Read Papiamento 1 Reinan 4 Bible Online

1 Reinan 4 - Papiamento bible

1 Reinan 4

¹Salomon tabata rei di henter Israel.

²Su funshonarionan mas altu tabata: Azarías, yu di Sadok, — saserdote;

³Elihorèf i Ahías, e yunan di Shisha, — sekretario; Yoshafat, yu di Ahilud, — sekretario di estado;

⁴Benayahu, yu di Yoyada, — komandante di ehérsito; Sadok i Abyatar — saserdote;

⁵Azarías, yu di Natan, — hefe di e gobernadornan; saserdote Zabud, yu di Natan, — konsehero partikular di rei;

⁶Ahishar, mayordomo di palasio; i Adoniram, yu di Abda, — kabes di trabounan obligatorio.

⁷Salomon tabatin diesdos gobernador pa henter Israel. Nan tabatin obligashon di sòru pa e provishonnan di rei i su famia. Kada luna un di nan mester a perkurá pa esei.

⁸Aki ta sigui nan nòmber: Bèn-Hur, den e serunan di Efraim;

⁹Bèn-Dèkèr, na Makas, Shaalbim, Bet-Shèmèsh i Elon-Bet-Hanan;

¹⁰Bèn-Hèsèd, na Arubot (Soko i henter pais di Hefèr tabata kai bou di dje);

¹¹Bèn-Abinadab, na e kareda di serunan Dor (su kasá tabata Tafat, yu muhé di Salomon);

¹²Baana, yu di Ahilud, na Tanak, Megido i henter Bet-Shean, ku ta keda banda di Sartan, bou di Yizreel, for di Bet-Shean te ku Abel-Mehola, te mas ayá di Yokmeam;

¹³Bèn-Gèbèr, na Ramot di Guilead: e tabatin e pueblonan di Yair, yu di Manase, ku tabata situá den Guilead, na su enkargo, tambe region di Argob, na Bashan, ku su sesenta siudatnan rondoná di muraya i ku rèndunan di bròns;

¹⁴Ahinadab, yu di Ido, na Mahanaim;

¹⁵Ahimaas, na Naftali. (E tambe a kasa ku un yu muhé di Salomon, yamá Basmat);

¹⁶Baana, yu di Hushai, na Asher i Alot;

¹⁷Yoshafat, yu di Parúa, na Isakar;

¹⁸Shimi, yu di Ela, na Benhamin;

¹⁹Guèbèr, yu di Uri, na region di Guilead, e pais kaminda Sihon, rei di amoritanan, i Og, rei di Bashan, a yega di goberná un tempu. Ademas tabatin ún gobernador general riba henter e pais.

²⁰Huda i Israel tabatin un poblashon numeroso manera santu di laman. Tabatin kuminda i bibida na abundansia i tabata reina alegria.

²¹ Salomon tabata goberná tur e reinonan for di riu Eufrat te na pais di e filisteonan i te na frontera ku Egipto. Nan tabata paga belasting i tabata someté na Salomon durante henter su bida.

²²Ata loke Salomon tabatin mester na provishon tur dia: 6600 kana di hariña fini, 13.200 kana di hariña gewon,

²³dies baka gòrdá, binti baka kriá ku yerba so i shen karné, sin konta biná kòrá, gasela, biná pintá i gansnan gòrdá,

²⁴pasobra Salomon tabata goberná henter e region na wèst di Eufrat, for di Tifsag te Gaza, riba tur e reinan di e region ei. Salomon tabata biba na pas ku tur e paisnan ku tabata rondoná Israel.

²⁵Tanten Salomon tabata na bida, e habitantenan di Huda i Israel for di Dan den nort te na Beer-Shèba den zùit, por a sinta trankil bou di nan matanan di wendrùif i bou di nan palunan di figo.

²⁶Salomon tabatin 4000 [1] bòks pa e kabainan di su garoshinan. Tambe e tabatin 12.000 sòldá di kabayeria.

²⁷E gobernadornan ya menshoná, kada unu den e luna ku tabata su bùrt, tabata sòru pa rei i pa esnan ku tabata kome for di su mesa haña e kuminda nesesario; pa nan no tabatin falta di nada.

²⁸Kada unu na su bùrt tabata manda sebada i yerba seku pa e kabainan ku tabata hala garoshi i pa e otro bestianan di hala karga, kaminda nan indik'é.

²⁹Dios a duna Salomon sabiduria, inteligensia, i komprenshon mes abundante ku santu di laman.

³⁰Salomon su sabiduria a surpasá esun di e egipsionan i esun di e hendenan di oriente.

³¹E tabata mas sabí ku tur hende, mas sabí ku Etan, e ezrahita, i ku Heman, Kalkol i Darda, e yunan di Mahol. Su fama a kore den tur e paisnan den bisindario.

³²El a produsí 3000 proverbio i el a skibi 1005 kantika.

³³El a papia di palu i mata, di e seder grandi di Libanon te e hisopo chikitu ku ta krese na muraya. Tambe el a papia di bestia di kria, di para, reptil i piská.

³⁴Di tur nashon tabata bini hende pa skucha sabiduria di Salomon; nan tabata representante di tur e reinan di mundu ku a tende di su sabiduria.