Read Papiamento 2 Samuel 9 Bible Online

2 Samuel 9 - Papiamento bible

2 Samuel 9

¹Un dia David a puntra: ‘Tin un famia di Saul na bida ainda? Lo mi demostr'é fieldat pa kara di Yonatan.’

²Awor famia di Saul tabatin un tal Siba den nan servisio. Nan a yam'é pa el a presentá serka David. Ora Siba a presentá, David a puntr'é: ‘T'abo ta Siba?’ El a kontestá: ‘Na rei su òrdu.’

³Rei a bisa: ‘Tin kualke famia di Saul ainda na bida ku mi por hasié un fabor, manera mi a hura na Dios?’ Siba a rospond'é: ‘Tin un yu hòmber di Yonatan ainda ku ta mankaron na tur dos pia.’

⁴‘Unda e ta?’ rei a puntra. ‘Na Lo-Debar, na kas di Makir, yu hòmber di Amiel,’ Siba a kontestá.

⁵E ora ei rei a manda busk'é na kas di Makir, yu di Amiel, na Lo-Debar.

⁶Ora Mefiboshèt, yu di Yonatan i ñetu di Saul, a yega dilanti di David el a bùig te na suela pa demostrá rèspèt. ‘Mefiboshèt,’ David a bisa. ‘Na bo òrdu, mahestat.’

⁷David a bis'é: ‘No tene miedu, pa kara di bo tata Yonatan lo mi trata bo bon. Lo mi sòru pa nan duna bo tur e teranan bèk ku a pertenesé na bo tawela Saul. Tambe lo bo kome regularmente ku mi na mesa.’

⁸Pero Mefiboshèt a bùig i a bisa: ‘Ta ken mi ta ku su mahestat ta preokupá pa un kachó morto manera mi?’

⁹Rei sinembargo a yama Siba, ku tabata sirbidó di Saul, i bis'é: ‘Mi ta entregá e ñetu di bo shon tur loke ta pertenesé na Saul i su famia.

¹⁰Abo, bo yunan i bo sirbidónan mester traha kunuku p'e i kosechá, pa e ñetu di bo shon tin di kome. Mefiboshèt, ñetu di bo shon, lo kome regularmente ku mi na mesa.’ Siba awor tabatin diessinku yu hòmber i binti sirbidó.

¹¹El a bisa rei: ‘Lo sosodé manera su mahestat a ordená su sirbidó.’ Mefiboshèt a kome regularmente na mesa di David, manera un yu di rei.

¹²Mefiboshèt tabatin un yu hòmber chikitu, ku tabata yama Mikas. Tur e hendenan ku tabata biba den kas di Siba tabata den servisio di Mefiboshèt.

¹³Mefiboshèt ku tabata mankaron na tur dos pia, tabata biba na Herusalèm, pasobra regularmente e tabata kome na mesa di rei.