Read Papiamento 2 Samuel 8 Bible Online

2 Samuel 8 - Papiamento bible

2 Samuel 8

¹Despues David a derotá e filisteonan i dominá nan. El a kita poder for di nan.

²Tambe el a derotá e moabitanan, el a pone nan drumi abou i a midi nan ku un kordon: kada be e tabata midi dos midí pa laga mata i un midí pa keda na bida. Asina David a someté e moabitanan i a pone nan paga belasting.

³Tambe David a derotá Hadadezèr, yu hòmber di Rehob, rei di Soba, ora esaki a bai rekuperá su dominio riba region di riu Eufrat.

⁴David a kohe 1700 sòldá di kabayeria mas 20.000 sòldá di infanteria di Hadadezèr prezu; ademas el a laga kòrta kabuya di pata di tur e kabainan di garoshi di guera, ku eksepshon di e kabainan nesesario pa shen garoshi.

⁵E arameonan di Damasko a bin yuda Hadadezèr, rei di Soba, pero David a derotá e sòldánan arameo i a mata 22.000.

⁶Tambe el a lanta pòstnan militar den reino arameo di Damasko. For di e dia ei e arameonan tabata someté na David i nan mester a pag'é belasting. Asina SEÑOR a duna David viktoria unda ku el a bai bringa.

⁷David a kohe e eskudonan di oro ku e guardianan personal di Hadadezèr tabata usa i a bai Herusalèm ku nan.

⁸I na Bètag i Berotai, e siudatnan ku tabata pertenesé na Hadadezèr, rei David a kohe un gran kantidat di bròns.

⁹Ora Toi, rei di Hamat, a tende ku David a derotá henter ehérsito di Hadadezèr,

¹⁰el a manda su yu hòmber Yehoram ku opheto di plata, oro i bròns serka dje pa kumind'é i yam'é pabien, pasobra el a bringa ku Hadadezèr i derot'é.

¹¹Hadadezèr semper tabata na guera ku Toi. David a konsagrá tur e ophetonan akí tambe na SEÑOR, meskos ku el a hasi ku e oro i plata ku el a konsagrá for di tur e nashonnan ku el a someté, esta

¹²di Edom,[3] di Moab i Amon, di e filisteonan i e amalekitanan, i e botin ku el a kita for di Hadadezèr, yu di Rehob, rei di Soba.

¹³David a haña mas fama ora el a bini bèk i a derotá e edomitanan,[4] den Vaye di Salu. El a derotá 18.000 di nan.

¹⁴Despues el a lanta pòst militar den henter Edom i tur e edomitanan a keda someté na David. Unda ku David a bai bringa SEÑOR a dun'é viktoria.

¹⁵Unabes rei di henter Israel, el a duna pueblo su derechi i a hasi hustisia.

¹⁶Hefe di ehérsito tabata Yoab, yu hòmber di Seruya; Yoshafat, yu hòmber di Ahilud, tabata sekretario di estado.

¹⁷Sadok, yu hòmber di Ahitub, i Ahimelèk, yu di Abyatar, tabata e saserdotenan; Seraías tabata sekretario,

¹⁸i Benayahu, yu hòmber di Yoyada, tabata na kabes di e guardia keretita i peletita. E yu hòmbernan di David tabata saserdote.