotá e filisteonan.