Read Papiamento 1 Reinan 11 Bible Online

1 Reinan 11 - Papiamento bible

1 Reinan 11

¹Fuera di e yu muhé di Fárao, Salomon a stima hopi muhé strañero. Muhénan di Moab, di Amon, di Edom i di Sidon i muhénan hetita.

²Nan tabata pertenesé na e pueblonan ku SEÑOR a bisa e israelitanan: ‘No mete ku nan pa nan no mester mete ku boso, pasobra sigur nan lo pone boso adorá nan diosnan.’ Pero Salomon a pega su kurason na e muhénan ei i e tabata stima nan.

³E tabata kasá ku 700 prinsesa i e tabatin 300 konkubina. Ta nan a hink'é den mal kaminda.

⁴Salomon ya tabata di edat avansá dia su kasánan a pon'é adorá otro diosnan. Kontrali na su tata David e no a dediká su mes di henter su kurason na SEÑOR.

⁵Asina Salomon tabata sirbi Astarte, e diosa di sidonitanan, i Milkom, e dios repugnante di amonitanan.

⁶Salomon tabata hasi loke ta malu den bista di SEÑOR i e no tabata siguiÉ fielmente manera su tata David.

⁷Den e tempu ei Salomon a laga traha un altá riba e seru na ost di Herusalèm na honor di Kemosh i di Molèk, e diosnan repugnante di Moab i Amon.

⁸El a hasi meskos pa e diosnan di tur su kasánan strañero. E kasánan akí tabata ofresé sensia i sakrifisio na nan diosnan.

⁹SEÑOR a haña rabia riba Salomon, pasobra el a alehá su mes di SEÑOR, Dios di Israel, ku dos be a aparesé n'e, ku presisamente

¹⁰a dun'é òrdu pa no sirbi otro dios. Pero Salomon no a hasi kaso di loke SEÑOR a ordená.

¹¹E ora ei SEÑOR a bisa Salomon: ‘Ya ku bo a komportá bo asina i bo no a kumpli ku mi aliansa, ni ku e leinan ku Mi a duna bo, lo Mi ranka e reino kita for di bo i duna bo sirbidó e.

¹²Sinembargo pa kara di bo tata David lo Mi no hasié mientrastantu bo ta na bida, pero lo Mi kit'é for di bo yu.

¹³Tòg lo Mi no kita e reino kompleto for di dje, lo Mi lag'é ku un tribu pa kara di mi sirbidó David i pa kara di Herusalèm, e siudat ku Mi a skohe.’

¹⁴SEÑOR a laga un enemigu lanta kontra Salomon, e edomita Hadad ku tabata famia di rei di Edom.

¹⁵Tempu David a derotá[9] Edom, Yoab, e komandante di ehérsito, a bai dera esnan ku a kai den bataya i el a mata tur e hòmbernan di Edom.

¹⁶E i tur e israelitanan a keda aya durante seis luna, te ora nan a kaba ku tur e hòmbernan di Edom.

¹⁷Pero Hadad, ku tabata hopi yòn e tempu ei, a hui bai Egipto ku poko hòmber di Edom, ku tabata den servisio di su tata.

¹⁸Nan a sali di Midian bai Paran, kaminda nan a buska poko hòmber mas pa bai serka Fárao, rei di Egipto. Fárao a duna Hadad un kas, primintié kuminda i a regal'é un pida tera.

¹⁹Hadad a gana simpatia di Fárao asina tantu, ku Fárao a lag'é kasa ku su kuñá, ruman muhé di reina Tagpenes.

²⁰E ruman muhé di Tagpenes a haña un yu hòmber ku Hadad. Nan a yama e yu Guenubat. Tagpenes a kria e yu akí den palasio di Fárao, kaminda e mucha a lanta huntu ku e yunan di Fárao.

²¹Ora Hadad ku tabata na Egipto, a tende ku David a muri i ku Yoab, e komandante di ehérsito, tambe a muri, el a bisa Fárao: ‘Laga mi bai mi tera.’

²²Pero Fárao a puntr'é: ‘Pakiko bo ke bai bo tera diripiente asina? Bo ta sinti falta di algu aki?’ Hadad a kontestá: ‘Mi no ta sinti falta di nada, pero laga mi bai tòg!’

²³Dios a laga un enemigu mas lanta kontra Salomon, esta Rezon, yu di Elyada ku a hui bai for di su doño Hadadezèr, rei di Soba.

²⁴El a reuní poko hòmber i a bira kabesante di un trupa di rebelde; dia David tabata buska nan pa mata, nan a bai biba na Damasko i a hasi Rezon rei.

²⁵Asina Rezon a bira rei di Aram. E tabata enemigu di Israel durante henter bida di Salomon i meskos ku Hadad e tambe a kousa daño na Israel.

²⁶Yerobeam, yu di Nebat, tambe a lanta kontra rei. Yerobeam tabata un funshonario di Salomon di e siudat Sereda, di tribu di Efraim. Su mama Serua tabata biuda.

²⁷E motibu ku Yerobeam a lanta kontra rei ta lo siguiente: Salomon a kaba di traha e terasa di Milo pa sera e buraku den muraya di e siudat di su tata David.

²⁸Yerobeam tabata un hòmber balente i fuerte i ora Salomon a mira ku e hóben tabata un bon trahadó, el a hasié forman di tur e peonnan di e tribu di Jozef.

²⁹Un dia ku Yerobeam a sali for di Herusalèm, el a topa profeta Ahías di Silo na kaminda. Ahías tabatin un mantel nobo bistí.

³⁰Nan dos so tabata den kunuku. Na dado momento Ahías a kohe e mantel nobo, ku e tabatin bistí, sker e den diesdos pida.

³¹El a bisa Yerobeam: ‘Tuma dies pida pa bo, pasobra SEÑOR, Dios di Israel, ta bisa: “Mira, Mi ta bai ranka kita e reino for di Salomon i duna bo dies tribu.

³²Lo Mi laga Salomon ku un tribu so, pa kara di mi sirbidó David i pa motibu di Herusalèm, e siudat ku Mi a skohe den tur e tribunan di Israel.

³³Pasobra rei i pueblo a bira lomba pa Mi i a bai adorá diosnan falsu manera Astarte, diosa di Sidon, Kemosh, dios di Moab, i Milkom, dios di Amon. Nan no a sigui mi kamindanan. Nan no a hasi loke ta drechi den mi bista, ni a kumpli ku mi leinan i mi dekretonan manera su tata David, a hasi.

³⁴Sinembargo lo Mi no kita e reino for di dje mes; lo Mi manten'é komo rei tanten e ta na bida, pa kara di mi sirbidó David, ku Mi a skohe i ku a kumpli ku mi mandamentunan i mi leinan.

³⁵Pero lo Mi kita e reino for di su yu i duna abo e, es desir lo mi duna bo dies tribu.

³⁶Lo Mi laga su yu keda ku ún tribu, pasobra Mi ke tene rekuerdo di mi sirbidó David semper bibu na Herusalèm, e siudat ku Mi a skohe komo mi santuario.

³⁷Bo mes, lo Mi hasi rei di Israel i lo bo goberná unda ku bo ke.

³⁸Si bo obedesé Mi i hasi tur loke Mi ordená bo, bo sigui e kaminda ku lo Mi mustra bo i bo hasi loke ta drechi den mi bista, bo kumpli ku mi leinan i mi mandamentunan manera David, mi sirbidó, a hasi, lo Mi keda ku bo. Lo Mi duna bo un dinastia duradero, manera Mi a duna David, i entregá Israel na bo.

³⁹Pa e motibu akí lo Mi tin ku humiliá e desendientenan di David, pero no pa semper.” ’

⁴⁰Salomon a trata na mata Yerobeam, pero Yerobeam a hui bai Egipto, serka Shishak, rei di e pais ei, i el a keda aya te ora Salomon a muri.

⁴¹Mas detaye tokante Salomon, su sabiduria i tur loke el a hasi ta skibí den buki di krónika di Salomon.

⁴²For di Herusalèm, Salomon a goberná henter Israel durante kuarenta aña.

⁴³Dia Salomon a bai sosegá serka su antepasadonan, a der'é na siudat di su tata David. Su yu Rehabeam a siguié komo rei.